1 YAHYA 1:3 - Kitta' Passitallikang Bau KAREBA BAJI'

³ Apa numaeng tajanjang surang numaeng talangngere, injo tapala'bang todo'i mange ri kau, solanna manna kau nguppa todo'mo passe're-se'reang surangang kambe. Na passe're-se'reang ri kambe iamo intu passe're-se'reang ri Amma surangang Ana'Na, Isa Almase.

1 YAHYA 1:3 Iomraidhean Croise

YAHYA 17:11

Nakke gelema rie' lalang ri lino, mingka iyai rie' juapai lalang ri lino, na Nakke battu mange ri Ditte. O Amma matangkasa, piarai iyai inni lalang arenTa, iamo intu arenTa numaeng Ripassareang injo mae ri Nakke, solanna iyai a'jari se're assimpole ditte.

YAHYA 17:21

solanna iyai ngase' a'jari se're, assimpole Ditte, o Amma, lalang ri Nakke na Nakke lalang ri Ditte, solanna iyai lalang todo'i ri ditte, solanna lino inni tappa'i ma'nassana Dittemo maeng assuro ri Nakke.

YAHYA 17:25

O Amma kaminang adele, toje'i lino inni geleKi laisse', mingka Nakke ngisse' ri Ditte, na iyai inni laisse'i ma'nassana Dittemo maeng assuro ri Nakke;

YAHYA 17:3

Iamo inni tallasa mannannungang, iamo intu ma'nassana iyai ngisse'i ri Ditte, Allataala tide' ruana, na laisseki todo'i Isa Almase Tumaeng injo Risuro.

YAHYA 19:35

Tau anjanjangi injo ripassala inni assa'bi na passa'bina toje'i nabana, na ia laisse'i ma'nassana ia nunaba lapau, solanna tappa' todo'ko.

PAU-PAUWANNA SIKONJO SURO-SURO 13:32

Konni-konnina kambe appabattu kareba pappakarannu mange ri kaui ma'nassana sapatta nulasareang injo mange ri puwa-puwata,

PAU-PAUWANNA SIKONJO SURO-SURO 13:41

Pariatisai, oe kau pasalla-salla intu, takkajanna'ko na lannya'moko, saba' Nakke laanggeokang se're jama-jamaang lalang rijammammu, se're jama-jamaang nugele akkulle lamukatappaki, ampa rilagarai mange ri kau.”

PAU-PAUWANNA SIKONJO SURO-SURO 2:42

Lapilangngeri ngase'i pappijo'jo'na suro injo na tulusu asse're-se're ngase'i. Iyai injo sanging paa'rappung laa'dahu-dahu kanre surang ngera dowaang.

PAU-PAUWANNA SIKONJO SURO-SURO 20:27

Saba' nakke gelea takkaluppa appau risikonjo pattujunna Allataala mange ri kaui.

PAU-PAUWANNA SIKONJO SURO-SURO 4:20

Saba' gele ma'ring ri kambe lagele a'bisara ripassala numaeng injo tajanjang surang talangngere.”

ROMA 15:27

Katappukang injo maeng lapassamaturuki ngase'i, na injo sitoje'na a'jari tanggongannai. Saba', ampa sikuanna tau maraeng maemmu nguppa dahuang rikasalamakanna tau Yahudi, injo sitoje'na parallu todo'i sikuanna tau maraeng laanjampangi tau Yahudi injo battu rikakalumannyang rie' injo ri iyai.

1 KORINTUS 1:30

Mingka rikanara Ia kau rie' lalang ri Isa Almase, nubattu ri Allataala maeng a'jari kasara'dekangi mae ri ditte. Ia appa'nabai na appakatangkasai surang allappasi ri ditte.

1 KORINTUS 1:9

Allataala, tuakkeo' injo ri kaui mange ripassamaturukang surangang Ana'Na Isa Almase, Karaengta, injo mallangi.

1 KORINTUS 15:1

Na konni-konnina, Urang siana', nakke a'ra'a appiu'rangi mange ri kaui ri Injili kupappissekang injo mange ri kaui na numutarima injo, na kau a'jari ammenteng ka'jang battu ri injo.

EFESUS 3:6

iamo intu ma'nassana tau gele injo Yahudi, kanara Injili, minahangi nguppa dahuang na bageang ri batangkale surang tuminahang lalang risapatta nuripassareang injo lalang ri Isa Almase.

FILIPI 1:7

Toje' siratammu nakke appikkiri appakonjo passala ri kau ngase', saba' kau ngase' rie' lalang ri atiku, rikanara minahangimmu nguppa dahuang lalang ripangamaseang nuripassareang injo mae ri nakke, baji' rihattungku rie' ri pattarungkuang, iyareka rihattungku assa'bi surang appakajarre' Kareba Injili.

FILIPI 2:1

Jari, kanara lalang ri Almase rie' pappakajarre', rie' panyihi-nyihi battu ripangamaseang, rie' passamaturukang battu ri Nyaha, rie' passikamaseangang na rie' pa'rikodongang,

FILIPI 3:10

Nukuminasai iamo intu tappa' mange ri Ia surang nguppa kahasa riattallasa'-Na muliang na passamaturukang lalang rikasissaan-Na, na anteekamua akkullea assimpole Ia lalang rikamatean-Na,

KOLOSE 1:13

Ia maeng lalappasangki battu rikahasa kalammang na lapalette'ki antama' ri Pakkaraengang Ana'Na nulakamaseang injo;

1 TESALONIKA 1:10

na attajang pariekanna Ana'Na battu ri suruga, numaeng lapakaattallasa injo muliang Allataala battu ritangnga-tangngana tau mate, iamo intu Isa, tuappakasalama' injo ri ditte battu rikuku'na Allataalla nularie' injo sallo'.

IBRANI 2:12

pauNa: ”Nakkemo laappala'bang AremMu mange risikonjo urang siana'Ku na appakala'biri ri Kau ritangnga-tangngana jamaah,”

IBRANI 3:1

Injomo saba'na, Urang siana' julu katappakang, tunguppa injo dahuang ripakkeo'na Allataala, pariatimu Isa, Suro na Imang Bakka' nuriakui injo,

IBRANI 3:14

Saba' ditte maeng a'jari dahuang battu ri Almase, ampa a'bitantang jarre'ki rikatappakang surang ripattajalliang nuripa'bangga-banggaang sa'genna ambattu mange rikala'busang.

1 PETRUS 5:1

Nakke appaiu'rangi mange risikonjo tutoa-toa ri kau, nakke todo' uranna tutoa-toa injo surang sa'bi kasissaanna Almase, ri tunguppa injo todo' dahuang lalang ri kala'birang nularipappijanjangang injo sallo'.

2 PETRUS 1:16

Saba' kambe gelekang minahang ritula-tulaanna rupatau inni nutide' injo matu-matunna, rihattu tappappiissekanna mange ri kau kahasa na pariekanna Karaengta, Isa Almase assimpole Karaeng, sibale'na kambemo sa'bi battu rikabakkakanNa.

1 YAHYA 1:1

Apa numaeng rie' ripakaramulana, numaeng talangngere, numaeng tajanjang mata, numaeng tasa'bikang surang numaeng takaraha ri limamba passala Pau katallasang, injomo taukiri mange ri kau.

1 YAHYA 1:5

Iamo inni kareba numaeng talangngere battu ri Ia na tapabattui mange ri kau: Allataala intu sinara na lalang ri Ia tide' nukalammang manna siso'di'.

1 YAHYA 1:7

Mingka ampa ditte tallasa lalang risinara assimpole Ia rie' lalang risinara, injo ditte nguppaki passe're-se'reang surangang tau maraeng, na rarana Isa, Ana'Na injo, laappakatangkasa ri ditte battu risikonjo kadorakaang.