एफिसी 1:4 - केवट नया कारार

⁴ यानिकी परमेश्वर संसार बनाबैसे पहेला ही अपनासिके ख्रीष्टके कारण आपन प्रजा हुऐके लिए चुनल्कै। ताकी अपनासब ओकर समनामे पवित्र आर दोषरहित हुए सकियै।

एफिसी 1:4 Iomraidhean Croise

मत्ती 24:22

परमेश्वर उटा भयानक समयके घटाबैके निर्णय लेल्कै छे, नैते कोय भी जिन्दा नै बच्तियै। मगर ओकर चुन्ल आदमीसिके कारण, जकरा ऊ चुन्लकै छे, परमेश्वर समय घट्या देतै।

मत्ती 24:24

कहिनेकी झुट्ठा ख्रीष्टसब आर झुट्ठा परमेश्वरके वक्तासब ऐतै, अगर सम्भव हुए ते उटा आदमीसिके धोखा दियैके लिए जकरा परमेश्वर चुन्लकै छे, ऊसब चिन्ह आर झुट्ठा चमत्कार कर्तै।

मत्ती 24:31

ऊ आपन स्वर्गदूतसिके धुतहुकके बडका आवाजके साथ पठैतै, आर ऊसब ओकरासिके सभे जगहसे जमा कर्तै, धर्ती आर आकाश सभे जगहसे आपन चुन्लसिके जमा कर्तै।”

मत्ती 25:34

तब हमे, राजा आपन दहिना बगलवाला आदमीसिके कहबै, ‘हमर पितासे आशीर्वाद पैल आदमीसब! या! संसारके सृष्टिसे तोरसिके लिए तैय्यार कैल राज्यके भागीदार बन।

यूहन्ना 10:16

हमर आरहौ भेंडासब छै, जे यी भेंडशालाके नैछै। ओक्रहौसिके हमरा आने पड्तै आर उहोसब हमर आवाज सुन्तै तब हमर सभेटा भेंडासब एक्केटा झुण्ड हैतै आर चरवाहा भी एक्केटा हैतै।

यूहन्ना 15:16

हमरा तुहेंसब नैचुन्लहैं छे, मगर हमे तोरासिके चुन्लियौ, आर तोरासिके नियुक्त कैलियौ छे, कि तुहेंसब जो आर बढियाँ काम कर आर तोरसिके बढियाँ काम सभे दिन रहौ। कहिनेकी तुहें हमर चेला छैं सेल्याके तुहेंसब जे कुछु भी हमर चेला हुऐके नातासे माँग्भैं, पिता तोरासिके देतौ।

यूहन्ना 17:24

हे पिता, हमे चाहैछियै, कि तुहें जकरासिके हमरा देल्ह छे, हमे जते छियै उहोसब हमरसंगे रहै, आर हमर महिमाके देखे सकै, जे महिमा संसारके सृष्टि हुऐसे पहलहैसे तुहें हमरा प्रेम करैके कारणसे देल्ह रहे।

चुन्ल आर भेज्ल चेलासब 13:48

यी बात सुनिके गैर-यहूदी आदमीसब आनन्दित भेलै, आर परमेश्वरके वचनके प्रशंसा करे लाग्लै आर जतनें आदमी कहियो खतम नैहुएवाला जीवनके लिए परमेश्वरसे चुन्ल रहै ऊसब येशू ख्रीष्टमे विश्वास कैल्कै।

चुन्ल आर भेज्ल चेलासब 15:18

यी उहे प्रभुके वाणी छै, जे पुरना जमानासे यी बात जानकारी करैल्कै छे।

चुन्ल आर भेज्ल चेलासब 18:10

कहिनेकी हमे तोर साथमे छियौ आर कोय तोरा आक्रमण करिके तोर हानी करे नैसक्तौ, कहिनेकी यी सहरमे हमर बहुते आदमीसब छै जे हमर चेला बन्तै।”

रोमी 8:33

कोय भी अपनासिपर परमेश्वरके समनामे आरोप नैलगाबे सकैछै कहिनेकी ऊ उहे छै जे अपनासिके धर्मी घोषित करैछै।

१ कोरन्थी 1:8

आपनसिके प्रभु येशू ख्रीष्टके यी संसारमे वापस आबैके दिनमे तोरासिके दोषरहित राखैले परमेश्वर तोरासिके अन्ततक विश्वासमे मजगुत राख्तौ।

गलाती 5:13

हे विश्वासी भ्या-बहिनसब, तुहेंसब परमेश्वरके द्वारा आजाद हुऐके लिए चुन्ल गेल्हैं रहे आर सेल्याके आब तोरासिके मूसाके विधि-विधानके पालन करैके जरुरत नैछौ। मगर यी आजादीके आपन पापमय स्वभावसिके पुरा करैके बहाना नैबना। बरु, एक दोसरसे प्रेम कर आर एक दोसरके सेवा कर।

गलाती 5:22

पवित्र आत्माद्वारा उत्पन्न हुएवाला चरित्रसब यी छियै: प्रेम, आनन्द, शान्ति, धीरज, दया, भलाइ, विश्वस्तता,

गलाती 5:6

कहिनेकी यदि अपनासब ख्रीष्ट येशूके संगे एक छियै ते आपनसिके खतना भेल छै या नैभेल छै यी बात महत्वपूर्ण नैछै। मगर महत्वपूर्ण बात यी छै कि अपनासब ख्रीष्टके आपन उद्धारकर्ताके रुपमे विश्वास करैछियै, आर परमेश्वर आर दोसर आदमीसिके प्रति प्रेम राखैछियै।

एफिसी 2:10

कहिनेकी अपनासब परमेश्वरके सृष्टि छियै, ख्रीष्ट येशूमे बढियाँ काम करैके लिए अपनासिके नया आदमीके रुपमे सृष्टि कैल गेलै जकरा परमेश्वर पहलहैसे अपनासब करियै कहिके तैय्यार कैल्कै रहे।

एफिसी 3:17

ताकी जब तुहेंसब ओकरापर भरोसा कर्भैं, तब ख्रीष्ट तोरसिके हृदयमे रहौ। हमे प्रार्थना करैछियै कि परमेश्वर आर एक-दोसरके लिए तोरसिके प्रेम तोरासिके मजगुत बनाबौ आर तोरासिके गिरैसे बचाबौ।

एफिसी 4:2

सभे दिन नम्र आर कोमल बन। एक दोसरके संगे धीरज राख, प्रेमके कारण एक दोसरके व्यवहारके सहन कर।

एफिसी 5:2

ख्रीष्टके उदाहरणके अनुसरण कर्ते हुए, दोसर आदमीसिके प्रति प्रेमसे भर्ल जीवन जी, ख्रीष्ट तोरासे प्रेम कैल्कौ आर तोरसिके पापसिके उठाबैके लिए खुदके बलिदान करिदेल्कै। आर परमेश्वर यी बातसे खुश रहै, कहिनेकी उटा बलिदान ओकर लिए गमकौव्वा धुपके जुगुर रहै।

एफिसी 5:27

ऊ आपन आदमीसिके लिए भी मर्लै ताकी ऊ आपन मण्डलीके सिद्ध बनाबे सकै आर अपनासब सभैके आपन उपस्थितिमे आने सकै, जकरामे कोनो दोष या पाप या कोनो खराब बात नैहैतै, बरु विश्वासीसब पवित्र आर दोषरहित हैतै।

फिलिप्पी 2:15

ताकी तुहेंसब भ्रष्ट आर दुष्ट आदमीसिसे भर्ल यी संसारमे परमेश्वरके सिद्ध बेटा-बेटीसिके जुगुर साफ आर निर्दोष जीवन जी। यी संसारके आदमीसिके बीचमे तोरासिके आकाशके तारासिके जुगुर अनहारमे चमकना चाही जब तुहेंसब ओकरासिके उटा वचन बताबैछैं जे कहियो खतम नैहुएवाला जीवन दैछै।

कलस्सी 1:22

परमेश्वर तोरासिके आपनसंगे मिलापमे आनैके लिए आपन बेटा ख्रीष्टके आदमी बन्याके क्रूसमे मरैले देल्कै ताकी ओकर समनामे तुहेंसब पवित्र, बेदाग आर दोषरहित हुए सक्हैं।

कलस्सी 2:2

हमे कठिन मेहनत करैछियै कहिनेकी हमे तोरासिके सभैके आत्मिक रुपसे उत्साह दियैले चाहैछियै, आर तोरसिके एक दोसरके प्रतिके प्रेम तोरासिके एक बनैतौ। हमे चाहैछियै कि ऊसब पुरा भरोसा राखै कहिनेकी ऊसब परमेश्वरके रहस्यमय योजनाके पुरे बुझ्ल छै, जे ख्रीष्ट आपनहैं छै।

कलस्सी 3:12

सेल्याके परमेश्वर तोरासिके आपन आदमी हुऐके लिए चुन्लकौ छे आर तोरासिके प्रेम करैछौ, इहे ल्याके तुहेंसब करुणा, दया, दीनता, नम्रता आर धीरज धारण कर।

१ थेसलोनिकी 3:12

आर हमेसब प्रार्थना करैछियै कि जेरंके हमेसब तोरसिसे प्रेम करैछियौ, ओहिने करिके तोरसिके प्रेम एक दोसरके प्रति आर सभे आदमीसिके लिए बढते आर उमडते रहौ।

१ थेसलोनिकी 4:7

कहिनेकी परमेश्वर अपनासिके अनैतिक जीवन जियैके लिए नै, मगर पवित्र जीवन जियैके लिए बोलैल्कै छे।

२ तिमोथी 1:9

ऊ अपनासिके बचैल्कै आर अपनासिके एकटा पवित्र जीवन जियैके लिए बोलैल्कै छे, आर अपनासब बढियाँ काम करैके कारणसे ऊ अपनासिके नैचुनल्कै छे, मगर ओकर आपन योजना आर अनुग्रहके आधारमे छै। यी संसारके सृष्टि हुऐसे पहेला ही परमेश्वर येशू ख्रीष्टके आपनसिके लिए मरैके लिए भेजिके आपन अनुग्रह अपनासिपर देखाबैके योजना बन्या लेल्कै रहे।

२ तिमोथी 2:10

सेल्याके परमेश्वरसे चुन्ल आदमीसिके फैदाके लिए हमे सभे दुःख सहैछियै, ताकी उहोसब भी येशू ख्रीष्टमे विश्वास करे सकै आर बचे सकै, आर सभे दिन रहेवाला आदर ऊसब पाबे सकै।

२ तिमोथी 2:19

मगर परमेश्वरके आदमीसब एकटा जगके जुगुर छै, यानिकी ऊसब सभे दिन आपन विश्वासमे स्थिर रहैछै। यी जगमे यी शब्दसब लिख्ल छै: “प्रभु आपन आदमीसिके चिन्हैछै” आर यी भी लिख्ल छै, “जे आदमीसब कहैछै कि ऊसब परमेश्वरके छै ऊ आदमीसिके दुष्ट कामसब करैके लिए बन्द करे पडैछै।”

याकूब 2:5

हे हमर प्रिय विश्वासी भ्या-बहिनसब, ध्यान दहैं। परमेश्वर ऊ आदमीसिके चुनल्कै छे, जे संसारके नजरमे गरिब छै ताकी ऊसब विश्वासमे मातबर भ्याजै आर उटा राज्यके हकवाला बनै, जकरा परमेश्वरके प्रेम करेवाला आदमीसिके दियैके वादा कैल्कै छे।

१ पत्रुस 1:2

परमेश्वर पिता बहुते पहेला ही तोरासिके आपन आदमी बनाबैके लिए आर पवित्र आत्माके कामके द्वारा तोरासिके पवित्र बनाबैले चुनैके फैसला कैल्कै रहे। ऊ एरं इहे ल्याके कैल्कै ताकी तुहेंसब येशू ख्रीष्टके आज्ञापालन करहैं आर ओकर खूनके द्वारा शुद्ध हुए सक्हैं। हमे प्रार्थना करैछियौ कि परमेश्वर तोरासिके बहुते अनुग्रह आर शान्ति दौ।

१ पत्रुस 1:20

यी संसारके सृष्टि कैल जैसे पहेला, परमेश्वर समयसे पहेला यी निर्धारित करि लेल्कै रहे कि येशू ख्रीष्ट उद्धारकर्ता हैतै। मगर ऊ तोरासिके सहायता करैके लिए यी अन्तिम दिनसिमे यी संसारमे प्रकट भेलै छे।

१ पत्रुस 2:9

मगर तुहेंसब ओरं नैछैं, कहिनेकी तुहेंसब परमेश्वरके चुन्ल आदमीसब छैं, तुहेंसब परमेश्वरके पुजारीसब छैं, जे राजा छै। तुहेंसब परमेश्वरके सेवा करैले समर्पित भेल आदमीसब आर परमेश्वरके निजी प्रजा छैं। ऊ तोरासिके अनहारसे आपन अदभुद उजेतमे आन्लकौ छे, ताकी तुहेंसब परमेश्वरके आश्चर्यपूर्ण कामसिके घोषणा करे सक्हैं।

२ पत्रुस 3:14

हे प्रिय विश्वासी भ्या-बहिनसब, परमेश्वर संसारके न्याय करैके दिनके तुहेंसब इन्तजार करैबेरियाँ तोरासिके पवित्र आर निष्खोट हुऐके लिए आर ओकरसंगे शान्तिमे रहैके लिए आपन तरफसे पुरा कोशिश करे पडैछै।

१ यूहन्ना 4:16

अपनासिके बढियाँसे मालुम छै आर अपनासब विश्वास करैछियै कि परमेश्वर अपनासिके प्रेम करैछै। परमेश्वर प्रेम छै, आर जेसब प्रेममे रहैछै ऊ परमेश्वरमे एक भ्याके रहैछै, आर परमेश्वर ओकरामे एक भ्याके रहैछै।

प्रकाश 13:8

आर यी धर्तीमे रहेवाला सभे आदमीसब ओकर पूजा करे लाग्लै। खाली उहे आदमीसब ओकर पूजा नैकैल्कै जकर नाम संसारके सृष्टि कैल जैसे पहेलासे ही जीवनके किताबमे लिख्ल गेलै रहे। यी जीवनके किताब ऊ बलि-भेंडाके किताब छै जकरा बलिदानके रुपमे मारि देल गेलै रहे।

प्रकाश 17:8

ऊ जंगली जानवर जकरा तुहें एखन देख्लहैं, एक समय जिन्दा रहै मगर आब जिन्दा नैछै। ऊ अथाहा कुण्डसे बाहार आबेवाला छै आर परमेश्वर ओकरा पुरा तरहसे नाश करि देतै। धर्तीमे रहेवाला आदमीसब जकरसिके नाम परमेश्वर संसारके सृष्टि करैसे पहेला उटा किताबमे नैलिखल्कै छे जकरामे कहियो खतम नैहुएवाला जीवन पाबेवाला आदमीसिके नाम लिख्ल छै, ऊसब सभेको आश्चर्यचकित भ्याजैतै जब यी जंगली जानवरके देख्तै। एक समय ऊ जिन्दा रहै, आब ऊ जिन्दा नैछै, मगर ऊ फेर वापस ऐतै।