NEHEMIA 10:29 - BIBEL JAMITA NA DENGGAN

²⁹ Hami sude pasadahon dirinami dohot angka pamimpinnami jana hami sumpahon anso mangolu hami mangihutkon Uhum Ni Debata na nilehenna i marhite si Musa, naposoNa i. Sai diburai Debata ma hami muda nada hami patulus parjanjian on. Hami sumpahon ma na giot oloannami sandok parenta, uhum dohot paraturan ni Tuhan, Debatanami.

NEHEMIA 10:29 Iomraidhean Croise

2 RAJA-RAJA 23:3

Dung i dibaen raja i ma parjanjian dohot Tuhan anso burju mangoloi tuSia dohot mandalankon sian sandok roha dohot sandok ate-ate sude parenta dohot angka tonaNia jana gohanna ma aturan ni parjanjian ni Tuhan dohot bangsoNa na tarsurat di bagasan buku i. Dohot do sude rayat marjanji anso burju mangoloi parjanjian i.

1 JUJUR TAON 9:2

Na parjolo mulak sian halahi tu tano dohot kota ni halahi, i ma angka halak na bahat, angka malim, halak Levi dohot angka na markarejo di Bagas Ni Debata.

2 JUJUR TAON 34:31

Dung i dibaen raja i ma parjanjian tu Tuhan, paboa na oloannia ma Tuhan, jana dalankononnia sian sasude roha dohot tondinia sude parenta dohot angka uhumNia, jana gohannia sude aturan ni parjanjian tu Tuhan dohot bangsoNia na tarsurat di bagasan buku i.

2 JUJUR TAON 6:16

Laing dijanjihon Ho muse do tu damang, muda tutu do antong setia pomparannia mangoloi uhumMu laing songon ia i, gabe sai adong ma sada nian pomparannia na gabe raja di Israel. Saonnari ale Tuhan, Debata ni Israel, pangidoanku anso nian laing patulusonMu muse sudena na nijanjihonMu tu damang si Daud i.”

NEHEMIA 13:25

Hugorahon antong halahi jana huburai. Adong do na hubalbali jana hujangging obukna i, dung i husuru ma halahi marsumpa mangasahon goar ni Debata songon on: “Na so jadi lehenonmunu borumunu tu anak ni halahi, jana na so jadi alaponmunu boru ni halahi bahen dadaborumunu, sanga bahen dadaboru ni anakmunu sandiri!”

NEHEMIA 7:46

On ma daftar ni ripe sian horong ni angka parkarejo di Bagas Ni Tuhan na mulak sian habuangan: Ziha, Hasufa, Tabaot, Keros, Sia, Padon, Lebana, Hagaba, Salmai, Hanan, Gidel, Gahar, Reaya, Resin, Nekoda, Gasam, Usa, Paseah, Besai, Meunim, Nefusim, Bakbuk, Hakufa, Harhur, Baslit, Mehida, Harsa, Barkos, Sisera, Temah, Nesiah dohot Hatifa.

NEHEMIA 8:2

Jadi dioban si Esra ma buku i tu adopan ni na marlagut i, i ma angka halaklahi, dadaboru dohot angka dakdanak na impas godang laho mangastui.

NEHEMIA 8:3

Dung i dibasahon si Esra ma Uhum i tu halahi sian manyogot lopus arian. Sude do halahi manangihon sian situtu ni rohana.

NEHEMIA 9:38

Marharoroan sian sasude na masa i, mambaen parjanjian ma hami rayat Israel, parjanjian na togu jana tarsurat, dicap angka pamimpinnami, angka halak Levi dohot angka malimnami.

MASMUR 105:45

anso oloan ni halahi angka uhumNia jana ihutkononna parentaNia. Puji ma Tuhan!

MASMUR 119:106

Na hujanjihon mardongan sumpa gohanku ma i, haputusanMu na tigor i patulusonku do i.

MASMUR 8:1

O Tuhan, Tuhannami, tarbarita do kuasoMu di sude portibi! HagodanganMu lalu do tu banua ginjang di langit,

MASMUR 8:9

O Tuhan, Tuhannami, tarbarita do kuasoMu di sude portibi!

JESAYA 14:1

Giot asian ni Tuhan ma Israel bangsoNia i, jana manodo halahi mangulahi gabe nampunaNia. Giot baenonNia ma halahi mangulahi maringanan di tano ni halahi sandiri. Marroan ma halak na asing jana maringanan disi rap dohot halahi.

JEREMIA 26:4

Disuru Tuhan ma au mandok tu halahi, “Au Tuhan, madung mamarentahon anso mangoloi hamu tu Au jana angkon dalan – kononmunu do angka aturan na dung Hulehen tu hamu.

JEREMIA 34:15

Piga-piga ari na dung salpu dipauba hamu do pangalahomunu jana dibaen hamu jop ni rohangKu. Satuju do hamu sude laho paluahon angka hatoban sian donganmunu sabangso jana dibaen hamu do parjanjian i rap dohot Au di bagasan BagasKu.

JEHESKIEL 36:27

DuruskononKu ma tondingKi tu bagasan rohamunu jana sai jagoanKu ma hamu anso mardalan mangihutkon angka aturan na sian Au jana anso mangoloi di sude na Huparentahon.

HAMALIMON 20:26

Madung Hupaasing hamu sian angka bangso na asing, anso gabe hum Au sajo nampuna hamu. Angkon badia do hamu angke Au do Tuhan, jana na badia do Au.

MALEAKI 4:4

Ingot hamu ma angka Tona na niajarkon ni naposongKu si Musa, ingot hamu ma angka aturan dohot angka parenta na Hulehen tusia di Dolok Sinai na gabe sioloan ni sandok halak Israel.

BILANGAN 5:21

Tuhan ma mambaen goarmu gabe sada bura di tonga-tonga ni bangsomu, hesut ma hae-haemu jana busungon ma ho.

JOHANNES 1:17

Dibaen dilehen do Tona i markite-hite si Musa tapi anggo asi ni roha dohot hasintongan markite-hite Jesus Kristus do.

JOHANNES 15:14

Angka ale-alengKu ma hamu muda dikarejohon hamu sanga aha na Huparentahon tu hamu.

JOHANNES 7:19

Madung nian dilehen si Musa di hamu angka Parenta Ni Debata. Tapi sahalak pe sian hamu umpe adong na mangoloi angka Parenta i. Biasi ma he giot bunuonmunu Au?”

BAENON NI ANGKA RASUL 11:23

Jana dung lalu si Barnabas disi, diida ia ma sanga na bia pamasumasu ni Debata di halahi, gabe jop sajo ma rohania. Dung i dipaingot ia ma halahi anso tongtong marsihohot tu Tuhan i.

BAENON NI ANGKA RASUL 17:34

Tapi laing adong do antong sian halahi na mamihak tu si Paulus jana gabe porsaya tu Jesus. I ma angka si Dionisius anggota ni rapot Areopagus i, dohot sada dadaboru na margoar si Damaris rap dohot na asing i dope deba nari.

BAENON NI ANGKA RASUL 23:21

Tapi ulang ma dioloi tuan i pangidoan ni halahi i, angke adong do lobi opat pulu halak na dung martabuni laho mangadang ia di dalan i. Na dung marsumpa do halahi sude na so mangan sanga minum anggo so jolo dibunu halahi si Paulus. Jadi saonnari pe madung rade halahi; na hum paintehon alus sian tuan i sajo noma halahi.”

SURAT NI SI PAULUS TU PARLAGUTAN ROM 12:9

Ulang mangalancap-lancap holong ni roha i! Magigi ma hamu mida na jahat, parayak hamu ma na denggan.

PANGARATAION 33:4

Taoloi ma Tona Ni Tuhan na nilehen ni si Musa, i ma sinadongan ni bangso on na ummarga.

PANGARATAION 5:1

Dipalagut si Musa ma sude bangso Israel jana didok ia ma tu halahi, “Dongan sabangso, tangihon hamu ma sude aturan na giot silehenonku tu hamu sadari on. Parsiajari hamu ma angka aturan i jana haburjuhon hamu ma mangoloisa.

PANGARATAION 5:32

Angka dongan sabangso, burju be ma hamu mangoloi sasude na niparentahon ni Tuhan Debatamunu i tu hamu. Ulang adong sada pe sian angka parenta i langgar hamu.