LUKAS 3:11 - BIBEL JAMITA NA DENGGAN

¹¹ Ning si Johannes ma mangalusi, “Halak na marbaju dua angkon lehenonnia ma sada tu halak na so adong bajuna; songon i muse halak nampuna sipanganon, angkon bagihononnia ma i tu halak na asing.”

LUKAS 3:11 Iomraidhean Croise

JEHESKIEL 18:7

Nada jungada ia mangicu sanga manangko. Angka barang jaminan ni utang ni halak tusia sai dipaulak ia do. Halak na malean dilehen ia do mangan jana halak na so marpakean, dilehen ia do parabiton.

DANIEL 4:27

Hara ni i, denggan ma diihutkon raja i sipaingotku. Ulang be sai mardosa raja i, tapi dipatulus raja i ma na denggan dohot na tigor, jana ibo ma roha ni raja i mida halak na pogos. Jadi muda songon i, sai tongtong ma martua raja i.”

MATEUS 25:40

Alusan ni Raja i ma, ‘Ingot hamu ma on: Hatiha dibaen hamu songon i tu sada halak sian angka kahanggingKu na umdangol i, etongon na tu Au do i dibaen hamu!’

LUKAS 11:41

Na adong di bagasan mangkuk dohot pingganmunu i, i ma nian silehenonmunu tu angka halak na pogos. Di pangalaho na songon i ma gabe ias sudena i di hamu.

LUKAS 18:22

Umbege na songon i, didok Jesus ma tusia, “Laing adong dope sada nari na angkon sibaenonmu: Gadis ma sude na adong di ho, jana lehen ma i tu halak na pogos; anggo i dapot ho ma arta na di banua ginjang. Dung i beta ma ihutkon Au.”

LUKAS 19:8

Jongjong ma si Zakeus didok ia ma tu Tuhan i, “O Tuhan, satonga sian artangku hulehen ma tu halak na pogos; jana sanga ise na unjung hutipu, hugarar pe mangulahi tusia opat noli lompit!”

JOHANNES 13:29

Adong deba na marpikir, na disuru Jesus do si Judas manobusi na porlu tu pesta i sanga betak na nisuru ni Jesus si Judas mangalehen hepeng saotik tu angka na pogos – harana si Judas do sitiop hepeng kas ni halahi.

BAENON NI ANGKA RASUL 10:2

Halak na mangkabiari Debata do ia jana sude do halahi sabagas sai marsomba tu Debata. Bahat do ditolong ia halak Jahudi na pogos-pogos jana sai martangiang do ia tu Debata.

BAENON NI ANGKA RASUL 10:31

Didok ia ma, ‘Kornelius! Madung dijagit Debata tangiangmi jana diingot Ia do denggan ni rohamu.

BAENON NI ANGKA RASUL 10:4

Diligi ia ma tu surusuruan i mardongan biar, didok ia ma, “Aha do ulaning Tuan?” Dialusi surusuruan i ma, “Madung dijagit Debata tangiang dohot denggan ni rohamu jana diingot Debata do ho.

EPESUS 4:28

Angka panangko, ulang be manangko. Tapi gumonan ma ia markarejo anso dapot ia balanjonia markite-hite dalan na tigor jana anso tarurupi ia halak na hurangan.

1 TIMOTEUS 6:17

Tu angka halak na kayo di tano on, paingot ma halahi anso ulang manyombong jana anso ulang mararop ni roha halahi tu angka barang-barang na ra salpu – songon sinadongan rupani. Angkon mararop ni roha tu Debata do halahi, i ma Debata na mangalehen sasudena tu hita marlobi-lobi anso sonang hita.

1 TIMOTEUS 6:18

Paingot ma halahi laho patuduhon hadengganan, laho patupahon bahat pangalaho na denggan, habasaon dohot haburjuon mangalehen.

IBRANI 6:10

Nada Debata na so tigor. Nada halupahononNia sanga aha na denggan na nibaenmunu tuSia. Sai na ingotonNia do holong ni roha na nipatuduhonmunu tuSia di bagasan pangurupionmunu na nipasahatmunu maradopkon angka dongan Kristen na asing i. Jana lopus saonnari pe laing dilehen hamu do pangurupion i.

JAKOBUS 1:27

Haburjuon marugamo na ias jana na so martihas diadopan ni Debata Amanta, on do: Manyarihon na so marama so marina dohot angka na mabalu na mardangol; dohot na manjagohon dirina sandiri anso ulang sego dibaen portibi on.

JAKOBUS 2:14

Hamu angka dongan! Aha ma gunana didok halak, “Porsaya do au,” anggo so dipatidahon ia do sian pambaenannia na tutu ia porsaya? Tarpalua haporsayaan na songon i ma he ia lakna?

1 JOHANNES 3:17

Muda adong sada halak na marsinadongan di tano on na marnida donganna markahurangan, hape nada ra ia patuduhon ibo ni roha tu donganna i, bia ma he pandoknia na holong rohania tu Debata?

1 JOHANNES 4:20

Muda adong na mandok, “Huhaholongi do Debata,” hape hosom rohania mida dongannia, pargabus do halak na songon i. Angke sanga ise na so mangkaholongi dongan na bolas idaonnia, nada tarbaen ia be mangkaholongi Debata na so jungada diida ia.