JOSUA 12:6 - BIBEL JAMITA NA DENGGAN

⁶ I ma raja sidua halak na nitaluhon ni si Musa rap dohot bangso Israel. Jana dilehen si Musa, naposo ni Tuhan i ma tano ni angka raja i tu Marga Ruben, Gad dohot satonga Marga Manase baen tano parbagianan ni halahi.

JOSUA 12:6 Iomraidhean Croise

BILANGAN 32:29

“Muda dioloi halak Gad dohot halak Ruben do parenta ni Tuhan, dohot do halahi manaripari Batang aek Jordan laho marporang jana muda marhite pangurupion ni halahi gabe tarrampas luat i, jadi lehen hamu ma tano Gilead na gabe siteanon ni halahi.

BILANGAN 32:32

Mardongan Tuhan i, tariparannami ma Batang aek Jordan laho marporang anso tarpartahankon hami siteanonnami dison, di Habincaran ni Batang aek Jordan on.”

BILANGAN 32:33

Dung i dilehen si Musa ma tu angka Marga Gad dohot Ruben dohot tu satonga Marga Manase sude luat ni Raja Sihon, i ma raja ni halak Amori dohot luat ni Raja Og sian Basan dohot muse angka kota dohot humaliangna.

JOSUA 14:3

Anggo na dua satonga marga na asing i madung dilehen si Musa tano na di Habincaran ni Batang aek Jordan. (Porlu paboaon dison, anggo pomparan ni si Josep marbagi dua do di marga: Marga Manase dohot Marga Efraim.) Taringot tu Marga Levi, nada maruli bagi aha sian parbagian tano na nilehen ni si Musa tu halahi. Hum angka kota do dilehen di halahi baen inganan, dohot padang-padang baen panjampalan ni lombu dohot biri-biri ni halahi.

JOSUA 18:7

Hum Marga Levi sajo do na so dapotan parbagian tano rap dohot hamu, angke anggo bagian ni halahi, i ma: Gabe angka malim laho mangoloi Tuhan. Jana anggo salaho tu Marga Gad, Ruben dohot Manase Parhabincaran, na dung manjagit bagianna be do halahi di Habincaran ni Jordan. Na dung dilehen si Musa, naposo ni Tuhan i do tano i di halahi.”

JOSUA 22:4

Antong, domu tu na dijanjihonNa i, madung dilehen Tuhan Debatamunu i hasonangan tu angka kahanggimunu sabangso. Jadi saonnari, mulak ma hamu tu tanomunu sandiri, na di Habincaran ni Batang aek Jordan i, na nilehen ni si Musa najolo tu hamu.