JOSUA 1:5 - BIBEL JAMITA NA DENGGAN

⁵ Salolot di ngolumu ale Josua, sada halak pe nada adong na tolapsa manaluhon ho. Angke sai dongananKu do ho songon pandonganingKu di si Musa. Sai na tongtong do ho dongananKu. Nada unjung tadingkononKu ho.

JOSUA 1:5 Iomraidhean Croise

PAMUNGKAAN 39:2

Didongani Tuhan do si Josep, gabe sai manjadi do sude karejonia. Di bagas ni tuannia i do ia tinggal, i ma halak Mesir i.

1 RAJA-RAJA 1:37

Sai Tuhan i ma mandongani raja i, sai didongani Ia muse ma si Salomo. Sai dipartuai Tuhan ma pamarentaonnia sumurung sian pamarentaon ni raja i.”

1 RAJA-RAJA 11:38

Muda laing songon naposongKu si Daud i do ho mangoloi tu Au sian sude rohamu jana ngolumu marguru tu angka uhumKu, jana pasonangonmu rohangKu markite-hite na patuluskon sandok na Huparentahon tu ho, sai na donganKu do ho sanga andigan. JaminonKu ma, pomparanmu do na gabe raja ni Israel manggontihon ho, laing songon na Hubaen tu si Daud.

1 RAJA-RAJA 6:13

Maringanan ma Au di bagas na nipauliMi gabe tongtong Au di tonga-tonga ni bangsongKu Israel. Nada tinggalkononKu halahi.”

1 RAJA-RAJA 8:57

Sai Tuhan Debata ma donganta songon na dung didongani Ia ompunta, sai ulang ma ditinggalkon Ia hita.

1 JUJUR TAON 28:20

Dung salpu i didok Raja Daud ma muse tu si Salomo anakna i, “Ulang ho mabiar, pos ma rohamu. Pungka ma karejo i jana ulang ho gamang sanga na maradopkon aha pe. Urupan ni Tuhan Debata na husomba i do ho. Nada tadingkononNia ho. Sai na dongananNia do ho lopus sidung dibaen ho sude karejo i.

MASMUR 46:11

Didongani Tuhan Na Markuaso i do hita, Debata ni si Jakob do mangondihon hita.

HARURUAR 3:12

Dialusi Debata ma, “Hudongani pe ho, jana dung dioban ho bangso i haruar sian Mesir, angkon oloanmunu ma Au di dolok on. I ma buktina, paboa Au do marsuru ho.”

JESAYA 42:16

Giot toguonKu na mapitung i mamolus dalan na so ditanda halahi Humani. Hagolapan Hubaen gabe na torang di halahi, dalan na margaba-gobi Hubaen mangornop. I ma janjingKu tu halahi jana patulusonKu ma sudena i.

JEREMIA 1:8

Ulang ho mabiar mida halahi, angke sai dongananKu do ho laho mangondihon ho. Au Tuhan, madung mandok songon i!”

DANIEL 11:16

Roha-roha ni raja ni Siria i ma baenonna nada adong pola be paraloan mangambatisa. Inganannia ma tano parjanjian i jana marguru disia sajo noma sudena.

MATEUS 28:20

Laing ajari hamu ma halahi anso burju mangoloi sude na Huparentahon tu hamu. Botoonmunu ma. Au ma tongtong rap dohot hamu lopus tu hasidungan ni tano on.”

SURAT NI SI PAULUS TU PARLAGUTAN ROM 8:31

Aha ma he tardok hita taringot tu sudena i? Muda Debata donganta, ise ma he tarbaen mangalo hita?

SURAT NI SI PAULUS TU PARLAGUTAN ROM 8:37

Tapi di bagasan sasudena i, na monang situtu do hita markite-hite Ia na dung mangkaholongi hita!

PANGARATAION 20:1

“Muda kehe hamu marporang mangalo angka musumunu, ulang hamu mabiar mida kareta dohot kudo ni halahi na bahat bope na umbahat bilanganna sian hamu. Tuhan Debatamunu do paluahon hamu sian Mesir, laing Ia do mandongani hamu.

PANGARATAION 20:4

Kehe do Tuhan Debatamunu mandongani hamu jana lehenonNia do hamonangan di hamu.’

PANGARATAION 31:23

Dung i mangkuling ma Tuhan tu si Josua, anak ni si Nun, ninna ma, “Patogu ma rohamu jana barani! Ho noma mamimpin bangso Israel mamasuhi tano na dung Hujanjihon tu halahi, jana Au ma mandongani ho.”

PANGARATAION 4:31

Debata na gok ibo ni roha do Tuhan i. Nada tadingkononNia sanga abiskononNa hamu, jana nada halupahononNia parjanjian na nibaenNia sandiri dohot ompumunu.

PANGARATAION 7:24

Pasahaton ni Tuhan angka raja ni halahi tu bagasan kuasomunu. Bunuonmunu ma halahi, jana halupahonon ma halahi saulahon. Sada halak pe nada adong na tarbaen mangambati hamu; sandok halak angkon abiskononmunu.

2 TIMOTEUS 4:17

Tapi madung didongani Tuhan au disi. Dipargogoi Ia do au, gabe margogo au manjamitahon Jamita i sudena anso laing dibege sudena angka halak na so Jahudi. Jana malua do au sian baba ni singa.

IBRANI 13:5

Ulang dirajai hepeng ngolumunu, tapi hasonangkon hamu ma intap ni na adong di hamu. Angke madung didok Debata, “Nada padiaronKu ho jana nada tadingkononKu ho.”

JOSUA 1:17

Sai na oloannami do angka na niparentahonmu, laing songon si Musa na sai hami oloi. Sai didongani Tuhan Debatami ma ho songon pandonganiNia di si Musa!

JOSUA 1:9

Ingot, madung Huparentahon tu ho anso marpos ni roha situtu ho! Ulang ho mabiar sanga hurang semangat, angke Au Tuhan Debatamu, sai na dongananKu do ho sanga na tu dia pe ho kehe.”

JOSUA 10:8

Jana didok Tuhan ma tu si Josua, “Ulang ho mabiar tu halahi. Madung Hulehen di ho hamonangan, hara ni i umpe adong sahalak na tarbaen tahan mangalo ho.”

JOSUA 21:44

Jadi domu tu na dung dijanjihon Tuhan tu ompu na umpompar angka halak Israel i, dijagohon Tuhan ma antong sude luat i gabe sonang. Sian sude angka musu ni halahi i umpe adong sada na tolap mangalo halahi, angke dilehen Tuhan do hamonangan di halak Israel maradopkon angka musu ni halahi.

JOSUA 3:7

Didok Tuhan ma tu si Josua, “Mamungka sadari on baenonKu ma ho gabe halak na godang jabat sude halak Israel pasangap ho jana botoon ni halahi ma bahaso na Hudongani do ho songon pandonganingKu di si Musa.

JOSUA 6:27

Didongani Tuhan do si Josua, jana tarbonggal situtu ma goar ni si Josua di sandok luat i.

HAKIM-HAKIM 2:18

Muda dilehen Tuhan sada pamimpin di halak Israel, sai na ditolong Ia do i. Jana salolot mangolu pamimpin i, sai dipalua Tuhan do halahi sian angka musu ni halahi, dibaen ibo do rohaNia mida halahi muda dibege Ia halahi mangangguhi hara ni na diparkanciti jana dipapisat-pisat.

HAKIM-HAKIM 6:16

“Pasti bisa do ho!” ninna Tuhan, “angke Au do na giot mangurupi ho. Mura do ropukkononmu angka halak Midian i tarsongon na mangadopi sada halak sajo baenonmu.”

1 SAMUEL 10:7

Muda tulus na songon i, baen ma sanga aha na didok rohamu denggan, angke didongani Debata do ho.