1 Tamuwen 3:1 - Ala Wone Peenok Peebi Mbanak

¹ At wulaga Tamuwen nogo awo tawe kagak, Eli abu'me logonet, Aliku ALA eyabu eeke nagagerak. At eyabu eeke ti eyom paga at Aliku ALA nen oone paga inom, inabinggaanggo paga inom, ne ambiriluk mban yorage nagagerak.

1 Tamuwen 3:1 Iomraidhean Croise

Ndawi 74:9

Ti eekwi iigak aret kwe, Nit nineenu agak ninigen kogwe, Aap Ala yorage kagak yo'niraga nen, “Yogop o,” yinuk, yo'nirogwe konenggwi, Eeka'lek niigak, Ne mande ari nagin nogo nit abok nineenggo'lek ogoorik o.

Kini Wuppiige 29:18

Ala nen wone yorage kagak yoraga inenggela'me lek iinok, aakumi mak eerak logonet, ugun-ugun eerit nugu menggaarak kwe, Eeko logorak wone yugu yoragaatak liirogon porogo wonogwe iinok perak, inale'nggen aret wonogo menggaarak.

Yetaya 13:12

Mbuti emas at mendek mban eerak ti, mbuuluk aret wonage kwe, Aakumi ineebe ti, abu lek ambitak negen teppiige, Ndi, mbuti emas o Opit mendek ti, mbuura'luk wonage kwe, Aakumi ineebe perak, abunuk mbuura'luk mban inili eerogo piige, Eerigin o.

Yetikiyen 7:26

Aaninggin-paaninggin eeppiya wagak mban eeke, Ndogop eeppinagi woraagun o, yinuk, yora wagak mban eekwi, eekwi iinok, Ala yorage kagak yoraga nen inabi paga yo'niraawak, mbakwi, Ala unde nen eeko logorak wone mamunniraawak o, yinuk, yogwe, ndi, Ninoweewi nen wone kini wuppinanuwak o, yogwe, eeremenggaarak kwe, lek aret kaagun o.

1 Tamuwen 2:11

Eeke mbareegi, at Elakana akuwi-apurilogwe inom o Arama iniyokan nogwe iigak kwe, at Tamuwen nogo perak, aap Ala unde Eli abu'me logonet, at Aliku ALA enggaanom paga eeke nagagerak.

1 Tamuwen 2:18

Togop aret eekwi iigak kwe, Tamuwen nogo perak, wulaga awo mbuuluk kagak ayum ligi yawenak amuni mbanak paga penggaarak agale warak epod nogo yippunuk, Ala alut eeko menggam awooliya wurik me ake eeke nagagerak.

1 Tamuwen 2:35

Aap ambi nen an eeriyak mbake inom, niniki koongge inom, neebe unde logonet, mondok liippunuk, ndak-ndak eeke logowak nduk, leenogo mippatigin o. Mippake logominggirik, at apuri wiganak wogoriminggirak mondok nu'lek logonet, at ambi leenogo amburu eerogo punuk, mippigin nogo, enggaanom mondok-mondok ake eeke logogin o.

1 Tamuwen 2:36

Ti eeke neenok, at apuri wiganak ineenik wonogwe nen aap mippigin nogo, owagam wogo logomenggaarik, inendobanggun yindumbunuk, Ai, ninogoba. Nit mbi abu me, wu a, mbi a, kolaawok nduk, aap Ala unde ineyabu ambi eeriyak yo'niret o, yinuk, yori wagak eeko logogun, yegerak o, yinuk, yokkigi o,” yoreegerak.

1 Tamuwen 3:15

Yoge mbareegi, Tamuwen ambinom nogo yege menggim windak wonage kagak, o weege mbareegi, Aliku ALA alut eeko menggam awooliya wurik me tungga paarogo punuk, Ala nen abinggaanggo paga yoreegerak nogo agabiti nen Eli yori naga'lek wonage me,

1 Tamuwen 3:21

Ndi, at Aliku ALA nogo nen o Tilo taati eebe nikka wagak eeke logonet, Tamuwen imbirak wone mbanggo nogogwaarak paga, “Ala ndogop o,” yinuk, eenu agagerak o. Ndi, at Tamuwen wone ari nogo it aakumi Iterali mendek abok aret konenggo nogogwaarak.