YAHYA 7:19 - Kitta' Passitallikang Bau KAREBA BAJI'
19 Gelejua Musa maengi assare hukkung Tora' mange ri kau? Mingka gele rie' manna se're tau ri kau lageokangi hukkung Tora' injo. Ngura Nakke muparri-parri a'ra' lamuhunoi?”
Sikonjo imang ponggaha na sikonjo guru Tora' lalangngere passala injo, na a'bojamu akkala daa lalahuno Isa, saba' iyai malla'i ri Isa, saba' tau lohe injo sanna' lannasinna ripangajaranNa.
Injomo saba'na, ponggaha tau Yahudi injo pela' a'ra'mu pole lalahuno Isa, gele sangga rikanara lapa'tide'na jua allo Passambajangang injo, mingka pole kanara rilapauna ma'nassana Allataala injo AmmanNa na ri appakonjona lapassinrapangi kalenna Allataala.
Ako sala pa'ngare' ma'nassana Nakkemo lamaressa ri kau ri a'rakanna Amma; tulamaressa injo mange ri kau iamo intu Musa, ya Musa tumange injoko ri ia appabora pattajalliang.
Rimaenna injo Isa a'lingka-lingkai a'lili' ri Galilea, saba' Ia gelei a'ra' a'lili' ri Yudea, saba' ri injo lohe ponggaha Yahudi tulusu a'ra'i lahuno Isa.
Musa innimo a'jari patteteang lalang ripa'rappunganna jamaah injo ri parang luara battu ri malaeka' appau injo mange ri ia ri Bonto Sinai na ri puwa-puwata; na iamo maeng narima sikonjo pau attallasa nulapabattu injo mae ri ditte.