प्रकाश 8:3 - केवट नया कारार

³ ओत्तेसे, आरहौ एकटा स्वर्गदूत ऐलै आर धुपके वेदी लगत खडा भेलै। ऊ स्वर्गदूत धुप जराबैके लिए सोनाके धुपदानी ल्याके ऐलै आर ओकरा सभे आदमीसिके प्रार्थनाके सहित जराबैके लिए बहुते धुप देल गेलै। ऊ धुप आर प्रार्थनासिके उटा सोनाके धुपके वेदीके उप्परमे जर्या देल्कै, जे परमेश्वरके सिंहासनके समनामे रहै।

प्रकाश 8:3 Iomraidhean Croise

लूका 1:10

धुप जराबैके समयमे आदमीसिके भीड बाहार परमेश्वरके मन्दिरके ऐगनमे प्रार्थना कर्ते रहै।

रोमी 8:34

कोय भी आपनसिके निन्दा नैकरे सकैछै कहिनेकी ऊ येशू ख्रीष्ट छै, जे आपनसिके लिए मर्लै आर मुर्दासे जिन्दा बनैल गेलै रहे, आर परमेश्वरके दहिना हातके बगलमे छै, आर आपनसिके तरफसे आपनसिके लिए भी बिन्ती करैछै।

हिब्रू 7:25

इहे ल्याके जे येशूके द्वारा परमेश्वरके नज्दिक आबैछै, ऊ ओकरासिके सभे दिन बचाबे सकैछै। कहिनेकी ऊ ओकरसिके लिए बिन्ती करैके लिए सभे दिन जिन्दा छै।

हिब्रू 9:4

यी कोठामे सोनाके एकटा वेदी रहै, जकर इस्तमाल धुप जराबैके लिए कैल जैते रहै। आर ओत्ते एकटा सन्दुक भी रहै जे भितर-बाहार सोनाके पत्तर चढैल रहै। ऊ सन्दुकके करारके सन्दुक कहेल जैते रहै। सन्दुकके भितरमे तीनटा चीज रहै। सभैसे पहेला एकटा सोनाके वर्तन रहै, जकरामे एकटा विशेष भोजन रहै जकरा “मन्न” कहेल जैते रहै। एकरामे हारुनके लाठी भी रहै जकरामे टुसा लाग्ल पत्ता रहै। अन्तमे, एकरामे पत्थलके दीटा पाटी रहै, जकरापर परमेश्वर उटा दशटा आज्ञा लिखल्कै रहे, जे ऊ मूसाके देल्कै रहे।

प्रकाश 10:1

तकरबाद हमे एकटा दोसर शक्तिशाली स्वर्गदूतके स्वर्गसे उतरिके निच्चा ऐते देख्लियै। एकटा बादल ओकर चारो तरफ रहै आर एकटा मेघ-धनुष ओकर मथाके चारो तरफ रहै। ओकर चेहरा सुरुजके जुगुर चमकते रहै आर ओकर पैर आगिनके खम्भाके जुगुर रहै।

प्रकाश 14:18

तखनिहैं आरहौ एकटा स्वर्गदूत जे कि छठमा स्वर्गदूत छै जे धुप वेदीपर आगिनसे धुप जराबैके जिम्मेदारी पुरा करैछै, ऊ ओत्तेसे बाहार निकल्लै। ऊ जोरसे उटा स्वर्गदूतके जकर हातमे धराहा कचिया छै ओकरा कहैल्कै, “धर्तीपर अंगुरसिके गुच्छा पाकी गेलै छे। ओकरासिके आपन धराहा कचियासे कटनी करि ले।”

प्रकाश 5:8

जब ऊ उटा किताब लेल्कै ते, ऊ चारोटा जिन्दा प्राणी आर चौबीसोटा धरमगुरुसब बलि-भेंडाके समनामे झुकी गेलै। आर हरेक धरमगुरुसब एकटा वीणा आर सोनासे बन्ल बाटी पकडले रहै। बाटी धुपसे भर्ल रहै, जे ऊ आदमीसिके प्रार्थनाके देखाबैछै जेसब परमेश्वरके सेवा करैछै।

प्रकाश 6:9

जब बलि-भेंडा पचमा मोहर खोलल्कै, तब हमे वेदीके निच्चामे देख्लियै, ओत्ते ऊ आदमीसिके आत्मासब रहै, जेसब मार्ल गेलै रहे कहिनेकी ऊसब परमेश्वरके वचनके घोषणा कैल्कै रहे आर ऊसब येशू ही ओकरसिके प्रभु छै कहिके आपन विश्वाससे पाछु नैहट्लै रहे।

प्रकाश 8:4

स्वर्गदूतके द्वारा जरैल गेल धुपसे निक्लेवाला धुवाँ परमेश्वरके आदमीसिके प्रार्थनासिके संगे उप्पर परमेश्वरके समनामे पहुँचलै।

प्रकाश 8:5

तब स्वर्गदूत धुपदानी ल्याके एकरा वेदीके उप्परमे बरेवाला आगिनसे भरि देल्कै आर धर्तीमे फेकि देल्कै। तब मेघ-गर्जनके जुगुर गडगडाहटके आवाज निक्ले लाग्लै, बिजली चम्के लाग्लै आर भूकम्प भेलै।

प्रकाश 9:13

एकरबाद छठमा स्वर्गदूत आपन धुतहुक फुकल्कै। जब ऊ एकरा फुकल्कै ते हमे परमेश्वरके समनामे धुप जराबेवाला सोनाके वेदीके चारो कोनामेसे एकटा आवाज सुन्लियै।