JOSUA 7:11 - BIBEL JAMITA NA DENGGAN

¹¹ Na mardosa do halak Israel. Madung Huparentahon tu halahi laho mangoloi parjanjian antara ni halahi dohot Au hape dilaosi halahi do i! Angka barang-barang sironcohononkon pe laing adong do dibuat halahi. Ditangko jana dibunihon halahi do i di antara ni barang-barang ni halahi, jana dipaula so diboto halahi ma i!

JOSUA 7:11 Iomraidhean Croise

2 RAJA-RAJA 18:12

Madabu pe Samaria, hara ni na so mangoloi do angka halak Israel tu Tuhan, Debata ni halahi, digagai halahi parjanjian na nibaen ni Tuhan dohot halahi jana dilanggar halahi sude parenta ni si Musa naposo ni Tuhan i. Nada ra halahi manangihon dohot mangoloi.

2 RAJA-RAJA 5:24

Dung lalu di dolok na niinganan ni si Elisa i, dibuat si Gehasi ma hepeng dohot pakean i jana dipasimpan ia ma di bagas. Disuru ia ma mulak pangurupi ni si Naaman na dua halak i.

JESAYA 24:5

Hodar ma tano on patunda ni na nilaosan ni pangisina angka parenta, na manguba aturan jana manggagai janji.

JEREMIA 31:32

Tapi nada sarupa parjanjian i dohot parjanjian na Hubaen tu ompu ni halahi di na Hutogu halahi haruar sian Mesir. Haru pe Au songon halaklahi ni halahi, tapi digagai halahi do parjanjianKu dohot halahi.

HOSEA 6:7

Tapi songon si Adam, digagai hamu do janjimunu dohot Au.

HAMALIMON 5:15

Muda adong sada halak na mardosa so hara ni na niuntilna, hara ni na lalap ia pasahat silehen-lehen na patut tu Tuhan, angkon obanon ni halahi ma haul tobus ni hasalaan. Ia haul i, i ma sada biri-biri sanga hambeng jantan na so martihas. Diasam ma argana mangihutkon arga markite ukuran na marlaku di inganan na badia i.

HABAKUK 2:6

Tapi anggo angka bangso na dipatunduknia, sai manyindir ma i jana pacia-ciahon tusia. Dokkonon ni halahi ma, “Sai hona bura ma ho hara ni na pagukguk harto na so ho nampunasa! Sadia honok nari he sai pakayoonmu dirimu marhite na mamaksa angka halak na marutang tu ho anso digarari halahi utangna?”

ZAKARIA 5:4

Madung Husuru ia haruar, ninna Tuhan Na Markuaso, anso hona ma i tu bagas ni panangko dohot tu bagas ni na marsumpa pargabus marhite goarKu, jana anso marborngin i di bagas ni halahi, pangabisonna ma angka hayuna bope angka batuna.”

MATEUS 22:21

“Kesar i,” ning halahi mangalusi. Dung i didok Jesus ma tu halahi, “Antong garari hamu ma tu Kesar i sanga aha nampuna ni Kesar i, jana garar muse ma tu Debata sanga aha nampuna ni Debata.”

BAENON NI ANGKA RASUL 5:9

Dung i didok si Petrus ma tusia, “Biasi dehe satahi hamu giot manguji Tondi Ni Tuhan i? Ligi ma indi, ma mulak halahi na mananom halaklahimi. Obanon ni halahi muse ma ho tu balian.”

PANGARATAION 17:2

Muda dibege hamu isarana adong di sada sian hutamunu piga-piga halaklahi sanga dadaboru na mardosa tu Tuhan jana na mangalanggar janjinia

IBRANI 4:13

Umpe sada sian na nitompa i na buni, na so niida ni Debata. Talak do sudena jana patar di joloNia. Jana angkon lehenonta do tuSia partanggungjawabanta.

JOSUA 23:16

Muda dilanggar hamu pudun-pudun ni parjanjian antara ni Tuhan dohot hamu, gabe kehe hamu mangoloi dohot marsomba tu angka debata na asing, gabe muruk ma Tuhan jana hona uhumanNa ma hamu. Jana nada jabat sadia honok nari dung i, nada adong be umpe sahalak na tinggal sian hamu di tano na denggan on, na nilehen ni Tuhan di hamu.”

JOSUA 7:1

Madung diparentahon Tuhan halak Israel bahaso na so tola buaton sada pe sian sandok na adong di Jeriko na angkon sisegohononkon. Hape nada dioloi parenta i. Adong ma sada bayo na margoar si Akan na mangalanggar parenta i, jadi gabe muruk situtu ma Tuhan tu halak Israel. (Amang ni si Akan goarna si Karmi jana ompungnia margoar si Zabdi na sian horong ni Marga Zerah na masuk tu Marga Juda.)

JOSUA 7:10

Dialusi Tuhan ma si Josua, “Jongjong ma ho! Biasi sai manungkap ho?

HAKIM-HAKIM 2:20

Patunda ni i gabe sun ma muruk ni Tuhan tu Israel, jana didok ma, “Madung Huparentahon tu angka ompung ni bangso on anso ditiopsa parjanjian antara Au dohot halahi. Hape digotapkon bangso on do pudun-pudun ni janji i; dilanggar halahi do parentangKu.

1 SAMUEL 14:38

Jadi gabe didok si Saul ma tu angka pamimpin ni rayat i, “Ro ma hamu tuson, jana pareso hamu sanga dosa aha na dibaen sadari on.