PANGARATAION 7:8 - BIBEL JAMITA NA DENGGAN

⁸ Tapi dihaholongi Tuhan do hamu jana giotNia do manggohi janji na nibaenNia dohot ompumunu. I ma dalanna umbaen na dipalua Ia hamu mardongan kuaso na godang, jana dipalua Ia hamu sian parhatobanan, sian kuaso ni raja ni Mesir.

PANGARATAION 7:8 Iomraidhean Croise

PAMUNGKAAN 19:16

Ganggu dope si Lot. Tapi ibo ma roha ni Tuhan mida ia; jadi gabe ditogu tamu na dua i ma si Lot dohot daborunia dohot borunia na dua i, dioban ma halahi tu ruar ni kota i.

PAMUNGKAAN 19:29

Songon i ma di na niabiskon ni Debata angka kota na di rura na niinganan ni si Lot i, diingot Debata do si Abraham jana ditolong Ia do si Lot paluahon dirina.

2 SAMUEL 22:20

Ditolong Ia au haruar sian mara dibaen tu au naposoNa, holong ni rohaNia.

1 RAJA-RAJA 10:9

Sipujion do Tuhan, Debatamu! Diangkat Ia antong tuan i gabe raja ni Israel, i ma tandana na jop roha ni Tuhan maradopkon tuan i. Nada marnamantak Ia mangkaholongi Israel, hara ni i ma umbaen na diangkat Ia tuan i gabe raja ni halahi, anso laing tarpatulus tuan i manjongjongkon tona dohot hatigoran.”

1 JUJUR TAON 16:16

Dohot si Abraham do dibaen Ia janji i, tapi dohot do tu si Ishak,

2 JUJUR TAON 9:8

Nipuji ma Tuhan, Debata ni tuan i! Di na niangkatNa tuan i gabe raja ni Israel, na patuduhon sanga songon dia sonang ni roha ni Tuhan i tu tuan i. Nada marnamantak Ia antong manghaholongi bangso Israel; i do umbaen na niangkatNia tuan i gabe raja ni halahi, anso tarhajongjongkon tuan i uhum dohot hatigoran.”

MASMUR 105:42

Dibaen ingot do Tuhan di janjiNia na nibaenNa dohot si Abraham, naposoNia.

MASMUR 44:3

Diingani halahi pe tano i nada i hara ni podang; nada hara ni gogona sandiri halahi umbaen na monang, tapi hara ni kuaso dohot sinondang ni bohiMu, na patandahon holong ni rohaMu maradopkon bangsoMu.

MASMUR 44:4

Ho do Debatangku dohot Rajangku, na mangalehen hamonangan di si Jakob.

HARURUAR 13:14

Muda disapai anakmu di pudian ni ari sanga aha astuan ni pesta on, angkon alusanmunu songon on, ‘Marhite hagodangan ni kuaso ni Tuhan do, na maroban hita ruar sian Mesir inganan parhatobananta i.

HARURUAR 13:3

Didok si Musa ma tu halak Israel, “Ingot hamu ma ari on ari haruruarmunu sian Mesir inganan parhatobanonmunu. On ma arina Tuhan paluahon hamu marhite kuasoNia na godang i. Ulang pangan hamu roti na marragi.

HARURUAR 20:2

“Au do Tuhan Debatamu, na maroban ho ruar sian tano Mesir, sian tano parhatobanan i.

HARURUAR 32:13

Ingot ma si Abraham, si Ishak dohot si Israel naposoMi, angke madung marsumpa hian do Ho tu halahi mangasahon diriMu sandiri di na nidokMu tu halahi: BaenonKu ma pomparanMu sabahat ni bintang na di langit, jana sude tano na dung Hujanjihon on lehenonKu ma i tu pomparanmu, anso gabe halahi nampunasa salolot-lolotna.”

HARURUAR 6:6

Jadi baen ma boa-boa tu bangso Israel, bahaso madung Hudok tu halahi: ‘Au do Tuhan; sai na urupanKu do hamu jana paluaonKu sian parhatobanon ni bangso Mesir i. SurduhononKu tanganKu na gogo i mandabu uhum na dokdok tu bangso Mesir, jana paluaonKu hamu.

JESAYA 43:4

Arga do ho Huida, Huhaholongi do ho jana Hubaen marmulia; gabe Hubaen angka jolma baen gontimu, jana angka bangso gonti ni hosamu.

JESAYA 63:9

sian sude hasusaan ni halahi. Nada tongoson ni Tuhan suruan sanga duta, Ia sandiri do paluahon halahi. Sian narobi do dipature-ture Ia halahi hara ni holong dohot ibo ni rohaNia.

JEREMIA 31:3

Hupatidahon do diringKu sian na dao tu halahi. O ale bangso Israel, sian najolo do sai holong rohangKu mida hamu, jana laing torus do tu joloan on giot patuduhononKu na holong rohangKu mida hamu.

JEHESKIEL 36:22

Jadi hara ni i, palalu ma sanga aha na Hudok, Au Tuhan Debata mandok tu halak Israel, ‘Sanga aha na giot baenonKu sanoli on, nada hara ni hamu, ale angka halak Israel, tapi hara ni goarKu na badia i do, na nipahodarmu sanga na tu dia pe hamu kehe.

MIKA 6:4

Madung Huoban hamu haruar sian Mesir, jana Hupalua sian parhatobanan; Husuru do si Musa, si Harun dohot si Miryam laho mamimpin hamu.”

MIKA 7:20

PatuduhononMu ma tu bangsoMu pomparan ni si Abraham dohot si Jakob habonaranMu dohot holong ni rohaMu na so marparsuhatan i songon na nijanjihonMu tu ompunami narobi.

ZEPANYA 3:17

Diondihon Tuhan Debatamunu na gogo i do hamu. Hara ni gogo ni kuasoNia, monang hamu. Marmoga-moga Tuhan jana marjop ni roha hara ni hamu, di bagasan holong ni rohaNa dilehen Ia di hamu ngolu na imbaru. Hara ni hamu marende ma Ia jana marjop ni roha hara ni hamu,

MALEAKI 1:2

Didok Tuhan ma tu bangsoNia, “Sian najolo do Huhaholongi hamu.” Tapi dialusi halahi do, “Bia ma he dibaen Ho manghaholongi hami?” Dialusi Tuhan ma, “Nada he martinadohon si Esau dohot si Jakob? Huhaholongi do si Jakob dohot pomparanna,

MATEUS 11:26

Olo, Amang, dibaen na songon i do hagiot ni rohaMu.”

LUKAS 1:55

I ma janji na patuduhon haburjuonNia tu si Abraham dohot tu sude pomparannia sapanjangna.”

SURAT NI SI PAULUS TU PARLAGUTAN ROM 11:28

Mangihutkon Jamita Na Denggan i, musu do halahi hara ni hamu, tapi mangihutkon pamilion i haholongan do halahi hara ni angka ompu i.

PANGARATAION 1:8

Ingot ma; Au do Tuhan na dung manjanjihon sude tano i tu ompumunu si Abraham, si Ishak dohot si Jakob maradu tu pomparan ni halahi. Antong, kehe ma hamu, jana ingani hamu ma luat i.’ ”

PANGARATAION 10:15

Songon i ma godang ni holong ni roha ni Tuhan mida ompumunu, gabe hamu ma na nipiliNia jana nada bangso na asing jana lopus tu saonnari pe laing hamu do na tarpili gabe bangsoNia.

PANGARATAION 23:6

Salolot marrumangkon sada bangso hamu, ulang dicubo-cubo hamu mangurupi angka bangso i sanga mambaen sonang halahi.

PANGARATAION 33:3

Dihaholongi Tuhan do bangsoNa dijagohon Ia do nampunaNia. Manungkap ma hita di jolo ni patNia mangoloi angka parentaNa.

PANGARATAION 4:20

Tapi anggo hamu bangso na nipaluaNia do sian Mesir, inganan liang bosi di hamu. Dioban Ia do hamu haruar sian luat i, anso gabe bangsoNia sandiri, songon na masa di hamu saonnari.

PANGARATAION 4:34

Jungada ma he adong sada debata na puluk mambuat sada bangso sian bangso na asing lalu mambaen halahi bangsonia sandiri, songon na nibaen ni Tuhan Debatamunu di hamu di Mesir? Diida hamu sandiri do sanga songon dia godang ni hagogoon ni Debata parohon parmaraan dohot porang, mambaen angka hahomangan dohot patuluskon angka pangalaho na jorbut.

PANGARATAION 4:37

Hara ni na holong rohaNia di ompumunu, madung ditodo Ia hamu; mardongan godang ni kuasoNia, madung dioban Ia hamu ruar sian Mesir.

PANGARATAION 5:6

Ninna Debata ma, ‘Au do Tuhan Debatamu, na maroban hamu ruar sian tano Mesir, sian inganan parhatobanan i.

1 JOHANNES 4:19

Marholong ni roha pe hita, hara ni na dung parjolo do Debata mangkaholongi hita.

1 SAMUEL 12:22

Madung disumpahon Tuhan bahaso na so tadingkononNia hamu angke madung diputuskon Ia do laho mambaen hamu gabe bangsoNia sandiri.