DANIEL 5:2 - BIBEL JAMITA NA DENGGAN

² Taran na minum-minum i halahi, diparentahon si Belsasar ma anso dipambuati angka mangkuk sere dohot perak na nirampas ni amangnia si Nebukadnesar sian bagasan Bagas Na Badia na di Jerusalem. Giot ni Raja Belsasar anso sian angka mangkuk i ma minum angka halak na godang-godang i, angka dadaboruna be, angka gundiknia dohot ia sandiri.

DANIEL 5:2 Iomraidhean Croise

2 SAMUEL 9:7

Didok si Daud ma, “Ulang mabiar ho. Haburjuon do na giot baenonku tu ho marningot si Jonatan, amangmi. Hupaulak ma tu ho sude tano ni ompungmu si Saul, jana mangan di bagas godang noma ho torus.”

2 RAJA-RAJA 24:13

Disego-sego si Nebukadnesar ma sude parkokas na nibaen ni Raja Salomo sipakeon di Bagas Ni Debata jana dioban ia ma tu Babel sude barang sigodang arga na adong di Bagas i dohot di bagas godang. Songon i ma na masa i, hombar tu na nidok ni Tuhan hian.

2 JUJUR TAON 11:20

Dung i dibuat si Rehabeam ma si Maaka boru ni si Absalom. Adong ma opat anak ni halahi: Si Abia, si Atai, si Zisa dohot si Selomit.

2 JUJUR TAON 15:16

Dung i dipecat Raja Asa ma si Maaka sian jabatanna songon na duma, hara ni na mambaen patung na so patut si Maaka di si Asera, debata ni hagabean i. Ditaporkon ia ma patung i masarge lalu ditutung ia di Rura Kidron.

2 JUJUR TAON 36:10

Di pargontian ni taon, dioban si Nebukadnesar ma si Joyakin tu Babel gabe tahanan, jana dohot do angka barang sigodang arga na adong di Bagas Ni Tuhan dioban ia muse. Dung i diangkat si Nebukadnesar ma si Zedekia angkang ni si Joyakin gabe raja di Juda dohot di Jerusalem.

2 JUJUR TAON 36:18

Sude do dirampas raja ni Babel i angka parkokas ni Bagas Ni Tuhan dohot angka barang-barang sigodang arga, songon i dohot sinadongan ni raja dohot angka pagawena i lalu dioban tu Babel.

ESRA 5:14

Salangkan angka parkokas sere dohot perak na dipake di bagasan Bagas Ni Tuhan i, jana i ma na dibuat ni si Nebukadnesar sian Jerusalem lalu dipamasuk ia tu bagasan kuil na di Babel. Dipasahat Raja Kores do angka parkokas i tu bayo na margoar si Sesbasar, i ma na niangkatnia gabe gubernur di Juda.

JEREMIA 27:7

Mangoloi tusia do sandok bangso, tu anaknia dohot tu pahompunia lopus dapot hatihana madabu bangsonia i. Anggo di hatiha i mangoloi ma bangso Babel tu angka bangso na gogo dohot tu angka raja na godang.

JEREMIA 50:35

Didok Tuhan ma, “Angkon dipatimpas Babel rap dohot rayat dohot parkuaso maradu barisan na malo marroha.

DANIEL 1:2

Dipaloas Tuhan do ia manaluhon Raja Joyakim dohot mangarampas deba sian angka barang sigodang arga na di Bagas Ni Tuhan. Angka halak na nitabannia, dioban ia ma i tu bagas parsombaan ni debatana di Babel jana angka barang-barang na nirampasnia i disimpan ia ma i di bagasan bagas parsombaan i.

DANIEL 5:11

Angke adong do di harajaan ni raja i sada bayo na nirajaan ni angka tondi ni debata na badia. Taran amanta ni raja i mamarenta tarida do bahaso na tutu bayo i maniop hapistaran, parbinotoan dohot bisuk, tudos tu habisuhon ni angka debata. Amanta ni raja i Raja Nebukadnesar madung mangangkat bayo i gabe pamimpin ni angka na malo manjujur, na malo marjampi-jampi, angka halak na marilmu dohot angka na umboto parhalaan.

DANIEL 5:13

Manigor ma si Daniel dioban mangadop tu jolo ni raja i. Jadi disapai raja i ma tusia, “Ho dehe si Daniel halak Jahudi na tarbuang na nioban ni damang sian tano Juda?

DANIEL 5:18

Dibaen Debata Na Gumincat i do si Nebukadnesar simatobang ni raja i gabe raja bolon jana dilehen tusia hagodangan bope habonggalan.

DANIEL 5:23

Padorgak diri do raja i maradopkon Na Markuaso di banua ginjang i jana puluk do raja i marsuru maroban masuk angka mangkuk na hona rampas sian Bagas Na Badia i. Dung i minum anggur ma raja i, angka na sangap, angka dadaboruna be songon i dohot angka gundik ni raja i sian mangkuk na ni rampas i. Dipuji-puji raja i do angka debata na dibaen sian sere, perak, tumbaga, bosi, hayu dohot batu, i ma angka debata na so marnida sanga marbinege sanga mangastui bagi aha. Nada dipasangap raja i Debata na manontuhon ngolu dohot hamamate ni raja i dohot na manontuhon pardalanan ni ngolu ni raja i.

DANIEL 5:3

Manigor dioban ma antong angka mangkuk i tusia, minum anggur ma halahi sudena sian panginuman i.

DANIEL 5:30

Laing di borngin i, hona bunu ma si Belsasar raja ni Babel i.

DANIEL 5:4

Dipuji-puji halahi muse ma angka debata na nibaen sian sere, perak dohot tumbaga, bosi, hayu dohot batu.