1 Tamuwen 9:16 - Ala Wone Peenok Peebi Mbanak

¹⁶ “It aakumi Iterali mendek nen, Ai-ao, yogo logonet, Yeenggwa niret o, yinuk, leenggu maakwi iigirak me, it aakumi Pilitin mendek ineenggime nen inagap ndake logowak nduk, o ko'lu oonegen yogop paga aret aap ambi anebunu Mbeniyamin mendek nappi woraminggirak kimbirak lambumbunuk, an napuri aakumi Iterali inowe inarum logowak nduk, amburu anobak paga kilippunu o,” yoreegerak.

1 Tamuwen 9:16 Iomraidhean Croise

2 Endagembogut 20:5

“Kiyokan yungguninuk, an napuri inowe endagembogut Kitikiya wonage me, nage logomenggendik, yogop yoru o. At Aliku kombo Ndawut ogoba Ala nen ari logonet, At Kitikiya tamban eekerak nogo naruk konengge, ale amburu wangge nogo muk nenegen kage, eekirak me, an nen andi ti lek eerogo punuk, eenik nggorek logorak tahun 15 ambinom eeruwak nduk, wogorigin me, nogo mbere yinuk, ko'lu Naliku an ALA nawi wurik me nawak o. An nendage maluk age, ndi, wone nayeloman Ndawut nimbirak koonogo pereegirak nogo mbeyok ari, eeke kero, o kota yi, aap endagembogut Atiyut mendek eenggime arukwak, an nen arum wake, ili ari, eeke logogin, yegerak, yorumunggun o,” yinuk, yoreegerak.

Ndawi 102:1

Kaliku ALA wae. An tamban eeke yi, karuk konengge, Kat nen yeenggwa nirenok nduk Noone nggwok paga yokkege yi, liippege, Eeru o.

Ndawi 106:44

Togop eekwi iigak kwe, Le yogo logonet, inoone nggwok paga Aliku ALA yogwi iinok, aruk konengge, Aaninggin-paaninggin inoba age nogo liippiige, Eeke nagagerik,

Ndawi 25:18

An ee'nakwi paga yagan wake, Tebenak logonet niniki andi negen wonage, Eeke yi, Pe'neege logomenggendik, nomaluk lek eerogo panu o.

Kini Wuppiige 16:9

Aakumi inikime nen, “Yogop eerikit, ndogop eerikit,” mbako menggaarak kwe, Aliku ALA nen perak, “Ti eeppunuk ti ee'nip o. Ti eeppunuk ti ee'nip o,” yinuk, koonogo yorage menggerak.

Yeremiya 32:8

Yo'nege mbareegi, at Aliku ALA nen yo'nereegerak nogo ndak-ndak, at noreeluk Kanamen nen an aap endagembogut awi nggwok abe wurik arum waka inawoore'nggam wonage me, neya wage nagagerik, “An nanggween mbanak it aap Mbeniyamin wonogo menggam o Anatot wonage nogo, kuniyak mbakirak me, kat noreeluk nen aret onggo kunggolage logomenggendik, unde eeppatinuk logorak op me, yu o,” yo'nereegerak. “At Aliku ALA nen an yo'negerak nogo yi aret kagi,” mba'nuk,

1 Tamuwen 10:1

Yoge mbareegi, ayeloman nogo nappereegerak nage kagak, aap Tamuwen nogo nen eyo tayitun amburu yiiwa'na toolak nogo wagangge nagagerik, Tawun anobak paga kilippunuk keyage wake, agandin eyak mbangge, eeke nagagerik, wone yoge logonet, “Ala apuri iniki kundugu Iterali nogo inarum logonet, inawone mbangge logonok nduk at Aliku ALA nen kat aret leenogo mippagagerak keenu a'nok nduk, amburu kilippagagi o.

1 Tamuwen 14:20

Ari nagagerik, wim namburuwok nduk, at Tawun awuri abok aret inom kuwak eeppunuk, wim tinime nogo nogogwaarik, it Pilitin mendek nogo mbuti wooluwak paga it mban-mban wat-wat agan nogo logonet, inoone ya-kwa yogwe iyareegwaarak.

1 Tamuwen 14:23

At Aliku ALA nen aakumi Iterali mendek nogo, ne ti eyom paga inagap ndake kagak, inoorit o Mbet-Awen kagak-kagak tayorogon ari nogogwaarak.

1 Tamuwen 15:1

Ne ambi paga at Tamuwen nen Tawun yoge, “At Aliku ALA apuri Iterali inowe kendagembogut logorak amburu eerogo mippagakit nduk, Aliku ALA nen an aret nappani wagagerak me, yogondak Aliku ALA nen wone yokkege yi, konengge logot o.

1 Tamuwen 16:1

Ti'nuk, at Aliku ALA nen Tamuwen yoge, “At Tawun nogo ti, it aakumi Iterali inowe endagembogut logorak an mbo pigirak neegak, at paga kat kiniki wakkolage keegak, ne mande logomunggun o? Yogondak eyo tayitun amburu togolowa'na toologo wonok, o Mbe'lekem aap endage Itayi wonage me nage logomenggendik, at apuri ambit-ambi Iterali inowe endagembogut logowak nduk, an muk leenogo pigirak me, amburu oba kilippi nak o.”

1 Tamuwen 16:3

Yorage logomenggendik, tapi Naliku ALA nake warogo wo'ninuk, lake logonet, aap Itayi woraawak nduk, yorumunggun o. Yoge keenok, at time woramenggerak me, Aap yi aret mippu o, yokkege neenok, at aret amburu oba kilippumunggun o,” yoreegerak.