प्रकाश 3:8 - केवट नया कारार

⁸ हमे जानैछियै कि तुहें कि करैछैं। हमे जानैछियै कि तुहें बहुते मजगुत नैछैं। मगर जे हमे तोरा कहैलियौ ओकर तुहें पालन कैल्हैं छे। तुहें हमरापर निरन्तर विश्वास करैछैं। सेल्याके, हमे तोर लिए एकटा केबाड खोल्लियौ छे, जकरा कोय भी बन्द नैकरे सकैछै।

प्रकाश 3:8 Iomraidhean Croise

लूका 12:9

मगर जे भी हमरा आदमीसिके समनामे खुदके हमर चेलाके रुपमे स्वीकार नैकर्तै, हम्हुँ ओकरा स्वर्गमे परमेश्वर पिताके स्वर्गदूतसिके समनामे हमर चेलाके रुपमे स्वीकार नैकर्बै।

यूहन्ना 15:20

जे बात हमे तोरासिके बतैलियौ छे ओकरा तुहेंसब याद राख, ‘नोकर आपन मालिकसे बढिके नैहैछै।’ यदि ऊसब हमरा सतैल्कै छे ते तोरहौसिके सतैतौ। ऊसब हमर शिक्षा पालन कर्तौ ते तोरसिके शिक्षा भी पालन कर्तौ।

यूहन्ना 17:6

“तुहें जे आदमीसिके संसारसे चुनिके हमरा देल्ह, ओकरासिके हमे यी बतैलियै कि तुहें के छह। ऊसब तोर रहै, आर ओकरासिके तुहें हमरा देल्ह, आर ऊसब तोर शिक्षाके पालन कैल्कै छे।

चुन्ल आर भेज्ल चेलासब 14:27

ओत्ते पहुँचीके ऊसब एन्टीओखिया सहरके मण्डलीके जमा करैल्कै आर कहैल्कै कि परमेश्वर हमरसिके संगे भ्याके केरं बडका-बडका काम कैल्कै आर गैर-यहूदी आदमीसिके परमेश्वर केरंके येशू ख्रीष्टमे विश्वास करैके लिए सक्षम बनैल्कै।

१ कोरन्थी 16:9

हमरलगत एत्ते प्रभावशाली रुपसे काम करैके एकटा बडका अवसर छै, भला ही बहुते आदमीसब छै जे हमर विरोध करैछै।

२ कोरन्थी 2:12

आर जब हमे ख्रीष्टके खुश-खबरी प्रचार करैके लिए त्रोआस सहरमे ऐलियै, ओत्ते परमेश्वर हमरा खुश-खबरी प्रचार करैके महान अवसर देल्कै।

फिलिप्पी 4:13

ख्रीष्टके द्वारा जे हमरा शक्ति दैछै ओकर सहायतासे हमे सभे कुछु करे सकैछियै।

कलस्सी 4:3

आर एकर साथे-साथ हमरसिके लिए भी प्रार्थना कर कि परमेश्वर हमरासिके ख्रीष्टके सन्देश सुनाबैके लिए एकटा मौका दै कि हमे ख्रीष्टके उटा रहस्यके वर्णन करे सकियै जकर खातिर हमे एखन जेलमे पडल छियै।

१ तिमोथी 5:8

अगर कोय आपन रिश्तेदारसिके, खास करिके आपन परिवारके आदमीसिके देखभाल नैकरैछै ते एकरासे साफ जाहीर हैछै कि ऊसब येशू ख्रीष्टमे विश्वास नैकरैछै आर विश्वास नैकरेवाला आदमीसे भी खराब छै।

२ तिमोथी 4:7

जेरंके एकटा बढियाँ सिपाही युद्धमे लडाई करैके समयमे कहियो हार नैमानैछै, हमे भी ख्रीष्टके लिए कडा मेहनत करैले कहियो भी नैछोडलियै छे। हमे येशू ख्रीष्टके द्वारा हमरा देल काम पुरा कैलियै छे। हमे अन्ततक ख्रीष्टके प्रति विश्वासयोग्य भेल छियै।

यहूदा 1:4

हमे तोरासिके लिखैछियौ कहिनेकी कुछु आदमीसब जे येशू ख्रीष्टमे विश्वास करैके दिखावा करैछै, ऊसब तोरसिके मण्डलीमे सामिल भ्या गेलौ छे। ऊसब परमेश्वरके सम्मान नैकरैछै आर ऊसब एरं कहिके गलत शिक्षा दैछै, कहिनेकी परमेश्वर आपन अनुग्रहसे आपनसिके पापसिके माफ करि दैछै, इहे ल्याके अपनासब अनैतिक जीवन जिये सकैछियै। ऊसब येशू ख्रीष्टके अस्वीकार करैछै, जे आपनसिके एक्केटा मालिक आर आपनसिके प्रभु छै। बहुते समय पहेला धरमशास्त्र कहैछै कि परमेश्वर एरं आदमीसिके सजाय देतै।

प्रकाश 2:13

हमे जानैछियै कि तोर सहर शैतानके कब्जामे छौ, मगर एकर बावजुद भी तुहें हमरापर आपन विश्वासके मजगुतसे पक्डीके राख्लहैं छे आर तुहें हमर शिक्षासिके नैछोडलहैं छे, एत्तेतक कि तखनी भी नै जब बहुते समय पहेला एन्टिपासके जान मार्ल गेलै रहे। ऊ हमर वचनके प्रचार करैमे विश्वासयोग्य रहै, इहे ल्याके ओकरा तोर सहरमे जान मार्ल गेलै जे सहर शैतानके कब्जामे छै।

प्रकाश 2:2

हमे जानैछियै कि तुहें कि करैछैं। तुहें पुरा मेहनतसे हमर काम करैछैं, हमरापर विश्वास करैके कारण जब तोरा सतैल जैछौ तैय्योपर भी तुहें सहैछैं। हमे जानैछियै कि तुहें दुष्ट आदमीसिके स्वीकार नैकरैछैं। तुहें एरंको आदमीसिके जाँच कैल्हैं छे, जे झुट्ठा दावा करैछै कि ऊसब चुन्ल आर भेज्ल चेला छै आर तुहें बुझी गेल्हैं छे कि ऊसब झुट्ठा छै।

प्रकाश 22:7

येशू कहैछै, “हमे जल्दी ही आबैछियै। यी किताबमे लिख्ल भविष्यवाणीके बातसिके पालन करेवालासब धन्यके छै।”

प्रकाश 3:1

सार्डिस सहरके मण्डलीके स्वर्गदूतके यी सन्देश लिख: हमे उहे छियै जे सातटा तारासिके आपन हातमे पक्डीके राखैछै आर जे परमेश्वरके सात आत्मासिके भेजैछै। हमे जानैछियै कि तुहें कि करैछैं। तुहें विश्वासयोग्य विश्वासीसिके जुगुर दिखाई दैछैं, मगर वास्तवमे तुहें आब हमर अनुसरण नैकरैछैं।

प्रकाश 3:10

तुहें हमर सन्देशके पालन कैल्हैं ताकी जब तुहें दुःख उठाभैं ते ओकरा धीरजके साथ सहे सक्हैं। इहे कारण, हमे तोरा बडका परीक्षाके समयमे तोर रक्षा कर्बौ। परीक्षाके यी समय संसारके सभे आदमीसिपर ऐतै।

प्रकाश 3:15

हमे जानैछियै कि तुहें कि करैछैं। तुहें नैते हमरापर भेल आपन विश्वासके इन्कार करैछैं आर नैते हमरा पुरा मनसे प्रेम करैछैं। हमे चाहैछियै कि या ते तुहें हमरा इन्कार करि दे या हमरासे पुरा मनसे प्रेम कर।

प्रकाश 3:7

आर फिलाडेल्फिया सहरके मण्डलीके स्वर्गदूतके यी सन्देश लिख: हमे उहे छियै जे पवित्र आर सच छै, जकर लगत दाऊद राजाके राज्यपर अधिकार छै। यदि हमे दरवाजा खोलैछियै ते कोय भी ओकरा बन्द नैकरे सकैछै। आर यदि हमे ओकरा बन्द करिदियै ते, कोय भी ओकरा नैखोले सकैछै। हमे तोरासे यी कहैछियौ।