प्रकाश 4:11 - केवट नया कारार

¹¹ “हे हमरसिके प्रभु परमेश्वर, तुहें सभे चीजसिके सृष्टि कैलह छे। तोरे इच्छाके मुताबिक उटा सभे चीज बनैल गेलै छे आर उटा सभे अस्तित्वमे छै। इहे कारणसे तुहें महिमा, आदर आर शक्ति ग्रहण करैके योग्य छह।”

प्रकाश 4:11 Iomraidhean Croise

चुन्ल आर भेज्ल चेलासब 14:15

“तुहेंसब कथिले एरं करैछ? हम्हुँसब ते तोरेसिके जुगुर दुःखसुख भोगेवाला आदमी छियै, आर तोरासिके यी बेकारके चीजसे जिन्दा परमेश्वरमहर आब कहिके खुश-खबरी सुनाबैछियै, जे परमेश्वर आकाश, धर्ती, समुन्दर आर एकरामे भेल सभे चीज बनैल्कै।

चुन्ल आर भेज्ल चेलासब 17:24

परमेश्वर, जे संसार आर ओकरामे भेल सभे चीजसब बनैल्कै, ऊ आकाश आर धर्तीके मालिक हुऐके कारणसे हातसे बनैल मन्दिरमे ऊ बास नैकरैछै।

रोमी 11:36

कहिनेकी सभे कुछु परमेश्वरसे आबैछै। ऊ सभे कुछु बनैल्कै छे, आर सभे चीज ओकरे छै। ओकरा सभे दिन महिमा मिल्ना चाही! आमेन!

एफिसी 3:9

आर सभे आदमीके यी नुकैल योजनाके बारेमे सम्झाबैके लिए सभे चीजके सृष्टि करेवाला परमेश्वर यी बात शुरुसे ही नुक्याके राखल्कै छे।

हिब्रू 1:10

आर धरमशास्त्र भी कहैछै, “हे प्रभु, शुरुमे तुहें धर्तीके रचना कैलह, आर तुहें उटा सभे कुछु बनैलह जे आकाशमे छै।

हिब्रू 1:2

मगर यी अन्तके दिनसिमे ऊ आपन बेटाके द्वारा आपनसिसे बोल्लै छे। परमेश्वर आपन बेटाके द्वारा सारा संसारके रचना कैल्कै आर ओकरा सभे चीजसिके उत्तराधिकारी बनैल्कै।

प्रकाश 10:6

आर सभे दिन जिन्दा रहेवाला आर स्वर्ग, धर्ती आर समुन्दर आर ओकरामे भेल सभे चीजसिके सृष्टि करेवालाके नाममे कसम खैके ऊ कहैल्कै, “आब कोनो भी बातके लिए आरहौ इन्तजार नैकरे पड्तै। आब उटा सभे बात पुरा भ्याजैतै।”

प्रकाश 14:7

ऊ बडका आवाजमे कहैल्कै, “परमेश्वरसे डर आर ओकरा सम्मान दहैं। कहिनेकी आदमीसिके फैसला करैके एखन ओकर समय छै। ओकरा झुकिके आराधना कर कहिनेकी उहे छै जे स्वर्ग, धर्ती, समुन्दर आर पानीके झरनासिके सृष्टि कैल्कै छे।”

प्रकाश 19:1

जब शक्तिशाली स्वर्गदूत बोलैले बन्द कैल्कै तब हमे जे सुन्लियै ऊ एरं रहै जेरं कि स्वर्गमे बहुते आदमीसब गीत गाबैछै, “परमेश्वरके स्तुति है! उद्धार, महिमा आर शक्ति हमरसिके परमेश्वरके छै।

प्रकाश 5:12

ऊसब जोर-जोरसे गैते रहै, “ऊ बलि-भेंडा जकर जान मारि देल गेलै रहे, ऊ महिमाके योग्य छै। ओकर अधिकार महान छै। ओकर बुद्धि गहरा छै। ऊ बहुते शक्तिशाली छै आर ऊ बहुते मातबर छै। या अपनासब ओकर आदर करैछियै। या अपनासब ओकर प्रशंसा करैछियै।”

प्रकाश 5:2

तब एकटा शक्तिशाली स्वर्गदूतके बडका आवाजमे एरं कहते हमे देख्लियै, “यी किताबके मोहरसिके तोडैके आर एकरा खोलैके अधिकार ककर लगत छै?”

प्रकाश 5:9

ऊसब यी नया गीत बलि-भेंडा यानिकी येशू ख्रीष्टके विषयमे गाबैछै, “तोरलगत यी किताबके खोलैके लिए मोहरसिके लियैके आर तोडैके अधिकार छै, कहिनेकी तोर जान मारि देल गेल्हौं रहे आर आपन मौतके खूनसे तुहें हरेक कुलसब, हरेक भाषासब, आदमी आर हरेक जात-जातके आदमीसे, परमेश्वरके लिए आदमीसिके मोल चुक्याके किनि लेलह छे।