1 Tamuwen 6:2 - Ala Wone Peenok Peebi Mbanak

² it aakumi Pilitin mendek nogo nen aap kugi unde inom, it tili pagangga inom, woraawak nduk, wiirogogwaarak wogo mbareegwa, yorogo logonet, “Aliku ALA aloobut mbanak yi, nonggop eeruwok o? Iyokan wonagagim nappuurak kenok, nonggop agago nappuurak, yo'niraanip o.”

1 Tamuwen 6:2 Iomraidhean Croise

Wakkagagerak 41:8

Mbake nagagerik, ko'lu kuubondendok at Pirawun nogo nen iniki piirik age mbareegi, aakumi o Metit mendek inabi kogwe iinok, eebe yoraga inom, it aap yi wone ndi wone ineenu mendek inom, abok aret wiiragagerak kuwak ari wogo mbareegwa, abi kagagerak nogo mbininogo yoragagerak kwe, it nogo ambi nen, “Kabi kagandak ti, eebe yi aret o,” yinuk, yorulik aret eereegwaarak.

Wundeegwaarak 7:11

Waalo aret age mbareegi, at Pirawun nen o Metit time aap kugi alom ineenu inom, tili pagangga inom, wiiragagerak wogo nogogwaarik, inalitik-inalitak inowaanggun woppunuk, inikime nen mban inagugi nogo linogo mbo nappogo mbareegwa, waalo aret agagerak kwe, Karun owaanggun nogo nen perak, it inowaanggun nogo tigitogon aret nenggegerak.

Yetaya 2:6

Ala wae. Yakup paga wiganak kat kapuri mbo piyareegindak me, ao! Mbo piyareegindak logonet, Aakumi oonegen lagi wage menggim pa'nggwe nen mbi wako mengga kwak o yime mbi wakwi mban ndak wa'nage, It aakumi Pilitin mendek nen tili paganit nugu mengga kwak, it tili paganit nugwi, Aakumi alik mendek inandogon inom woppunuk eerit nugwi, Eeko agaarik o.

Ndaniyen 2:2

Meek age mbareegi, it kugi alom ineenu nen yoraga inom, inagugi nen yorage kenok, yoraga inom, it aap tili pagangga inom, laaluguragan pekkenok yaga inom, abok aret nen abi kagagerak eebe nogo mbininogo yoruwak nduk, wiiragagerak. Wiiragagerak owagam mi'nari unggwogo mbareegwa,

Ndaniyen 5:7

Eeke logonet, aap endagembogut nogo it aap inagugi nen yorogwe iinok yoraga inom, laaluguragan pekkenok yaga inom, it tili pagangga inom, it yi wone ndi wone alom yelok kaga o Mbaben mendek abok wiiragagerak wogo mbareegwa, yorage logonet, “Kit ambi nen wone liiru mbanak yi, lunggo logomonggotik, Alom yogop nduk liiru mbanak o, yinuk, yo'nugwi kiinok, yum maa'ngga anggup kunik at yippege, iinggen mbuti emas mendaarak enggaanok me yippege, eeke logominggirik, an nabu'me piinok wone lengganogo yorage minggim nineebe mbere tiyanak niigak at ninabu'me tiyanak logonet, ninom wone lengganogo yorogo logowok nduk, mippigin o,” yinuk, yoragagerak.

Matiyut 2:4

Wake mbareegi, at Keroret nogo nen it Yakuri mendek inogobamini Ala unde inoweewi inom, it Ala wone liiru mbanak unde inom, abok aret kuwak eeppiige nagagerik, “At Ala nen leenogo mippereegerak Mesias nogo, o nggeeme nda'narigin liiru mbanak kogo monggotak o?” yinuk,

1 Tamuwen 5:8

Yogo nogogwaarik, aakumi Pilitin mendek inoweewi inendagembogut woraawak nduk, wiirogogwaarak kuwak ari wogo mbareegwa, wone yorogo logonet, “Iterali inogoba Ala aloobut mbanak yi, nonggop eeruwok o?” Yogo mbareegwa, it aap inendagembogut nogo nen yorogo logonet, “Aakumi Iterali inogoba Ala aloobut mbanak yi, o Nggat aret pi nanip o.” Yorogo mbareegwa, Aliku ALA aloobut mbanak nogo o Nggat aret pi nogogwaarak.

1 Tamuwen 6:1

At Aliku ALA aloobut mbanak aakumi Pilitin iname wonage kagak, tut 7 penengge mbareegi,