प्रकाश 11:7 - केवट नया कारार

⁷ जब ऊ दीटा गवाहसब परमेश्वरके सन्देशके प्रचारके काम समाप्त करि लेतै ते, ऊ जंगली जानवर जे अथाहा कुण्डसे बाहार निकल्तै, यी जंगली जानवर ऊ दोनो गवाहके संगे लडाई करिके ओकरासिके हरैतै आर ओकरसिके जान मारि देतै।

प्रकाश 11:7 Iomraidhean Croise

लूका 13:32

येशू ओकरासिके कहैल्कै, “जैके ऊ आदमीके कह जे एकटा खटिहाके जुगुर चलाक छै, ‘देख, ऐज आर क्याल हमे भूतके भगैबै आर बेमारीसिके ठीक करेवाला काम कर्बै आर तेसर दिन हमे हमर काम पुरा कर्बै।’

लूका 8:31

ऊ भूतसब हमरासिके अथाहा कुण्डमे नैभेज कहिके येशूसे बिन्ती करे लाग्लै।

यूहन्ना 17:4

जे काम तुहें हमरा करैले देल्ह, ऊ पुरा करिके हमे तोरा यी धर्तीमे महिमित बनैलिहौं छे।

यूहन्ना 19:30

येशू उटा चाखल्कै आर कहैल्कै, “पुरा भ्यागेलै” आर ऊ आपन मुडा झुक्याके मरि गेलै।

चुन्ल आर भेज्ल चेलासब 20:24

मगर हमे आपन जीवनके कोनो मोलके आर आपन लिए प्रिय नैसोचैछियै। हमे खाली एतनें चाहैछियै, कि परमेश्वरके अनुग्रहके खुश-खबरीके गवाही दियैले हमर दौड आर प्रभु येशूसे हमरा मिल्ल हमर सेवकाई हमे पुरा करे सकियै।

२ तिमोथी 4:7

जेरंके एकटा बढियाँ सिपाही युद्धमे लडाई करैके समयमे कहियो हार नैमानैछै, हमे भी ख्रीष्टके लिए कडा मेहनत करैले कहियो भी नैछोडलियै छे। हमे येशू ख्रीष्टके द्वारा हमरा देल काम पुरा कैलियै छे। हमे अन्ततक ख्रीष्टके प्रति विश्वासयोग्य भेल छियै।

प्रकाश 11:3

उटा समय हमे आपन दीटा गवाहके एक हजार दी स साठ दिनके लिए हमर सन्देशके घोषणा करैके अधिकार देबै। ऊसब मोटका करिया कम्बल ओढ्ल हैतै।”

प्रकाश 12:17

नतिजा स्वरुप, ऊ विशाल अजगर ऊ जनानीसे बहुते गोसैलै। सेल्याके ऊ विशाल अजगर जनानीके सन्तानसिके विरुद्धमे युद्धके घोषणा कैल्कै। यानिकी ऊ आदमीसिके विरुद्ध जेसब परमेश्वरके आज्ञासिके पालन करैछै आर येशूके द्वारा सिखैल गेल सच्चा शिक्षासिके अनुसरण करैमे निरन्तर लाग्ल रहैछै।

प्रकाश 13:11

तकरबाद हमे आरहौ एकटा जंगली जानवरके धर्तीसे निकल्ते देख्लियै। एकर दीटा सिङ रहै जेरं भेंडाके हैछै। मगर जब ऊ बोल्लै ते ओकर आवाज विशाल अजगरके जुगुर रहै।

प्रकाश 13:7

ऊ जंगली जानवरके परमेश्वरके आदमीसिके संगे लडाई करैके आर ओकरासिपर विजय प्राप्त करैके अधिकार प्राप्त भेलै। आर ओकरा हरेक जात, हरेक कुलसब, हरेक भाषासब आर हरेक देशके आदमीसिपर शासन करैके अधिकार प्राप्त भेलै।