JOSUA 5:6 - BIBEL JAMITA NA DENGGAN

⁶ Boti muse, angka halaklahi na haruar sian Mesir na dung tuk umurna masuk tentara, di ujung ni ombas siopat pulu taon i madung mate sudena patunda ni na so mangoloi parenta ni Tuhan. Jana hombar tu sumpa ni Tuhan, nada diisinkon Tuhan halahi marnida tano na makmur jana na napu i na nijanjihon ni Tuhan tu ompu na umpompar halahi.

JOSUA 5:6 Iomraidhean Croise

MASMUR 107:4

Adong ma i na marpinda-pinda di padang na bidang, na so dapot dalan mulak tu inganan di kota.

HARURUAR 3:17

Madung Huputuskon di rohangKu laho maroban halahi ruar sian Mesir, inganan ni halahi diparkanciti, jana taruhononKu ma halahi tu luat na mora bope na napu – luat ni halak Kanaan, Het, Amori, Peris, Hewi dohot Jebus.

HARURUAR 3:8

Jadi hara ni i, madung mijur Au laho palua halahi sian tangan ni halak Mesir, bope maroban halahi haruar sian luat i, tu sada luat na bidang jana na napu, tano inganan ni susu dohot aer ni loba, jana saonnari diingani halak Het, Amori, Peris, Hewi dohot Jebus.

JEREMIA 2:2

Kehe ma ho paboahon barita on tu sude halak na adong di Jerusalem, “O ale Israel, Huingot do holongmu, taran di haposoonmu; godang ni holong ni rohamu di na dompak boru ho. Diihutkon ho do Au tu halongonan mangolu sian luat na so marsuan-suanan.

JEHESKIEL 20:15

Di parhorsihan i pe laing marjanji do Au mandok, na so obanonKu bangso Israel i masuk tu tano na dung Hupasingkop i di halahi, tano na denggan boti na napu jana na dumenggan di sandok portibi on.

JEHESKIEL 20:6

Marjanji do Au di hatiha i giot maroban halahi ruar sian Mesir manuju tu tano na Hutodo di halahi. Tano na mora jana na napu do luat i, i ma tano na dumenggan di portibi on sudena.”

JOEL 3:18

Gok kobun anggur noma angka dolok di hatiha i. Angka pahan-pahanan manjampali ma di tor na napu. Angka batang aek ni Juda nada unjung abis be aekna. Mardalan ma sada batang aek sian Bagas Ni Tuhan, jana aekanna Rura Sitim.

BILANGAN 14:23

On pe, nada tola masuk halahi tu luat i. Sian tonga-tonga ni halahi na so mangoloi Au, umpe sahalak tarbaen mandegehon patna tu tano i.

BILANGAN 26:63

Songon i ma daftar na nibaen ni si Musa dohot si Eleasar taringot tu marga-marga ni Israel dompak dibaen halahi pamilangion di tano na hornop ni Moab di bariba ni Batang aek Jordan mardonokkon Jeriko.

PANGARATAION 1:3

Di tanggal sada bulan sabolas di taon paopat puluhon dung ditandingkon halahi Mesir, dipabolkas si Musa ma tu bangso i sandok na nisuruhon ni Tuhan sidokkononnia tu halahi.

PANGARATAION 2:14

I ma na masa di taon patolu pulu salapankon dung tatadingkon Kades-Barnea. Madung marujung ngolu ni sude tentara na sangoncap i, songon na nilumbahon ni Tuhan humani.

PANGARATAION 2:7

Ingot hamu ma sanga songon dia pamasumasu ni Tuhan Debatamunu di hamu di bagasan sasude na nibaenmunu. Madung diparmudu-mudu Ia hamu salolot na madang-adang mamolus parhorsihan na bolak i. Madung didongani Ia hamu di na opat pulu taon on jana dipasingkop Ia sandok na hasaya di hamu.

PANGARATAION 8:4

Salolot na opat pulu taon on nada mumut pakeanmunu, jana nada manggurbak patmunu.

IBRANI 3:11

Muruk do Au jana Husumpahon, ‘Na so tola masuk halahi tu inganan na giot lehenonKu tu halahi gabe paradiananna!’ ”

JOSUA 1:6

Sai marpos ni roha ma ho jana ulang mabiar, angke ho do na mamimpin bangso on di na giot buaton ni halahi luat na dung Hujanjihon tu ompu na umpompar halahi.

JOSUA 24:7

pio-pio ma halahi tu au mangido tolong. Jadi gabe manggolap Hubaen inganan antara ni halahi dohot angka halak Mesir i, jana Huparo aek ni laut mangalingkup angka halak Mesir i lopus bonom halahi sudena. Pendekna, sanga aha na Hubaen maradopkon Mesir, sudena i diboto hamu do. Dung i honok sajo ma hamu maringanan di parhorsihan.

JOSUA 5:5

Di hatiha na haruar angka halak Israel sian Mesir, na dung marsunat do sude angka halaklahi di halahi. Tapi di na madang-adang angka halak Israel di parhorsihan opat pulu taon honokna, sada halak pe sian dakdanak ni halahi halaklahi nada adong dope na disunat.

JOSUA 5:7

Angka anak halaklahi ni na dung marmatean i sudena nada unjung dope disunat. Sundut na imbaru on ma na nisunat ni si Josua i.