प्रकाश 1:5 - केवट नया कारार

^5-6 आर येशू ख्रीष्टके तरफसे जकर वचनपर भरोसा कैल ज्या सकैछै। उहे ही छै जे मुर्दासे फेरसे जिन्दा भेलै आर ऊ यी संसारके सभे राजासिके शासक छै। ऊ आपनसिसे प्रेम करैछै आर ऊ आपन खून बहयाके अपनासिके आपनसिके पापसिसे बचाबैछै। ऊ अपनासिके एरंको समूहके आदमी बन्या देल्कै छे, जकर परमेश्वर ओकरसिके राजा छै आर ऊ अपनासिके परमेश्वर ओकर पिताके लिए पुजारी बन्या देल्कै छे। ओकरा आदर आर अधिकार सभे दिन आर हर समय मिल्ते रहै। आमेन।

प्रकाश 1:5 Iomraidhean Croise

मत्ती 20:28

जेरंके हमे, आदमीके बेटा खुद एकटा महान शासकके जुगुर आपन सेवा करवाबैके लिए नै ऐलियै छे, एकर बदलामे हमे दोसरसिके सेवा करैके लिए आर दोसरसिके बचाबैके लिए आपन जान दियैले ऐलियै छे।”

मत्ती 28:18

तब येशू ओकरसिके लगत आबिके कहैल्कै, “स्वर्ग आर धर्तीके सभे अधिकार हमरा देल छै।

यूहन्ना 13:1

निस्तार पावन शुरु हुऐसे पहेला येशूके यी पता रहै कि यी संसारसे छोडिके आब ओकर आपन पिता-परमेश्वर लगत वापस लौटिके जैके समय आबी गेलै छे। ओकर आपन चेलासब जे यी संसारमे रहै, ओकरासिके ऊ एखनतक जेरं प्रेम कर्ते रहै, ओहिने करिके अन्तिमतक ऊ ओकरासिके पुरा तरहसे प्रेम कर्ते रहै।

यूहन्ना 13:34

एकटा नया आज्ञा हमे तोरासिके दैछियौ: तुहेंसब एक दोसराके प्रेम कर। जेरंके हमे तोरासिसे प्रेम कैलियौ छे, तहुँसब एक दोसराके ओहिने प्रेम कर।

यूहन्ना 15:9

जेरंके पिता हमरा प्रेम कैल्कै छे, ओहिने करिके हमे तोरासिसे प्रेम कैलियौ छे। तुहेंसब हमर प्रेममे र।

यूहन्ना 18:37

राज्यपाल पिलातस ओकरा पुछल्कै, “कि तुहें राजा छैं ते?” येशू जबाब देल्कै, “हमे राजा छियै कहिके तुहीं कहैछ। हमर जनम लियैके आर संसारमे आबैके कारण यी छै कि हमे सच्चाईके बारेमे सिखाबे सकियै। सच्चाईके पालन करेवाला सभेको हमर बात मानैछै।”

यूहन्ना 3:11

हमे तोरा सच कहैछियौ, हमेसब जे जानैछियै उहे कहैछियै, आर हमेसब जे देख्लियै छे ओकरे गवाही दैछियै, मगर तुहेंसब हमरसिके गवाहीमे विश्वास नैकरैछ।

यूहन्ना 3:16

कहिनेकी परमेश्वर संसारके आदमीसिके एतनें ढेर प्रेम कैल्कै, कि ऊ आपन एकलौता बेटा देल्कै। सेल्याके परमेश्वरके बेटापर विश्वास करेवाला कोय भी नाश नैहैतै, मगर ऊसब कहियो खतम नैहुएवाला जीवन पैतै।

यूहन्ना 3:32

ऊ जे देखल्कै आर सुनल्कै छे, ओकरे गवाही ऊ दैछै, मगर ओकर कहेल बात बहुते कम आदमीसब विश्वास करैछै।

चुन्ल आर भेज्ल चेलासब 20:28

आब तुहेंसब आपनहैं आपन देखभाल कर आर पवित्र आत्मा तोरासिके जिम्मा लगैल परमेश्वरके मण्डलीके देख-रेख कर, जकरा ऊ आपन बेटाके खूनसे मोल लेल्कै छे।

चुन्ल आर भेज्ल चेलासब 26:23

ऊसब कहैल्कै रहे कि ख्रीष्टके दुःख भोग्है पड्तै आर ऊ मुर्दासे जिन्दा हुएवालासिमेसे सभैसे पहेला हैतै। ऊ यहूदी आदमीसब आर गैर-यहूदी आदमीसिके आपन खुश-खबरी प्रचार कर्तै, जे एकटा उजेतके जुगुर छै।”

रोमी 3:25

परमेश्वर येशू ख्रीष्टके आपनसिके लिए प्रायश्चितके बलिदान हुऐके लिए भेजल्कै। ख्रीष्ट आपन खून बहैल्कै ताकी ओकरामे विश्वास करिके अपनासब परमेश्वरके लगत आबे सकियै। आर परमेश्वर पहेला आपनसंगे धीरज धारण करिके पापीसिके माफी दियैके अधिकार रहै कहिके देखाबैके लिए यी काम कैल्कै। यी बात यी भी देखाबैछै कि जब येशूमे विश्वास करेवाला आदमीसिके परमेश्वर स्वीकार कर्तै तब परमेश्वर सही छै।

रोमी 8:37

मगर आपनसिसे जे प्रेम कैल्कै छे ओकरद्वारा यी सभे खराब चीजसिमे पुरा तरहसे जित आपनसिके छै।

१ कोरन्थी 6:11

पहेला तोरासिमेसे कुछु आदमीसब एरं व्यवहार कर्ते रहै, मगर परमेश्वर तोरसिके पापसिके धोय देल्कै छे आर तोरासिके पवित्र बनैल्कौ छे आर प्रभु येशू ख्रीष्टके नामके पुकारा करिके आर आपनसिके परमेश्वरके आत्माद्वारा तुहेंसब परमेश्वरके नजरमे धर्मी घोषित कैल गेल्हैं छे।

गलाती 2:20

एरं कहे सकैछियै कि जब ख्रीष्ट क्रूसपर मर्लै तब हमे भी ओकरसंगे मरि गेलियै। आब हमे जिन्दा नैछियै, मगर ख्रीष्ट हमरामे जियैछै। जेरंके आब हमे जियैछियै, हमे परमेश्वरके बेटापर भरोसा करिके जिन्दा छियै, जे हमरासे एतनें प्रेम करैछै कि ऊ हमर खातिर आपन जान द्या देल्कै।

एफिसी 2:4

मगर परमेश्वर जे बहुते दयालु छै, ऊ आपन अपार प्रेमसे अपनासिके प्रेम कैल्कै।

एफिसी 5:2

ख्रीष्टके उदाहरणके अनुसरण कर्ते हुए, दोसर आदमीसिके प्रति प्रेमसे भर्ल जीवन जी, ख्रीष्ट तोरासे प्रेम कैल्कौ आर तोरसिके पापसिके उठाबैके लिए खुदके बलिदान करिदेल्कै। आर परमेश्वर यी बातसे खुश रहै, कहिनेकी उटा बलिदान ओकर लिए गमकौव्वा धुपके जुगुर रहै।

कलस्सी 1:18

उहे ही छै जे मण्डलीके उप्परमे सर्वोच्च छै, जे ओकर शरीर छै। उहे शुरुआत छै, आर उहे पहेला छै जे मर्लमेसे जिन्दा भेलै ताकी सभे बातमे ख्रीष्ट ही सर्वोच्च हुए सकै।

१ तिमोथी 6:13

सभैके जीवन दिएवाला परमेश्वरके आर पन्तियस राज्यपाल पिलातसके समनामे मुकदमा चलैके समयमे दृढताके साथ बोलेवाला येशू ख्रीष्टके गवाह बन्याके हमे तोरासिके आज्ञा दैछियौ,

१ तिमोथी 6:15

परमेश्वर, जे खाली एक्केटा राजा छै, जे प्रशंसाके योग्य छै, राजासिके भी राजा आर प्रभुसिके भी प्रभु, उहे ख्रीष्टके सही समयमे प्रकट कर्तै।

हिब्रू 10:29

यदि मूसाके विधि-विधानके मुताबिक एरं किसिमके सजाय रहै ते, ऊ आदमीके सजाय बहुते बडका हैतै जे आदमी परमेश्वरके बेटाके तिरस्कार करैछै। ऊ परमेश्वरके बेटाके आपन पैरीके निच्चामे कुचली देल्कै छे कहिनेकी ऊ ओकर सम्मान नैकैल्कै। ऊ ख्रीष्टके उटा खूनके पवित्र नैमानल्कै जकरद्वारा परमेश्वर ओकरा पवित्र बनाबैके लिए नया करार शुरु कैल्कै रहे। ऊ पवित्र आत्माके अपमान कैल्कै जकरद्वारा ऊ आदमी अनुग्रह प्राप्त कैल्कै रहे।

हिब्रू 9:14

मगर ख्रीष्ट पापरहित रहै, आर ऊ अपने आपके परमेश्वरके लिए एकटा कहियो खतम नैहुएवाला आर आत्मिक बलिदानके रुपमे दान चढ्या देल्कै। इहे कारणसे ओकर खून बहुते बेसी शक्तिशाली छै आर आपनसिके विवेकके शुद्ध बनाबैछै। आब अपनासब जिन्दा परमेश्वरके सेवा करे सकैछियै आर ऊ चीजसिके नैकरैछियै जे मौतके तरफ ल्याजैछै।

१ यूहन्ना 1:7

मगर जब अपनासब परमेश्वरके उजेतके द्वारा देखैल सही काम करैछियै, ओकर शुद्धताके मुताबिक जेरंके परमेश्वर सभे दिन सही काम करैछै, तब आपनसिके संगति एक दोसरके संगे हैछै आर ओकर बेटा, येशू ख्रीष्टके खून आपनसिके सभे पापसब शुद्ध करैछै।

१ यूहन्ना 4:10

सच्चा प्रेम यी छै: यी आपनसिके द्वारा परमेश्वरके कैल प्रेम नैछै मगर परमेश्वर अपनासिके कैल प्रेम छै। परमेश्वर आपन बेटाके आपनसिके पापके सजायसिके मेटाबैके लिए प्रायश्चितके बलिदानके रुपमे भेजल्कै।

प्रकाश 11:15

जब सतमा स्वर्गदूत आपन धुतहुक फुकल्कै तब हमे स्वर्गमे बडका आवाजसिके जोर-जोरसे पुकारा कर्ते सुन्लियै, “आपनसिके परमेश्वर आर ओकर चुन्ल ख्रीष्टके पुरा संसारपर शासन करैके अधिकार छै आर परमेश्वर सभे दिनके लिए राज्य कर्तै।”

प्रकाश 11:3

उटा समय हमे आपन दीटा गवाहके एक हजार दी स साठ दिनके लिए हमर सन्देशके घोषणा करैके अधिकार देबै। ऊसब मोटका करिया कम्बल ओढ्ल हैतै।”

प्रकाश 17:14

ऊसब बलि-भेंडाके विरुद्धमे लडै कर्तै मगर बलि-भेंडा ओकरासिके परास्त करि देतै कहिनेकी ऊ प्रभुसिके प्रभु आर राजासिके राजा छै। ऊ ओकरासिके आपन बोलैल, चुन्ल आर विश्वासयोग्य अनुयायीसिके संगे परास्त करि देतै।”

प्रकाश 19:11

फेर हमे स्वर्गके खुल्ल देख्लियै। ओत्ते हमर समनामे एकटा उजरा घोडा रहै। ओकरामे सवार हुएवाला विश्वासयोग्य आर सच्चा सेवक छै। ऊ ओकर मुताबिक जे परमेश्वरके नजरमे सही छै, परमेश्वरके दुश्मनसिके विरुद्धमे न्याय आर लडाई करैछै।

प्रकाश 19:16

ओकर कपडा आर दहिना जाँघमे “राजासिके राजा आर प्रभुसिके प्रभु” कहिके नाम लिख्ल रहै।

प्रकाश 2:13

हमे जानैछियै कि तोर सहर शैतानके कब्जामे छौ, मगर एकर बावजुद भी तुहें हमरापर आपन विश्वासके मजगुतसे पक्डीके राख्लहैं छे आर तुहें हमर शिक्षासिके नैछोडलहैं छे, एत्तेतक कि तखनी भी नै जब बहुते समय पहेला एन्टिपासके जान मार्ल गेलै रहे। ऊ हमर वचनके प्रचार करैमे विश्वासयोग्य रहै, इहे ल्याके ओकरा तोर सहरमे जान मार्ल गेलै जे सहर शैतानके कब्जामे छै।

प्रकाश 3:14

लाउडिकिया सहरके मण्डलीके स्वर्गदूतके यी सन्देश लिख: हमे ऊ छियै जे आमेन कहलाबैछियै, कहिनेकी हमे भरोसामन्द छियै आर हमे परमेश्वरके विषयमे जे भी साबित करैछियै ऊ सच छै। जे कुछु भी ऊ सृष्टि कैल्कै छे, हमे ऊ सभैके स्रोत भी छियै। हमे तोरासे यी कहैछियौ।

प्रकाश 7:14

तब हमे ओकरा कहैलियै, “हे हौ सरकार, हमे नैजानैछियै मगर तुहें जानैछ।” ऊ हमरा कहैल्कै, “यीसब ऊ आदमीसब छै जेसब महाकष्टके अनुभव कैल्कै छे। यीसब आपन कपडाके बलि-भेंडाके खूनसे धोय लेल्कै छे आर आब ऊसब उजरा भ्यागेलै छे, एकर मतलब यी छै कि ओकरसिके पापसिके मेट्या देल गेलै छे।