LUKAS 8:13 - BIBEL JAMITA NA DENGGAN

¹³ Same na madabu tu tano na marbatu i, i ma manggambarkon angka halak na manangihon hata i jana na manjagitsa mardongan sonang ni roha. Tapi nada jabat marurat di bagasan roha ni halahi. Hum santongkin sajo do halahi porsaya hape di na ro pandugaan, marbalik ma halahi.

LUKAS 8:13 Iomraidhean Croise

JOB 19:28

‘Bia do baenonta manuntut ia?’ Manjalahi dalan ma hamu anso roroonmunu au.

PODA 12:12

Halak na durako gok do tahi na jahat; halak na denggan songon hayu na marbatu.

PODA 12:3

Nada hot marbungaran halak hara ni hajahatan; halak na jujur hot do so tarhutur.

JESAYA 58:2

Dijalahi halahi do Au ganop ari, jana marpor ni roha giot mananda nasa dalanKu. Songon bangso na mangkarejohon na tutu dohot na so maninggalkon aturan ni Debatana disapai halahi do Au taringot tu aturan na tigor, jop do roha ni halahi mangadop tu Debata.

JEHESKIEL 33:32

Dietong do ho songon sada halak parende na mangendehon logu ni na marsihaholongan, parsora na jeges jana na malo mamalu hasapi. Tutu nian dibege halahi do hata na nidokkonmi tapi nada dioloi halahi.

HOSEA 6:4

Tapi didok Tuhan ma, “Ale Israel dohot Juda! Angkon bia noma hamu baenonKu? Tibu do mago holong ni rohamu tu Au songon nambur sanga ombun manyogot.

MARKUS 6:20

Anggo si Herodes disuruhon ia do anso denggan dijagoi ngolu ni si Johannes. Harana, mabiar do ia mida si Johannes. Angke diboto ia na tigor do si Johannes on, i ma suruan ni Debata. Tutu do nian, muda mangkobari si Johannes, sai tabo do dihilala si Herodes manangihon haru pe gabe marhusari sajo rohania hara ni i.

LUKAS 8:12

Same na madabu tu dalan i, manggambarkon angka halak na manangihon hata i. Tapi ro ma Sibolis mangarampas hata i sian roha ni halahi anso ulang porsaya jana nipalua halahi.

LUKAS 8:14

Same na madabu tu tonga-tonga ni duri i, manggambarkon angka halak na manangihon hata i tapi ganggu do roha ni halahi jana por roha ni halahi di sinadongan boti lungun roha ni halahi marsonang-sonang di tano on. Sudena ma i mangkapit halahi mambaen halahi nada marbatuhon parbatu na matoras.

JOHANNES 15:2

Diambungkon Ia do sude rantingKu na so marbatu; jana sude ranting na ramos dipaias Ia do anso mur ramos muse batuna.

JOHANNES 15:6

Sanga ise na so tinggal di bagasan Au, ambungkonon ma ia songon ranting i gabe mahiang. Angka ranting na songon i, sipalaguton ma i jana siambungkonon tu bagasan api, anso mosok.

JOHANNES 5:35

Songon lampu na gara jana na marsinondang do da anggo si Johannes; jana hamu pe, anggo hum santongkin ra do hamu ditorangi sondang ni lampu i.

1 KORINTUS 13:2

Sugari malo au manyurirangi, jana huboto sude na buni dohot sude parbinotoan, jana adong di au haporsayaan jabat tarpaorot au angka dolok, tapi nada adong di au holong ni roha, songon na soada do au.

1 KORINTUS 15:2

Muda togu do hamu marojahan tu na hujamitahon i, paluaon ni Jamita Na Denggan i ma hamu; asing ma rupani anggo na sayang boti sajo hamu di na porsaya i.

GALATIA 3:1

Hamu ale angka halak Galatia na oto! Ise dehe na mangula-ulai hamu? Madung hupajojor taringot tu hamamate ni Kristus di parsilang i satorang-torangna.

GALATIA 3:4

Antong, parcuma noma he sude na nitaonmunu i? Tontu nada!

EPESUS 3:17

Hara ni na porsaya i hamu tu Kristus, sai maringanan ma nian Kristus di bagasan rohamunu, jana mur togu ma ngolumunu hara ni holong ni roha na dung marurat di bagasan hamu.

KOLOSSE 1:23

Hara ni i angkon ojak jana togu do hamu di bagasan haporsayaan i, jana nada ra be hamu nipaorot sian arop ni roha ni Jamita Na Denggan na dung binegemunu. Madung dijamitahon jamita i tu sude na nitompa di tano on, jana na dung gabe naposo ni i do au si Paulus.

KOLOSSE 2:7

jana marurat tuSia ma hamu. Pajongjong hamu ma ngolumunu jana Kristus ma baen hamu ojahanna. Sugari mur margogo ma nian haporsayaanmunu hombar tu na dung diajarkon tu hamu. Jana sai mur marsigorgor ma rohamunu mandok tarimakasi.

1 TESSALONIKA 3:5

Jadi dung so tartaon be lungunna, gabe husuru ma si Timoteus, anso huboto sanga na bia pangalaho ni haporsayaanmunu. Songon na ganggu do rohangku betak na nigoda ni tukang goda i do hamu, gabe sayang sude halojaonnami i.

1 TIMOTEUS 1:19

marhite haporsayaan dohot roha na ias. Adong do deba halak na so parduli di sora ni taroktokna, jadi gabe mago do haporsayaan ni halahi.

IBRANI 10:39

Anggo hita nada halak na sumurut sanga na lilu hita. Tapi halak na porsaya do hita jana na dung nipalua.

JAKOBUS 2:26

Harana pamatang na so martondi, pamatang na mate do i, laing songon i do haporsayaan na so mardongan pambaenan, na mate do i.

2 PETRUS 2:20

Muda dung ditanda sanga ise Tuhan i dohot Sipaluanta, Jesus Kristus i, jana hara ni i madung malua ia sian angka na marpardomuan tu portibi on na manyegohon parange ni jolma, hape tarjorat muse ia mangulahi jana ditaluhon angka pangalaho ni portibi on, ujungna gabe jumatjat dope na masa tusia ulang pado na parjolo i.

2 PETRUS 2:22

Sude na nibaen ni halahi tudos do tu pandohan on, “Mulak do anjing mangan uta-utana,” dohot, “Mulak marluntak do babi diparguluanna.”

1 JOHANNES 2:19

Angka halak na dung manadingkon hita do anggo angka musu ni Kristus i, tapi nada halak na masuk tu hita hian halahi. Sugari halak na masuk tu hita hian halahi, tontu angkon tongtong do halahi rap dohot hita. Tapi morot do halahi sian hita anso torang tarida na so masuk tu hita hian sahalak pe sian halahi.

JUDAS 1:12

Muda hatiha mambaen pesta parjamuan hamu, laing halahi ma tongtong na mambaen tilako di hamu. Angke nada adong ila ni roha ni halahi, na songkal jana na pamokmokkon dirina. Songon ombun na niombuskon ni alogo do halahi, hape nada parohon udan. Laing songon suan-suanan do halahi na so marbatu haru pe madung dapot musimna; songon suan-suanan na niumpat do halahi gabe rahar.