प्रकाश 2:16 - केवट नया कारार

¹⁶ सेल्याके पाप करैले छोडिके परमेश्वरके तरफ मन लगा, यदि तुहें खराब काम करैले बन्द नैकर्भैं ते, हमे जल्दी ही ऐबै आर जे आदमीसब गलत शिक्षा दैछै ओकरसिके विरुद्ध तलवारसे लडाई कर्बै, जे हमर मुखसे निक्लैछै जे हमर वचन छै।

प्रकाश 2:16 Iomraidhean Croise

एफिसी 6:17

जेरंके एकटा सिपाही लडाईमे आपन मथाके बचाबैके लिए टोपी लगाबैछै, ओहिने करिके परमेश्वर तोरासिके शैतानसे बचाबौ। जेरंके एकटा सिपाही खुदके बचाबैके लिए एकटा तलवार लैछै, ओहिने करिके खुदके बचाबैके लिए परमेश्वरके वचनके उपयोग कर। यी पवित्र आत्माके तरफसे छै।

२ थेसलोनिकी 2:8

सेल्याके, जब ख्रीष्ट विरोधीके रोकेवाला चीजके हटैल जैतै तब येशू ख्रीष्ट दिखाई पड्तै। तब उटा ख्रीष्ट विरोधीके प्रभु येशू नाश करैके आदेश द्याके आर ओकर फेर वापस आबैके महिमा देख्याके शक्तिहीन बनैतै।

प्रकाश 1:16

ओकर दहिना हात ल्याके सातटा तारासब पक्डीके राखल्कै रहे आर ओकर मुखसे धर्हा दी धारवाला तलवार निकल्ल रहै। ओकर चेहरा दिपहरियाके समयमे चमकेवाला सुरुजके जुगुर चमकते रहै।

प्रकाश 16:9

आदमीसब यी कडा रौदसे झर्की गेलै आर ऊसब परमेश्वरके अपमान कैल्कै, कहिनेकी उहे ही रहै जकर लगत उटा विपत्तिसिपर अधिकार रहै। ऊसब आरहौ भी पाप करैले छोडिके परमेश्वरके तरफ मन नैलगैल्कै, ऊसब आरहौ भी परमेश्वरके महानताके स्वीकार नैकैल्कै।

प्रकाश 19:15

ओकर मुखसे एकटा धरहा तलवार निकल्लै जकरासे ऊ जात-जातके आदमीसिके पराजय करि देतै। जे कोय भी ओकर अधिकारके स्वीकार नैकरैछै, ऊ ओकरा पुरा तरहसे सजाय देतै। ऊ सर्वशक्तिमान परमेश्वरके भयानक प्रकोपके ओहिने ही छोडी देतै, जेरंके एकटा अंगुरके रसकुण्डसे अंगुरके मद्द बहैछै।

प्रकाश 19:21

एकरबाद, ऊ जे घोडापर सवार रहै आपन मुखसे निक्लेवाला तलवारके इस्तमाल करिके बाँकी सभैके जान मारि देल्कै। तब आकाशके चिडियासब तबतक लासके मास खैते रहलै जबतक कि ओकरसिके पेट नैअघैलै।

प्रकाश 2:12

पर्गामम सहरके मण्डलीके स्वर्गदूतके यी सन्देश लिख: हम्हीं छियै जकर लगत धर्हा दी धारवाला तलवार छै। हमे तोरासे यी कहैछियौ:

प्रकाश 2:5

सेल्याके याद कर कि तुहें शुरुआतमे हमरासे केरं प्रेम कर्ते रहैं आर आब तुहें हमरा ओरंको प्रेम नैकरैछैं। यी बातसे पाप करैले छोडिके हमर तरफ मन लगा। हमरासे उहे तरहसे प्रेम करना शुरु कर जेरं तुहें शुरुआतमे कर्ते रहैं। यदि तुहें परिवर्तन नैहैभैं ते, हमे तोरलगत ऐबौ आर हमे दियाके ओकर जगहसे हट्याके तोरा सजाय देबौ।

प्रकाश 22:20

येशू यी सभे वचनसिके गवाही दैछै आर कहैछै, “हँ, हमे जल्दी ही आबैछियै।” हमे यूहन्ना जबाब देलियै, “आमेन, हे प्रभु येशू, आब।”

प्रकाश 22:7

येशू कहैछै, “हमे जल्दी ही आबैछियै। यी किताबमे लिख्ल भविष्यवाणीके बातसिके पालन करेवालासब धन्यके छै।”

प्रकाश 3:19

हमे जकरा भी प्रेम करैछियै, ओकरा हमे सिखाबैछियै आर सजाय दैछियै ताकी ऊसब बढियाँ बनी जै। सेल्याके बढियाँ काम करैमे लाग्ल र, पाप करैले छोड आर परमेश्वरके तरफ मन लगा।