एफिसी 1:5 - केवट नया कारार

⁵ कहिनेकी परमेश्वर अपनासिके प्रेम कैल्कै, ऊ बहुते पहलहैसे येशू ख्रीष्टके कैल कामके द्वारा अपनासिके आपन सन्तान बनाबैके फैसला कैल्कै रहे।

एफिसी 1:5 Iomraidhean Croise

मत्ती 1:25

जबतक मरियम बच्चा नैजन्मैल्कै तबतक ऊसब कोनो किसिमके वैवाहिक सम्बन्ध नैराखल्कै। योसेफ बच्चाके नाम येशू राखल्कै।

मत्ती 11:26

हँ पिता, तोरा इहे बढियाँ लाग्लहौं।

लूका 10:21

तखनिहैं येशू पवित्र आत्मामे आनन्दित भ्याके कहैल्कै, “हे पिता, आकाश आर धर्तीके प्रभु, हमे तोरा धन्यवाद चढाबैछिहौं, कहिनेकी तुहें यी बात बुद्धिमान आर समझदार आदमीसे गुप्त राखिके जे आदमीसब बच्चासिके जुगुर छै ओकरासिके प्रकट कैलह छे। हँ पिता, तोरा इहे बढियाँ लाग्लहौं।

लूका 11:32

निनवे सहरके आदमीसब न्यायके दिनमे खडा भ्याके यी पिढीके आदमीसिके दोषी ठहरैतै, कहिनेकी ऊसब योनाके कैल प्रचारमे पाप करैले छोडिके परमेश्वरके तरफ मन लगैल्कै रहे। देख्, योनासे भी महान कोय एत्ते छै। मगर तुहेंसब पाप करैले छोडिके परमेश्वरके तरफ मन लगाबैले इन्कार करैछैं।

लूका 12:32

येशू फेर कहैल्कै, “तुहें भेंडाके एकटा छोटका झुण्डके जुगुर छैं, सेल्याके कोय भी बातके विषयमे नैडर! कहिनेकी तोरसिके परमेश्वर पिता खुशी-खुशी आपन राज्य तोरासिके दियैके लिए फैसला करि लेल्कौ छे।

यूहन्ना 1:12

मगर जतनें आदमीसब ओकरा स्वीकार कैल्कै आर ओकरामे विश्वास कैल्कै, ओकरासिके ऊ परमेश्वरके सन्तान बनैके अधिकार देल्कै।

यूहन्ना 11:52

मगर खाली ओकरसिके ही नै, ऊ परमेश्वरके आरहौ सन्तानसिके लिए भी मर्तै जे यी संसारमे अलग-अलग जगहमे छिरियैल छै, ताकी ओकरासिके एक जगहमे जमा करे सकै।

यूहन्ना 20:17

येशू ओकरा कहैल्कै, “हमर चरणके पक्डीके हमरा नैरोक, कहिनेकी हमे एखनतक पिताके लगत नै गेलियै छे। मगर हमर भ्या-बहिनसिके लगत जैके कहिदहैं, ‘हमर पिता आर तोरसिके पिता, हमर परमेश्वर आर तोरसिके परमेश्वरके लगत हमे जैछियै।’ ”

चुन्ल आर भेज्ल चेलासब 13:48

यी बात सुनिके गैर-यहूदी आदमीसब आनन्दित भेलै, आर परमेश्वरके वचनके प्रशंसा करे लाग्लै आर जतनें आदमी कहियो खतम नैहुएवाला जीवनके लिए परमेश्वरसे चुन्ल रहै ऊसब येशू ख्रीष्टमे विश्वास कैल्कै।

रोमी 8:23

खाली सृष्टि दरदमे नैकुहरैछै मगर अपनासब भी कुहरैछियै, जकरामे हुएवाला महिमामे ओकर पहेला उपहारके रुपमे पवित्र आत्मा बास छै। मगर अपनासब एखन भी उटा समयके इन्तजार करैछियै जब अपनासिके आपन सन्तान बनैके लिए परमेश्वर उठ्या लेतै आर आपनसिके शरीरके सभे दुष्टतासे उद्धार कर्तै।

१ कोरन्थी 1:1

हमे, पावल, यी चिट्ठी लिखैछियै। हमे ख्रीष्ट येशूके चुन्ल आर भेज्ल चेला हुऐले परमेश्वरके इच्छाद्वारा बोलैल छियै। हमे एत्ते आपनसिके विश्वासी भ्या सोस्थेनेससंगे छियै जे हमरा सहायता करैछै।

१ कोरन्थी 1:21

हमे यी कहैछियै कहिनेकी परमेश्वर बुद्धिमानीसाथ फैसला कैल्कै कि यी संसारके आदमीसब ओकरा आपन बुद्धिके माध्यमसे नैचिन्हे सक्तै। सेल्याके विश्वास नैकरेवाला आदमीसब हमरसिके खुश-खबरीके मूर्खता कहेल पर भी आपनसिके प्रचार कैल खुश-खबरीमे विश्वास करेवालासिके बचाबैके परमेश्वरके योजना रहै।

२ कोरन्थी 6:18

हमे तोरसिके पिता हैबौ आर तुहेंसब हमर बेटा-बेटीसब हैभैं, यी सर्वशक्तिमान प्रभुके वचन छै।”

गलाती 3:26

तुहेंसब सभेको येशू ख्रीष्टमे बप्तिस्मा लेल्हैं छे आर ख्रीष्टके चरित्रके मुताबिक चलैछैं। सेल्याके तुहेंसब येशू ख्रीष्टमे विश्वास राखैके द्वारा परमेश्वरके सन्तान बनी गेल्हैं छे।

एफिसी 1:11

ख्रीष्टके संगे आपनसिके सम्बन्धके कारण परमेश्वर अपना यहूदी आदमीसिके चुनल्कै ताकी अपनासब ऊ पाबे सकियै जकरा दियैके प्रतिज्ञा परमेश्वर कैल्कै रहे। यी उहे प्रतिज्ञा रहै जे ऊ बहुते पहेला ही करैके योजना बनैल्कै रहे आर ऊ सभे कुछु आपन योजना आर इच्छासे पुरा करैछै।

एफिसी 1:9

परमेश्वर उहे कैल्कै जे ऊ नुक्याके राखल्कै, आर अपनासिके उटा नुकैल योजना प्रकट कैल्कै जे ऊ पहलहैसे ही ख्रीष्टके द्वारा पुरा करैके फैसला कैल्कै रहे।

फिलिप्पी 2:13

कहिनेकी परमेश्वर तोरासिमे काम करैछौ, तोरासिके उटा काम करैके इच्छा आर शक्ति दैछौ जे काम ओकरा खुश करैछै।

कलस्सी 1:19

कहिनेकी परमेश्वर पिताके खुशी एक्रहैमे छै परमेश्वर आपन परिपूर्णतामे ख्रीष्टमे बास करैछै।

२ थेसलोनिकी 1:11

सेल्याके हमेसब तोरसिके सभैके लिए लगातार प्रार्थना भी करैछियै कि हमरसिके परमेश्वर तोरासिके उटा काम करैके लिए काबिल बनैतौ जे कामके लिए ऊ तोरासिके बोलैल्कौ छे। आर ऊ आपन शक्तिसे तोरसिके सभे बढियाँ मकसदसिके पुरा करौ आर सभे उटा कामके ऊ सफल बनाबौ जे तोरसिके विश्वासके फल छै।

हिब्रू 2:4

परमेश्वर बहुते किसिमके चिन्हसब, चमत्कारके कामसब, आर विभिन्न प्रकारके शक्तिशाली कामसिके प्रयोग करिके आर आपन इच्छाके मुताबिक पवित्र आत्माके द्वारा आदमीसिके वरदानसब द्याके प्रभु ओकरासिके सहायता कैल्कै आर ओकरसिके सन्देश सच्चा रहै कहिके साबित कैल्कै।

१ यूहन्ना 3:1

विचार ते कर कि परमेश्वर पिता अपनासिके केरंको प्रेम कैल्कै छे कि अपनासब परमेश्वरके बेटा-बेटी कहलैल जैयै, आर सच्चे अपनासब ओकर बेटा-बेटी छियै भी। मगर यी संसारके आदमीसब अपनासब परमेश्वरके बेटा-बेटीसब छियै कहिके नैचिन्हैछै कहिनेकी ऊसब परमेश्वर पिताके ही नैचिन्हैछै।

प्रकाश 21:7

जे आदमीसब शैतानपर जित हासिल करैछै ऊ हमरद्वारा यी सभे आशिषसब प्राप्त कर्तै। हमे ओकर परमेश्वर हैबै आर ऊ हमर बेटा हैतै।