MATEUS 5:4 - BIBEL JAMITA NA DENGGAN

⁴ Martua ma halak na marsak roha; angke na giot apoan do roha ni halahi.

MATEUS 5:4 Iomraidhean Croise

JESAYA 12:1

Dapot do hatihana marende angka jolma: “O Tuhan, mandok tarimakasi do au tu adopanMu, hara ni na niadopanMu au. Najolo muruk do Ho tu au, hape saonnari madung mombun rohaMu.

JESAYA 25:8

AbiskononNia ma hamatean ro di salolot-lolotna! Apusan ni Tuhan Debata ma ilu-ilu sian ganop mata, jana padaoonNa habilean na nitanggung ni halakNia di sude portibi on. Madung didok Tuhan i songon i, angkon tulus do i tarjadi.

JESAYA 30:19

Ale hamu na maringanan di Jerusalem, nada sai mangandungi be hamu. Ibo roha ni Tuhan jana alusanNia ma hamu muda pio-pio hamu tuSia mangido tolong.

JESAYA 35:10

Lalu halahi tu Jerusalem marjop ni roha, manortor lalu marsurak marmoga-moga. Martua ma halahi salolot-lolotna, malua sian habot ni roha dohot susa.

JESAYA 57:18

Madung Huida pangalaho ni halahi, tapi laing pamalumonKu jana toguonKu do ia jana paulahonKu markite pangapoion; dohot bibir ni halak na marsak roha.

JESAYA 66:10

Ale hamu na manghaholongi Jerusalem, beta ma marjop ni roha, marmoga-moga ma hara ni i! Hamu na marsak hara ni ia, saonnari tola ma marjop ni roha.

JESAYA 66:2

Nada he tanganKu do mambaen sasudena umbahen masa na songon on? Songon i do pandok ni Tuhan. Tapi tu halak si songon on ma nolnol Au marnida, jolma na tartindas dohot na maheu, na mabiar tu hatangKu.

JEHESKIEL 7:16

Malua do nian deba jana maporus ma i tu partoran songon darapati na nihabur sian rura. Mangangguhi be ma i hara ni angka dosa ni halahi.

JEHESKIEL 9:4

Didok Tuhan ma tusia: “Mardalan ma ho sian tonga-tonga ni kota Jerusalem, jana suratkon ma hurup T di ganop bohi ni halak na marsak dohot na susa hara ni sude parbuatan sihagigian na dibaen di kota on.”

ZAKARIA 12:10

Dung i lehenonKu ma tondi na sai marhagiot mangampuni dohot na marhagiot martangiang tu pomparan ni si Daud dohot tu halak na maringanan di Jerusalem. Tatapon ni halahi ma na nitiham ni halahi jana andungan ni halahi ma i songon pangandungi ni anak sasada. Lungun noma pangandung ni halahi, songon dia na agoan anak siangkaan.

LUKAS 16:25

Tapi dialusi si Abraham ma, ‘Ingot ma amang: Dompak di ngolumu madung dijagit ho sude angka na denggan, hape anggo si Lasarus hum na jat do. Saonnari sonang ma ia dison, tapi anggo ho markancit ma.

LUKAS 6:21

Martua ma hamu na male saonnari, harana pabutongon ma hamu muse! Martua ma hamu angka na tangis saonnari, harana gabe martata ma hamu muse!

LUKAS 6:25

Marjaya ma hamu na butong saonnari on; harana, malean ma hamu! Marjaya ma hamu na martata saonnari on; harana, marsak ma rohamunu jana tangis.

LUKAS 7:38

Jongjong ma ia di pudi ni Jesus di lambung patNa i, tangis ma ia disi, ditombur ia ma pat ni Jesus dohot ilunia, asa diapusi ia ma i dohot obukna, dung i diumma ia ma i jana diusehon ia ma miak na huskus i.

LUKAS 7:50

Tapi didok Jesus ma tu dadaboru i, “Haporsayaanmu do na paluahon ho, kehe ma ho di bagasan hahorasan!”

JAKOBUS 1:12

Martua do sanga ise na sobar di na manaon pandugaan. Angke muda dung disalpui ia pandugaan i, manjagit upa ma ia, i ma hangoluan na nijanjihon ni Debata tu angka na mangkaholongi Debata.

HALUMBAAN 21:4

ApusanNia ma sasude ilu sian mata ni halahi. Nada adong be anggo hamatean; hamarsahan, partangisan sanga parkancitan pe nada adong be. Madung salpu angka pangalaho na honok i.”