PANGARATAION 9:3 - BIBEL JAMITA NA DENGGAN

³ Tapi anggo saonnari idaonmunu sandiri ma sanga na bia Tuhan Debatamunu mardalan di jolomunu songon api na manyurbu. TaluhononNia ma halahi di jolo ni matamunu, gabe tarpaorot jana tarpusa hamu tibu halahi, songon na dung dijanjihon Tuhan.

PANGARATAION 9:3 Iomraidhean Croise

HARURUAR 23:23

Joloanan ni surusuruanKi ma hamu jana obanonnia hamu tu luat ni halak Amori, halak Het, halak Peris, halak Kanaan, halak Hewi dohot halak Jebus, jana haromkononKu ma halahi sude.

JESAYA 27:4

Nada muruk be Au sanga na biraraon. Sugari pe laing adong duhut sanga sihupi, Au noma torus mamorangi abis ma i sudena Hututungi.

JESAYA 30:27

Tarida do sian na dao kuaso dohot hagodangan ni Tuhan. Api dohot timus patuduhon rimas ni rohaNia. Mandok hata Ia, jana angka hataNia i manutung songon api.

JESAYA 30:30

Patubegehonon ni Tuhan ma soraNia na tongam i jana ganop halak hilalaonna ma hamuruhonNia na sogen i. ParoonNia ma api na mangabiskon, udan potir, ambolas dohot bade.

JESAYA 30:33

Mamungka sian narobi na dung diparade hian do api baen panutung ni raja Asur. Bagas jana lumbang do inganan i na marisi soban martinggang-tinggang. Ombuskonon ni Tuhan ma hosaNia laho pagarahon api i.

JESAYA 33:14

Humitir hara ni biarna angka halak pardosa na di Sion. Didok halahi, “Adong dope he sian hita na tahan di bagasan api na mangabiskon on? Adong dope he na tarbaen manahan di api na manongtong i?”

MIKA 2:13

BukaonKu ma dalan jana obanonKu hamu haruar sian habuangan. Onjarkononmunu ma angka pintu ni horbangan jana kehe ma hamu so adong mangambat. Au Tuhan, Au sandiri Rajamunu, jana Au manguluhon hamu haruar.”

MATEUS 15:10

Dung i dipio Jesus ma halahi jana didok Ia ma tu halahi. Didok Ia ma tu halahi, “Tangihon hamu ma jolo! Tangkas parrohahon hamu!

MARKUS 7:14

Dung i dipiohon Jesus ma sanoli nari halak na bahat i. Didok Ia ma tu halahi, “Hamu sude, tangihon hamu ma na Hudok on! Astui hamu ma!

SURAT NI SI PAULUS TU PARLAGUTAN ROM 8:31

Aha ma he tardok hita taringot tu sudena i? Muda Debata donganta, ise ma he tarbaen mangalo hita?

EPESUS 5:17

Ulang hamu maoto, tapi sihiri hamu ma sanga aha giot ni Tuhan i sibaenonmunu.

PANGARATAION 1:30

Tuhan Debatamunu do mamimpin hamu dohot marporang humopkop hamu songon na dung niidamunu sandiri di Mesir

PANGARATAION 20:1

“Muda kehe hamu marporang mangalo angka musumunu, ulang hamu mabiar mida kareta dohot kudo ni halahi na bahat bope na umbahat bilanganna sian hamu. Tuhan Debatamunu do paluahon hamu sian Mesir, laing Ia do mandongani hamu.

PANGARATAION 20:4

Kehe do Tuhan Debatamunu mandongani hamu jana lehenonNia do hamonangan di hamu.’

PANGARATAION 4:24

dibaen songon api do Tuhan Debatamunu i na mamosokkon; nada ra Ia padiarkon adong imbangNia.

PANGARATAION 7:16

Sandok bangso na nipasahat ni Tuhan Debatamu tu bagasan kuasomunu, siabiskononmunu do sudena i; ulang patuduhon hamu ibo ni roha tu halahi. Ulang somba hamu angka debata ni halahi, dibaen na mangalapi hamatean tu dirimunu do pangalaho na songon i.

PANGARATAION 7:22

PaorotonNa muli-muli abis angka bangso i di jolo ni matamunu. Nada tarbaen hamu mamusa halahi anggo sanoli mangabisi, anso ulang martamba bahat ni binatang panyoro na gabe parmaraan na mangondam tu hamu.

PANGARATAION 9:6

Pos ma rohamunu, nada dipasahat Tuhan tano napu i tu hamu hara ni na tumbuk hamu manjagit. Nada! Bangso sijogal rungkung do hamu.

2 TESSALONIKA 1:8

bope dohot api na marnyala-nyala. Laho manguhumi halak na so mananda Debata, dohot angka na so mangoloi Jamita Na Denggan taringot tu Jesus Tuhanta i do umbaen na mijur Ia.

IBRANI 12:29

Angke songon api na mangabiskon do tutu anggo Debatanta i.

JOSUA 11:12

Dirampas si Josua ma angka kota i sudena. Ditangkupi rajana i lalu dibunu, hombar tu parenta ni si Musa, naposo ni Tuhan i.

JOSUA 11:8

Jana Tuhan do mambaen monang halak Israel maralohon halahi. Diporangi halak Israel halahi lalu dikojar lopus tu tongtang ni Misrefot Maim dohot Sidon di Utara, jana lopus tu Rura Mispa di Habincaran. Torus do jebu parporangan i lopus nada adong be na tinggal sian musu i. Umpe sahalak – mate sude.

JOSUA 14:12

Antong, saonnari lehen ma luat na mardolok-dolok na dijanjihon ni Tuhan i tu au di hatiha na mulak au mangalehen barita dohot angka halak na rap dohot au i. Di hatiha i hami paboa do tu ho, bahaso na adong disi bangso raksasa na margoar bangso Enak i. Maringanan di angka kota na godang-godang jana na martembok do halahi. Betak na donganan ni Tuhan do au, gabe bolas usironku halahi morot songon na nidok ni Tuhan i.”

JOSUA 3:11

di na taripar Poti Parjanjian ni Tuhan ni sandok portibi on manjoloi hamu.

JOSUA 3:14

Hatiha manyabi do hatiha i, jana somal do magodang Batang aek Jordan i. Di na kehe halak Israel i manadingkon parbandaran ni halahi laho manaripari Batang aek Jordan i, parjolo ma angka malim mardalan lalu maroban Poti Parjanjian i. Jana disi didegehon halahi pat ni halahi tu batang aek i,

HAKIM-HAKIM 4:14

Dung i ninna si Debora ma tu si Barak, “Tole bo, maju ma! Tuhan ma mamimpin ho. Di ari on ma dilehen ia hamonangan di ho maralohon si Sisera.” Jadi manuat ma si Barak sian Dolok Tabor rap dohot dongannia sisampulu ribu halak i,