PANGARATAION 17:2 - BIBEL JAMITA NA DENGGAN

² Muda dibege hamu isarana adong di sada sian hutamunu piga-piga halaklahi sanga dadaboru na mardosa tu Tuhan jana na mangalanggar janjinia

PANGARATAION 17:2 Iomraidhean Croise

2 RAJA-RAJA 18:12

Madabu pe Samaria, hara ni na so mangoloi do angka halak Israel tu Tuhan, Debata ni halahi, digagai halahi parjanjian na nibaen ni Tuhan dohot halahi jana dilanggar halahi sude parenta ni si Musa naposo ni Tuhan i. Nada ra halahi manangihon dohot mangoloi.

2 RAJA-RAJA 21:3

Angka inganan pamelean ni gana-ganaan na dung disegohon ni amangnia si Hiskia, dipajongjong ia mangulahi. Dipajongjong ia angka langgatan anso marsomba tu Baal, jana dipambaeni ia angka patung ni Dewi Asera, songon na nibaen ni si Ahab raja ni Israel i. Laing disomba si Manase muse do angka bintang.

JOB 31:28

Dosa na songon i patut do simatehonon; angke Debata Na Markuaso i madung disoadahon.

HARURUAR 22:19

Ganop na marcampur dohot binatang, angkon bunuon.

HARURUAR 22:20

Sanga ise na pasahat haul sanga tu debata dia pe i asing sian Au Tuhan, angkon mate niuhuman.

JEREMIA 31:32

Tapi nada sarupa parjanjian i dohot parjanjian na Hubaen tu ompu ni halahi di na Hutogu halahi haruar sian Mesir. Haru pe Au songon halaklahi ni halahi, tapi digagai halahi do parjanjianKu dohot halahi.

JEREMIA 34:18

Madung mambaen parjanjian tu Au angka pangituai ni Juda dohot Jerusalem rap dohot angka pagawe ni bagas godang, angka malim dohot sandok pamimpinna. Disambol do lombu laho mangarasmihon parjanjian i, diponggol dua ma lombu i jana mamolus ma sian antara ni ponggolanna na dua i. Hape dilaosi halahi muse do parjanjian i jana nada digohi halahi angka saratna. Hara ni i baenonKu ma tu halahi songon na nibaen ni halahi tu lombu i.

JEHESKIEL 16:38

UhumanKu do ho hara ni parhamainan dohot pamunuon na nibaenmi. Mate ma ho uhumanKu di bagasan muruk dohot rimasKu.

HOSEA 6:7

Tapi songon si Adam, digagai hamu do janjimunu dohot Au.

HOSEA 8:1

Didok Tuhan ma, “Palu ma sarune, paboa na ro parmaraan! Tudos tu halihi na manangkup soroanna do musu ro mamorangi tanongKi! Dilaosi bangsongKi do parjanjianKu dohot halahi jana dialo angka pangajaranKu.

HAMALIMON 20:2

mandok hata on tu bangso Israel, “Sanga ise sian tonga-tongamunu, sanga halak na leban na tinggal rap dohot hamu, mangalehen anakna gabe pangoloi di Debata Molok, angkon dangguran ni halak na bahat do i dohot batu lopus mate.

HAMALIMON 26:15

Muda dilanggar hamu janji na Hubaen dohot hamu jana nada ra hamu mangoloi angka aturan na sian Au dohot parentangKu,

HAMALIMON 26:25

ParoonKu ma parporangan laho manguhum hamu, angke madung dilaosi hamu aturanKu, dung i muda marlagut hamu di kotamunu manjalahi paronding-ondingan, paroonKu ma tu hamu nyae na so haubatan gabe tunduk hamu tu musumunu.

PANGARATAION 17:5

angkon toguon do parjahat i tu balian ni kota jana nidangguran dohot batu lopus mate.

PANGARATAION 29:18

Jadi, jago ma hamu, anso ulang jabat adong sahalak pe sian tonga-tongamunu, halaklahi sanga dadaboru, marsasaripe sanga marga na jongjong dison na marbalik sian Tuhan Debatanta laho marsomba tu angka debata ni bangso na asing i. Tudos do pangalaho na songon i tu urat na tubu gabe suan-suanan na paet boti halalango.

PANGARATAION 29:25

Jana songon on ma alusna, ‘Hara ni na marbalik do bangso ni Tuhan i sian parjanjian na nibaen ni halahi dohot Tuhan, Debata ni ompu ni halahi, di na niobanNia halahi ruar sian Mesir.

PANGARATAION 31:20

ObanonKu ma halahi tu tano na napu jana na marlobian susu dohot madu, songon na dung Hujanjihon tu ompu ni halahi. Dapot halahi ma disi sipanganon na porlu di halahi jana mangolu di bagasan sonang ma halahi. Tapi di pudian ni ari marbalik ma halahi jana marsomba tu angka debata na asing. Tulahon ni halahi ma Au jana gagaan ni halahi ma parjanjianKu,

PANGARATAION 4:23

Denggan ma paingot-ingot hamu! Ulang lupa hamu di parjanjian na nibaen ni Tuhan Debatamunu dohot hamu. Oloi hamu ma parentaNia; ulang baen hamu di hamu sandiri patung na gabe sisombaon sanga na bia pe rupana,

IBRANI 10:28

Sanga ise na so burju mangoloi angka Tona Ni Debata na nipasahat ni si Musa, nimatehon sajo do i nada adong ampunan, muda tardapot ia marsala disaksihon dua sanga tolu halak.

JOSUA 23:16

Muda dilanggar hamu pudun-pudun ni parjanjian antara ni Tuhan dohot hamu, gabe kehe hamu mangoloi dohot marsomba tu angka debata na asing, gabe muruk ma Tuhan jana hona uhumanNa ma hamu. Jana nada jabat sadia honok nari dung i, nada adong be umpe sahalak na tinggal sian hamu di tano na denggan on, na nilehen ni Tuhan di hamu.”

JOSUA 7:11

Na mardosa do halak Israel. Madung Huparentahon tu halahi laho mangoloi parjanjian antara ni halahi dohot Au hape dilaosi halahi do i! Angka barang-barang sironcohononkon pe laing adong do dibuat halahi. Ditangko jana dibunihon halahi do i di antara ni barang-barang ni halahi, jana dipaula so diboto halahi ma i!

JOSUA 7:15

Dung i halak na hutudu jana torang manyimpan angka barang na so tola i, angkon ditutung abis rap dohot sude dongan sabagasna maradu sude sinadonganna; angka i ma halakna na mangalaosi Poti Parjanjian ni Tuhan i jana na parohon habilean na godang tu halak Israel.”

HAKIM-HAKIM 2:20

Patunda ni i gabe sun ma muruk ni Tuhan tu Israel, jana didok ma, “Madung Huparentahon tu angka ompung ni bangso on anso ditiopsa parjanjian antara Au dohot halahi. Hape digotapkon bangso on do pudun-pudun ni janji i; dilanggar halahi do parentangKu.

HAKIM-HAKIM 6:31

Tapi dialusi si Joas ma tu angka na mangalap-alapi i tusia, “Di pihak ni Baal dehe hamu? Na giot mambela ia do hamu? Ise na di pihaknia, bunuon ma sadari on! Anggo Baal do antong Debata, padiar ma ia sandiri mambela dirinia, angke langgatannia do na dirorak i.”