एफिसी 1:3 - केवट नया कारार

³ आपनसिके प्रभु येशू ख्रीष्टके पिता परमेश्वरके प्रशंसा है। ख्रीष्टके संगे आपनसिके सम्बन्धके कारण स्वर्गसे आबेवाला आशीर्वादसब द्याके ऊ अपनासिके सभे तरिकासे आत्मिक आशिष देल्कै छे।

एफिसी 1:3 Iomraidhean Croise

लूका 2:28

तब ऊ बालक येशूके कोरामे ल्याके परमेश्वरके धन्यवाद देते कहैल्कै,

यूहन्ना 14:20

जब हमे मुर्दासे जिन्दा हैबै, तब तुहेंसब जानी लेभैं कि हमे हमर परमेश्वर पितामे रहैछियै, आर तुहेंसब हमरामे रहैछैं, आर हमे तोरासिमे रहैछियै।

यूहन्ना 17:21

कि ऊसब सभेको एक है। हे पिता, जेरंके तुहें हमरामे रहैछ, आर हमे तोरामे रहैछियै, ओहिने करिके ऊसब अपनासिमे रहिके एक है, आर तुहें हमरा भेज्लह छे कहिके संसारके आदमीसब विश्वास करे सकै।

यूहन्ना 20:17

येशू ओकरा कहैल्कै, “हमर चरणके पक्डीके हमरा नैरोक, कहिनेकी हमे एखनतक पिताके लगत नै गेलियै छे। मगर हमर भ्या-बहिनसिके लगत जैके कहिदहैं, ‘हमर पिता आर तोरसिके पिता, हमर परमेश्वर आर तोरसिके परमेश्वरके लगत हमे जैछियै।’ ”

रोमी 12:5

ओहिने करिके अपनासब भी जे ख्रीष्टमे विश्वासी छियै, अपनहौंसब भी ख्रीष्टके शरीरके अंगसब छियै आर अपनासब एक दोसरसे जुड्ल छियै।

रोमी 15:6

ताकी तुहेंसब सभेको एक्केसंगे मिलिके परमेश्वर आपनसिके प्रभु येशू ख्रीष्टके पिताके स्तुति कर।

१ कोरन्थी 1:30

मगर परमेश्वर तोरासिके येशू ख्रीष्टमे एक बन्या देल्कौ छे, आर ख्रीष्टके द्वारा ऊ अपनासिके आपन बुद्धि दैछै। परमेश्वर अपनासिके धर्मी घोषित कैल्कै छे। ख्रीष्टके द्वारा अपनासब पवित्र बनैल छियै, आर ऊ अपनासिके पापसिसे छुटकारा देल्कै छे।

१ कोरन्थी 12:12

आपनसिके एकटा शरीरमे बहुते अंग हैछै, आर एकटा शरीरके बहुते अंगसब भेलपर भी एक्केटा शरीर छै। ओहिने करिके अपनासब ख्रीष्टमे विश्वास करेवाला बहुते भेलपर भी, अपनासब ख्रीष्टमे एक्केटा शरीर छियै।

२ कोरन्थी 1:3

आपनसिके प्रभु येशू ख्रीष्टके पिता आर परमेश्वरके प्रशंसा है। जे दयाके पिता आर सान्त्वना दिएवाला परमेश्वर छै।

२ कोरन्थी 11:31

परमेश्वर, आपनसिके प्रभु येशूके पिता जे सभे दिन धन्यके छै, ऊ जानैछै कि हमे झुठ नैबोलैछियै।

२ कोरन्थी 5:17

इहे ल्याके, यदि कोय ख्रीष्टमे विश्वास करैछै ते, ऊ एकटा नया स्वभाव पैल्कै छे, पुरना स्वभाव बिती गेलै छे। देख, ओकर सभेटा स्वभाव नया भेल छै।

२ कोरन्थी 5:21

ख्रीष्ट, जे निष्पाप रहै, ओकरा परमेश्वर आपनसिके लिए पाप बन्या देल्कै ताकी अपनासब परमेश्वरके द्वारा धर्मी घोषित कैल जैयै कहिनेकी ख्रीष्ट आपनसिके पापसिके सजाय आपन उप्परमे ल्या लेल्कै।

गलाती 3:9

जेरंके परमेश्वर अब्राहमके ओकर विश्वासके कारण आशीर्वाद देल्कै, ओहिने करिके जे कोय भी येशू ख्रीष्टमे विश्वास करैछै, ऊ निश्चित रुपसे अब्राहमके संगे आशिष पैतै।

एफिसी 1:10

परमेश्वरके तय कैल समयमे, ऊ स्वर्ग आर धर्तीमे भेल सभे चीजसिके एक बनैतै आर ख्रीष्टके ओकरासिपर शासन करैके अधिकार देतै।

एफिसी 1:17

हमे प्रार्थना करैछियै कि परमेश्वर, आपनसिके प्रभु येशू ख्रीष्टके महिमामय पिता, तोरासिके आत्मिक ज्ञान आर समझ दौ आर तोरा यी समझैके लिए सहायता करौ कि परमेश्वरके जानैके मतलब कि छै।

एफिसी 1:20

जकर इस्तमाल परमेश्वर तब कैल्कै रहे जब ऊ ख्रीष्टके फेरसे जिन्दा बनैल्कै, आर ऊ ख्रीष्टके स्वर्गमे आपन दहिना हातके बगल सम्मानके जगहमे बैठैल्कै।

एफिसी 2:6

परमेश्वर अपनासिके ख्रीष्टके संगे मुर्दासिमेसे जिन्दा बनैल्कै आर येशू ख्रीष्टके संगे आपनसिके सम्बन्ध हुऐके कारण स्वर्गमे अपनासिके ख्रीष्टके संगे राज्य करैके योग्य बनैल्कै।

एफिसी 3:10

ओकर मकसद मण्डलीके इस्तमाल करिके अदृश्य संसारमे शासन करेवाला आर अधिकार भेल सभे आत्मिक प्राणीसिके परमेश्वरके अपार ज्ञानके बारेमे बताबैके लिए रहै।

एफिसी 6:12

कहिनेकी आपनसिके लडाई आदमीसिके विरुद्धमे नैछै, मगर एकर बदलामे अपनासब भूत आर ओकरसिके अगुवासिके विरुद्धमे लडाई करैछियै, जे यी अनहारके संसारमे शासन करैछै, अपनासब ब्रम्हाण्डके दुष्ट शक्तिसिके विरुद्धमे लडाई करैछियै।

फिलिप्पी 2:11

आर हरेक आदमीसिके परमेश्वर पिताके महिमाके लिए येशू ख्रीष्टके प्रभु कहिके स्वीकार करे पड्तै।

हिब्रू 8:5

पुजारीके रुपमे ऊसब जे काम करैछै ऊ खाली ओकर एकटा नकल आर एकटा छाया छै जे स्वर्गमे छै, मगर यी ओरंको नैछै जेरं स्वर्गमे छै। कहिनेकी जब मूसा परमेश्वरके पाल बनाबैके लिए तैय्यार हैते रहै, तब परमेश्वर ओकरा यी चेतावनी देल्कै, “देख, जे नमुना तोरा पहाडपर देखैल गेलौ रहे, ओकर मुताबिक सभे कुछु बनैहैं।”

हिब्रू 9:23

सेल्याके यी जरुरी रहै कि परमेश्वरके पाल आर ओकरामे भेल सभे चीजसिके विधिके मुताबिक शुद्ध करैके लिए जानवरके बलि देल जाना रहै आर यी स्वर्गके चीजसिके नकल छै। मगर स्वर्गके ऊ चीजसिके विधिके मुताबिक शुद्ध करैके लिए, जानवरके खूनसे बेसी उत्तम बलिदानके जरुरत रहै।

१ पत्रुस 1:3

आपनसिके प्रभु येशू ख्रीष्टके पिता आर परमेश्वरके धन्यवाद है। परमेश्वर आपनसिके प्रति आपन बडका दयासे अपनासिके एकटा नया जीवन देल्कै छे। कहिनेकी परमेश्वर येशू ख्रीष्टके मुर्दासे जिन्दा बनैल्कै, ऊ अपनासिके बहुते आत्मविश्वासके साथ जियैके योग्य बनैल्कै छे, यानिकी अपनासब उटा चीजसिके प्राप्त करैके पुरा आशा करे सकैछियै जे ऊ अपनासिके दियैके प्रतिज्ञा कैल्कै छे।