NEHEMIA 1:2 - BIBEL JAMITA NA DENGGAN

² Ro do di hatiha i kahanggingku si Hanani sian Juda rap dohot piga-piga halak. Jadi husapa-sapai ma halahi taringot tu pangalaho na masa di Jerusalem dohot taringot tu angka halak Jahudi na mulak sian habuangan na di Babel.

NEHEMIA 1:2 Iomraidhean Croise

PAMUNGKAAN 14:10

Na gohan do di rura i sumur aspal, jana di na marlojongi angka raja ni Sodom dohot Gomora paluahon dirina sian parporangan i, dojup ma halahi madabu tu bagasan ni angka sumur i. Anggo raja na tolu halak nari malua do halahi jana maporus tu dolok.

2 RAJA-RAJA 24:14

Raja Joyakin, angka dadaborunia, inangnia dohot angka pagawe ni bagas godangnia ditaban si Nebukadnesar ma i sudena jana dioban tu Babel. Pitu ribu halak angka na malo, saribu halak parkarejo na malo, masuk ma disi angka pande bosi, dohot hona oban; angka halak na malo marporang do i sudena. Sudena na nioban tu habuangan i, dohot ma disi bagian parbagas godang dohot angka halak na pistar, adong ma hira-hira sampulu ribu halak sudena. Hampir do sude halak na mangingani Jerusalem dioban tu habuangan i. Hum angka rayat na umpogos ma na tading.

2 RAJA-RAJA 25:12

Tapi deba sian jolma na pogos-pogos ditadingkon ia do jana disuru ia mangkarejohon kobun anggur dohot angka ladang.

ESRA 9:14

Jadi, bia muse dope hami pasidungkon angka parentaMu jana marsibuatan boru hami dohot angka jolma na jahat i? Muda laing hami baen dope antong songon i, ma pasti sun murukMu, gabe roncohononMu hami jana nada padiaronMu sahalak pe mangolu.

NEHEMIA 7:2

Hupasahat ma na mamarenta kota Jerusalem tu anggingku si Hanani dohot tu si Hananya komandan ni benteng, harana sumurung do ia sian halak na asing, mabiar do ia tu Tuhan boti haposan ni roha.

JEREMIA 44:14

Sian halak Juda na teba i na kehe tu Mesir laho maringanan disi, sahalak pe nada adong na malua sanga mangolu. Sahalak pe sian halahi nada adong be na mulak tu Juda, haru pe lungun sajo roha ni halahi. Tutu do nada adong be na mulak sian halahi asing ni na mangungsi piga-piga halak.”

JEHESKIEL 6:9

Disi, di tonga-tonga ni angka bangso, tu dia halahi na tartaban i dioban, angka halak na malua sian tonga-tongamunu angkon mangingot Au. PaulakonKu do muse roha ni halahi na markarosuan i, na dung mandao sian Au jana manundali halahi, na tongtong markarosuan mangihutkon gana-ganaan ni halahi, dung i gabe goyak ma roha ni halahi mida dirina sandiri hara ni sude hajahatan dohot hajorbutan ni halahi.

JEHESKIEL 7:16

Malua do nian deba jana maporus ma i tu partoran songon darapati na nihabur sian rura. Mangangguhi be ma i hara ni angka dosa ni halahi.