NEHEMIA 5:19 - BIBEL JAMITA NA DENGGAN

¹⁹ Pangidoanku ale Debata, ingot ma sasude na dung hubaen i di bangso on jana pasupasu ma au.”

NEHEMIA 5:19 Iomraidhean Croise

PAMUNGKAAN 40:14

Tapi pangidoanku, ingot au muda dung denggan ngolumu sanoli on. Ibo rohamu mida au, jana palalu ma antong pardangolankon tu raja i, jana laing pangidohon ma da anso dipalua ia au sian hurungan on.

2 RAJA-RAJA 20:3

“Tuhan, ingot ma na dung huoloi Ho sian burju dohot situtu ni rohangku. Sai hugogo do anso hupatulus hagiotMu.” Lalu mangangguk ma si Hiskia.

NEHEMIA 13:14

Ale Debatangku, ingot ma sude na dung hubaen tu BagasMu dohot tu na mangoloi disi.

NEHEMIA 13:22

Jadi husuru ma angka halak Levi patupahon upacara paiaskon diri dohot manjago angka pintu horbangan laho mangawasi anso dipasangap halak Ari Sabat i. Martangiang ma au, “Ale Debatangku laing ingot ma au hara ni pangalahongki jana ibo ma rohaMu di au hombar tu godang ni holong ni rohaMu.”

NEHEMIA 13:31

Laing huatur muse ma anso rade dibaen rayat i soban sipakeon tu parhaulan di hatiha na tontu jana dioban haul sian suha ni gandum na parjolo malamun. Ujungna martangiang ma au, “Debatangku, ingot ma sudena on jana ibo ma rohaMu mida au.”

MASMUR 106:4

Ingot ma au ale Tuhan, muda diurupi Ho bangsoMi, tolong ma au muda dipalua Ho halahi.

MASMUR 40:17

Na gale do au on jana na pogos, ale Tuhan, hape diparrohahon Ho do au. Ho do na mangurupi dohot na paluahon au, tibu ma Ho ro, ale Debatangku!

JEREMIA 29:11

Nada he Au sandiri mamboto angka sangkapKu taringot tu hamu? Nada na giot mangago hamu angka sangkap i; tapi na giot tu hasonanganmunu do i dohot mangalehen tu hamu arop ni roha na denggan di hatiha na ro.

MATEUS 10:42

Sanga ise na mangalehen minum, hum samangkuk aek ngali pe tu sahalak sian angka na menek on hara ni siihutkon Au halahi, angkon dapotan balos do halahi. Songon i ma satutuna!”

MARKUS 9:41

Satutuna do! Sanga ise na mangalehen hamu minum hum hara ni na gabe siihutkon Kristus i hamu, angkon jagitonnia do upania.”