NEHEMIA 1:5 - BIBEL JAMITA NA DENGGAN

⁵ “Ale Tuhan Debata na markuaso di banua ginjang Debata Na Godang do Ho, jana di bagasan gok biar do hami ro mangadop tu Ho. Sai tongtong do holong rohaMu di angka na mangkaholongi Ho jana na mangoloi parentaMu jana ditiop Ho do janjiMu tu halahi.

NEHEMIA 1:5 Iomraidhean Croise

1 RAJA-RAJA 8:23

lalu martangiang, “Ale Tuhan Debata ni Israel, di langit dohot di tano on, nada adong debata na songon Ho. Dipatulus Ho do janjiMu jana dipatidahon Ho do holongMu tu sude bangsoMu na sai burju jana mangoloi tu Ho sian nasa rohana.

1 JUJUR TAON 17:21

Jana di tano on sudena, nada adong sada bangso na songon bangso Israel. Hum sasada bangso Israel do bangso na nipaluaMu sian parhatobanan anso dibaen Ho gabe bangsoMu sandiri. Sandok pambaenanMu na godang dohot na pahomang roha i na nibaenMu di halahi, angka i ma mambaen tarbonggal situtu goarMu di sandok tano on. Dipalua Ho do bangsoMu sian Mesir jana dihusilkon Ho angka bangso na asing na mangambat-ambati bangsoMi.

ESRA 1:2

“On ma parenta ni si Kores, raja ni Persia. Madung dibaen Tuhan, Debata Na Markuaso di banua ginjang au gabe raja di sandok portibi on, jana ditugaskon do au laho mambangun sada bagas diSia di Jerusalem na di tano Juda.

NEHEMIA 2:4

Marsapa ma raja i, “Antong, aha do giotmu?” Martangiang ma au di bagasan rohangku tu Debata na markuaso di banua ginjang i,

NEHEMIA 4:14

Di na huida mabiar rayat i, hudok ma tu halahi dohot tu angka hatobangon maradu tu angka pamimpin, “Ulang hamu mabiar mida musu! Tuhan na gogo jana na markuaso i ma ingot hamu, jana parjuangkon hamu ma angka kahanggimunu, angka dakdanak, dongan saripe dohot bagasmunu!”

NEHEMIA 4:8

Marpokat ma halahi giot mangaroro Jerusalem laho patubu hagaoron.

NEHEMIA 9:32

O Debata, Debatanami na gogo! Debata na godang jana na jorbut! Sai na setia do Ho maniop sumpa dohot janji, digohi Ho do sandok janjiMu jana dipatulus Ho do i. Mamungka sian na nipisat ni raja Asur hami, lopus saonnari, ma bahat pardangolan hami alami. Angka raja, malim, panurirang maradu hatobangonnaMi, bope ompu dohot rayat madung sude manaonkon i. Ulang halupahon sude na hancit i! Ulang nian agohon i sian parningotanMi!

MASMUR 47:2

Angke na lobi sogen do Tuhan Na Gumincat i, Ia do raja godang na mangarajai sude na di portibi i.

MASMUR 76:8

Dipatubegehon Ho sian langit haputusanMu; mangkohom noma portibi on jana heput,

MASMUR 89:2

Dibaen manongtong do holong ni rohaMu songon langit, hot do habonaranMu.

MASMUR 89:3

Ningmu do, “Madung Hupudun janji dohot halak na Hupili, madung marsumpa Au tu si Daud, naposongKi:

MASMUR 89:8

Ale Tuhan, Debata Na Markuaso, ise dehe songon Ho? Na gogo do Ho ale Tuhan, jana hasetiaanMu adong di humaliangMu.

HARURUAR 20:6

Tapi patidahononKu do holong ni rohangKu maradopkon marribu-ribu halak; i ma na mangkaholongi Au jana na mangoloi parentangKu.

PANGARATAION 7:12

“Muda sai diparate-atehon hamu do angka parenta on, jana dihaburjuhon hamu mangoloisa, gabe setia muse ma Tuhan Debatamunu i tu parjanjian na nibaenNia dohot hamu. PatuduhononNia ma holong ni rohaNia na manongtong i tu hamu, songon na nijanjihonNia tu ompumunu.

PANGARATAION 7:21

Jadi ulang hamu mabiar tu angka bangso i. Tuhan Debatamunu rap dohot hamu. Debata na tongam do Ia; sai habiari hamu ma Ia.

PANGARATAION 7:9

Ingot hamu ma! Sasada Tuhan Debatamunu i do Debata, jana Debata na setia do Ia. Tu angka na manghaholongi Ia jana na mangoloi angka parentaNia, patulusonNia ma janjiNa jana patuduhononNia ma holong ni rohaNia na manongtong i lopus tu sundut pasaribuhon.