1 Tamuwen 20:8 - Ala Wone Peenok Peebi Mbanak

⁸ Togop aret me, Aliku ALA enggaanom paga an kayeloman nimbirak wone koonogo pogoorak me, an maluk ambi eekirak noba wonage kenok, wo'neren kogoba wonage me, pani noorak lek o. Ata, nabuwa mba'nuk, kat nen aret noorogo panumunggun o.”

1 Tamuwen 20:8 Iomraidhean Croise

Wakkagagerak 24:49

Yorage nagagerik, “Togop me, noreewi o. Yogondak kit nen an nogoba Abarakam abuwa nen wone yegerak nogo, Liirogon aret koonogo eeruwi, mbakwi kenok, wone nggaruk togon aret yo'ninip o. Ndi, lek mbakwi kenok togon yo'ninip o. Neenu age logominggirik, nena agigan age, ogugan age, eerikit nduk, yo'niriyak o.”

Wakkagagerak 47:29

At Yakup nogo kambuurak eyom panggo yi wage mbareegi, at aput Yutup nogo wiireegerak wage mbareegi, yoge logonet, “Kat nabuwa nen keenggi an nogo'nep me pi'nake logonet, Nogoba kat kangge keenok, kabuwa nen an abet aret o Metit yime nggween taambagagin lek o.

2 Tamuwen 14:32

Yoge mbareegi, at Abatalom nen Yowap yoge, “An wone yokkege me, karuk logot. An o Nggetut time op aret wonage me, yime nano eeriyak nduk, wo'neren wagandak? Aap endagembogut yori nanok nduk, Woraayok o, yinuk, eerogo nappigirak kwe, kat nonggop nduk woroolik? An nen aap endagembogut Ndawut pekka naakit o. Pekka nage neenok, an maluk ambi eekirak paga nooriyak mbake kenok, nooriyak op aret o,” yinuk, yoreegerak.

1 Mbinineegwaarak 12:17

at Ndawut iya wungge nagagerik, it yorage logonet, “Kit yeenggwa niruwok nduk, kiniki abu abe paga an neya wogwe kiinok, niyo'me ari woroorak op aret kwe, an maluk ambi eeka'lek kagak nggaganagalo negen eekkoloorak nduk, wogotak kenok perak, ninogoba Ala eenu aret me, at aret onggo eeppinagage kaamunggup o.”

Ndawi 116:11

“Nonggop eeri?” mbake logonet, “It aakumi abok ti, pilit pugungga aret o,” ari, Eekirak o.

Kini Wuppiige 3:3

Kat Ala kiniki kunik eeke, At oone yugu nogo liirogon mugurok nage, Eeke nogo Kat nen mbo puurak mage o. Ata, kagiinggen kwak kenggaanok me yikkolage, Kinikime liiru negen mbanogo pake, Eeke logot o.

Nappiigak 25:11

Maluk eekwi iinok, inooko menggaarak nogo mendek ambi abet aret eekirak kenok ti, nooriyak op aret kwe, noba lek kagak yo'nugwi me, it nooruwak nduk, neebe wogoroorak kit nen ambi yuurak mondok lek aret o. At Kayitat nen mban nawone amburu mbanuwak o,” yoreegerak.

Yotuwa 2:14

Yorage mbareegi, aap mbere nogo nen kwe nogo yogo logonet, “Nit kinili yogwe me ninookwi iinok, nit kit kinake kambuurak op aret o. Ndi, nit eeruwok nduk wogoorak nogo perak, aakumi mondok yoraga'lek puk aret wonage keenok, Aliku ALA nen o yi wo'nirage nogo eyom paga kinabuwa nen yokkogoorak yi, a'me lik yuwak nduk, abet aret kinili yogo logogun o.”

Yotuwa 22:22

“At mondok omaawi menggerak ti, at Aliku ALA alik aret o. At mondok omaawi menggerak ti, at Aliku ALA alik aret o. Nit eekoorak at Aliku ALA eenu aret me, nit Aliku ALA wone taganogo punuk, niniki worokot logonet, nineebi kinombakwi, at Aliku ALA nineebi ombakwi, eeppunuk, yi eekoorak kenok, Aliku ALA nen ninili yuurak lek kit nen ninooriyak op aret o.

Urut 1:8

kwe Nawomi nogo nen eenggelomini nogo yorage logonet, “Kit kinalitak aret kiname kinagalomini-kinogobamini iya nanip o. Iya namonggotak wonogwe kiigak, kit kinogonggelomini kanggaarak nogo obeelom eeppiigwi, ndi, an kunduk, obeelom eeppanugwi, eeko nogotak nogo ndak-ndak at Aliku ALA kinabuwa nen obeelom eeppinagage, ndi, kinogonggelomini wokkiramenggerak kinom obeelom aret logomunggup nduk, eeppinagage, eeke logowak o.” Yorage nagagerik, inagandin eyak mbaninake mbareegi, it kumi nogo inoone nggwok paga le yogo logonet,

1 Tamuwen 18:1

At Ndawut nogo Tawun imbirak wone abu aret mbanggo mbareegwa, Yonatan nen at iniki kunik eekkolage menggi kwak, Ndawut nogo togop aret iniki kunik eeke nagagerik, imbirak iniki ambit aret eekkologogwaarak.

1 Tamuwen 18:3

Teppereegerak imbirak wonage me, at Yonatan nogo nen at iniki kunik eekkolage menggi kwak, Ndawut nogo togop aret iniki kunik eeke logonet, “Kat an nimbirak niniki-kiniki kunik logowok o,” yinuk, wone mondok abuk nggaruk togon kumbuk mbanogo pereegwaarak.

1 Tamuwen 20:16

Yoreegerak ti paga Ndawut apuri-ombowologwe nen at Yonatan ili yogo logowak nduk, at Yonatan nen Ndawut yoge logonet, “Wone yogoorak yi, taganogo punuk, an nenggaawak lek eerogo panugwi iinok, Aliku ALA nen kat kawim eeppiyamenggerak paga namee'nggo kat aret maluk eeppagago logowak o,” yinuk, wone abuk nggaruk togon mbanogo pereegwaarak.

1 Tamuwen 20:9

Yoge mbareegi, Yonatan nen, “Yagandak ti, togop abu lek o. An nogoba nen kat maluk eeppagarak koonggerak nogo neenu logonetak en, kat yokkenetak lek mbaken?”

1 Tamuwen 23:18

Yoge nagagerik, at Ndawut imbirak at Aliku ALA enggaanom paga wone abuk nggaruk togon kumbuk mbanggo nogogwaarik, at Ndawut o Korep time wonage kagak, Yonatan nogo ame aret wagagerak.