प्रकाश 2:10 - केवट नया कारार

¹⁰ उटा तकलीफसिसे नैडर जे तोरा मिल्तौ। शैतान तोरासिमेसे कुछु आदमीसिके गिरफ्तार करवैतौ आर तोरासिके कैद करि देल जैतौ ताकी ऊ तोरसिके परीक्षा करे सकौ। तुहें दश दिनतक बडका कष्टके अनुभव कर्भैं। मगर हमरापर विश्वास करैले कहियो नैछोडिहैं, चाहे तोर जान भी मारि देल जौ, कहिनेकी हमे तोरा जितके पुरस्कारके रुपमे कहियो खतम नैहुएवाला जीवन देबौ।

प्रकाश 2:10 Iomraidhean Croise

मत्ती 10:22

कहिनेकी तुहेंसब हमर चेलासब छैं ओकर खातिर सभैसे घृणा कैल जैभैं, मगर ऊ जे हमरापर भरोसा करैमे लाग्ल रहैछै आर धर्तीपर ओकर जीवनके अन्ततक हमर पाछु चल्ते रहैछै। ओकरा पापसिके लिए दण्डित हुऐसे बचैल जैतै।

मत्ती 10:28

ऊ आदमीसिसे नैडर जे शरीरके मारि दैछै, मगर आत्माके मारे नैसकैछै। बरु आत्मा आर शरीर दोनोके नरकमे नाश करेवाला परमेश्वरसंगे डर।

मत्ती 24:13

मगर जे यी धर्तीपर आपन जीवनके अन्ततक हमर पाछु चल्ते रहैछै, परमेश्वर ओकरासिके बचैतै।

मर्कूस 13:13

कहिनेकी तुहेंसब हमर चेलासब हुऐके खातिर सभैसे घृणा कैल जैभैं। मगर ऊ जे हमरापर भरोसा करैमे लाग्ल रहैछै आर धर्तीपर ओकर जीवनके अन्ततक हमर पाछु चल्ते रहैछै, ओकरा पापसिके लिए दण्डित हुऐसे बचैल जैतै।

मर्कूस 8:35

कहिनेकी जे यी धर्तीपर आपन जीवन बचाबैके कोशिश कर्तै, ऊसब सच्चा जीवन नैपाबे सक्तै। मगर तुहेंसब जे हमर कारण आर खुश-खबरीके कारण आपन जीवन दैछैं, सच्चा जीवन पैभैं।

लूका 21:12

मगर यी सभे बात हुऐसे पहेला, आदमीसब तोरासिके हमर अनुसरण करैके कारणसे पकड्तौ, आर सतैतौ आर तोरासिके स्थानीय महासभामे ल्याजैतौ आर यहूदी आदमीसिके सभाघरमे ध्या देतौ। तुहेंसब राज्यपालसब आर राजासिके समनामे परीक्षणके लिए खडा करैल जैभैं।

यूहन्ना 12:25

कहिनेकी जे यी धर्तीपर आपन जीवन बचाबैके कोशिश कर्तै, ऊसब सच्चा जीवन नैपाबे सक्तै। मगर तुहेंसब जे हमर कारण आपन जीवन दैछैं, कहियो खतम नैहुएवाला जीवन पैभैं।

यूहन्ना 13:2

येशू आर ओकर चेलासब रातके खाना खैते रहै। शैतान पहलहैसे ही येशूके धोखा दियैके लिए सिमोनके बेटा यहूदा स्करियोतके मनमे डाली चुक्लै रहे।

यूहन्ना 13:27

यहूदा रोटीके टुकरा लेलके बाद, येशू ओकरा कहैल्कै, “तुहें जे करेवाला छैं उटा जल्दी कर।” ऊ समयमे शैतान यहूदाके आपन वशमे कैल्कै।

चुन्ल आर भेज्ल चेलासब 20:24

मगर हमे आपन जीवनके कोनो मोलके आर आपन लिए प्रिय नैसोचैछियै। हमे खाली एतनें चाहैछियै, कि परमेश्वरके अनुग्रहके खुश-खबरीके गवाही दियैले हमर दौड आर प्रभु येशूसे हमरा मिल्ल हमर सेवकाई हमे पुरा करे सकियै।

चुन्ल आर भेज्ल चेलासब 21:13

मगर पावल जबाब देल्कै, “तुहेंसब एरंके कानीके कथिले हमर मन दुःखी बनाबैछैं? हमे ते प्रभु येशूके कारण यरूशलेम सहरमे खाली बान्हल जैके लिए ही नै, मगर मरैके लिए भी तैय्यार छियै।”

१ कोरन्थी 9:25

दौडमे हिस्सा लिए चाहेवाला आदमीसब पहेला अभ्यास करैछै आर खुदके अनुशासनमे राखैछै। ऊसब एरं इहे ल्याके करैछै ताकी ऊसब जिते सकै आर आदर पाबे सकै। ओकरासिके आदर करैके लिए ओकरासिके फूलके मल्ला लग्या दैछै जे बहुते समयतक नैरहैछै। मगर येशू ख्रीष्टमे विश्वास राखेवाला सभेको आदर पैतै आर अपनासिके देल आशिष सभे दिन रहतै। सेल्याके अपनासिके खुदके अनुशासनमे राखना चाही।

एफिसी 2:2

उटा समयमे तुहेंसब परमेश्वरके नैचिन्हेवाला यी संसारके आदमीसिके तौर-तरिकामे चल्लहैं। आर तुहेंसब शैतानके आज्ञापालन कर्ते रहैं, जे ब्रम्हाण्डमे भेल भूतसिपर शासन करैछै, जे एखन भी परमेश्वरके आज्ञापालन नैकरेवाला आदमीसिके नियन्त्रण करैके कोशिश करैछै।

एफिसी 6:12

कहिनेकी आपनसिके लडाई आदमीसिके विरुद्धमे नैछै, मगर एकर बदलामे अपनासब भूत आर ओकरसिके अगुवासिके विरुद्धमे लडाई करैछियै, जे यी अनहारके संसारमे शासन करैछै, अपनासब ब्रम्हाण्डके दुष्ट शक्तिसिके विरुद्धमे लडाई करैछियै।

याकूब 1:12

ऊ आदमी धन्यके छै, जे परीक्षामे स्थिर रहैछै, कहिनेकी ऊ आपन विश्वास साबित कैलके बाद ऊ कहियो खतम नैहुएवाला जीवनके मकुट पैतै, जे परमेश्वरके प्रेम करेवाला आदमीसिके दियैके वादा परमेश्वर कैल्कै छे।

१ पत्रुस 5:4

जब येशू ख्रीष्ट फेर वापस ऐतै, जे आपनसिके प्रमुख चरवाहा छै, तब तोरासिके एकटा सुन्दर मकुट देतौ, जकर चमक कहियो कम नैहैतै।

१ पत्रुस 5:8

सचेत र आर होशियार र, कहिनेकी शैतान, तोर दुश्मन तोरापर हमला करैले चाहैछौ ताकी तुहें परमेश्वरके आज्ञापालन नैकर। ऊ गर्जेवाला शेरके जुगुर छै जे खोजैछै कि ऊ ककरा ख्या सकैछै।

प्रकाश 13:14

बहुते आदमीसब दोसर जंगली जानवरके झुट्ठा चमत्कारसिसे प्रभावित भ्याके धोखा खैल्कै जे उटा पहेलावाला जंगली जानवरके शक्तिसे कैल्कै रहे। दोसर जंगली जानवरके द्वारा आदमीसिके कहेल गेलै कि ऊसब पहेलावाला जंगली जानवरके पूजा करैके लिए एकटा मूर्ति बनाबै, जे हतियारसे घायल भ्यागेलै रहे, मगर फेरसे ठीक भ्यागेलै रहे।

प्रकाश 13:2

यी जंगली जानवर जकरा हमे देख्लियै से चितुवाके जुगुर रहै, मगर ओकर पैर भालूके पैरके जुगुर रहै आर ओकर मुख शेरके मुखके जुगुर रहै। ऊ विशाल अजगर यी जंगली जानवरके आपन शक्ति देल्कै आर ओकरा यी धर्तीपर शासन करैके अधिकार देल्कै।

प्रकाश 13:7

ऊ जंगली जानवरके परमेश्वरके आदमीसिके संगे लडाई करैके आर ओकरासिपर विजय प्राप्त करैके अधिकार प्राप्त भेलै। आर ओकरा हरेक जात, हरेक कुलसब, हरेक भाषासब आर हरेक देशके आदमीसिपर शासन करैके अधिकार प्राप्त भेलै।

प्रकाश 17:14

ऊसब बलि-भेंडाके विरुद्धमे लडै कर्तै मगर बलि-भेंडा ओकरासिके परास्त करि देतै कहिनेकी ऊ प्रभुसिके प्रभु आर राजासिके राजा छै। ऊ ओकरासिके आपन बोलैल, चुन्ल आर विश्वासयोग्य अनुयायीसिके संगे परास्त करि देतै।”

प्रकाश 2:13

हमे जानैछियै कि तोर सहर शैतानके कब्जामे छौ, मगर एकर बावजुद भी तुहें हमरापर आपन विश्वासके मजगुतसे पक्डीके राख्लहैं छे आर तुहें हमर शिक्षासिके नैछोडलहैं छे, एत्तेतक कि तखनी भी नै जब बहुते समय पहेला एन्टिपासके जान मार्ल गेलै रहे। ऊ हमर वचनके प्रचार करैमे विश्वासयोग्य रहै, इहे ल्याके ओकरा तोर सहरमे जान मार्ल गेलै जे सहर शैतानके कब्जामे छै।

प्रकाश 2:9

हमे जानैछियै कि तोरा सतैल गेलौ छे आर तुहें गरिब छैं। मगर आत्मिक बातमे तुहें बहुते मातबर छैं। हमे ऊ आदमीसिके विषयमे जानैछियै जेसब दावा करैछै कि ऊसब परमेश्वरके चुन्ल आदमीसब यानिकी यहूदी आदमीसब छै, मगर नैछै। ऊसब तोर विषयमे अपमानवाला बात बोलैछै, मगर वास्तवमे ऊसब उटा दलके सदस्य छै जे शैतानके छै।