एफिसी 1:11 - केवट नया कारार

¹¹ ख्रीष्टके संगे आपनसिके सम्बन्धके कारण परमेश्वर अपना यहूदी आदमीसिके चुनल्कै ताकी अपनासब ऊ पाबे सकियै जकरा दियैके प्रतिज्ञा परमेश्वर कैल्कै रहे। यी उहे प्रतिज्ञा रहै जे ऊ बहुते पहेला ही करैके योजना बनैल्कै रहे आर ऊ सभे कुछु आपन योजना आर इच्छासे पुरा करैछै।

एफिसी 1:11 Iomraidhean Croise

चुन्ल आर भेज्ल चेलासब 13:48

यी बात सुनिके गैर-यहूदी आदमीसब आनन्दित भेलै, आर परमेश्वरके वचनके प्रशंसा करे लाग्लै आर जतनें आदमी कहियो खतम नैहुएवाला जीवनके लिए परमेश्वरसे चुन्ल रहै ऊसब येशू ख्रीष्टमे विश्वास कैल्कै।

चुन्ल आर भेज्ल चेलासब 2:23

परमेश्वरके द्वारा ठहरैल निश्चित योजना आर पूर्व ज्ञानके मुताबिक ओकरा तोरासिके सौंपी देल्कै। तुहेंसब ओकरा दुष्ट आदमीसिके हातमे सौंपीके काँटी ठोकिके क्रूसमे चढ्याके जान मार्लह।

चुन्ल आर भेज्ल चेलासब 20:27

कहिनेकी हमे तोरासिके परमेश्वर तुहेंसब जे बात जानह कहिके चहते रहै उटा सभे बात बतैलिहौं छे। हमे तोरासिसे कुछु भी नैनुकैलिहौं छे।

चुन्ल आर भेज्ल चेलासब 20:32

आब हमे तोरासिके परमेश्वरमे आर ओकर अनुग्रहके वचनमे सौंपैछिहौं, जे तोरासिके विश्वासमे मजगुत बनाबे सकैछै, आर परमेश्वर तोरासिके उत्तराधिकार देतहौं जे ओकरद्वारा पवित्र बनैल सभैके लिए वादा कैल्कै छे।

चुन्ल आर भेज्ल चेलासब 26:18

हमे चाहैछियै कि तुहें ओकरसिके आँख खोली दहैं, ताकी ऊसब अनहारसे उजेत महर, आर शैतानके शक्तिसे परमेश्वरके तरफ आबै। एरंके ऊसब आपन पापके माफी पैतै आर हमरपरके विश्वासद्वारा पवित्र भेलसिके स्थान ऊसब भी पैतै।’

चुन्ल आर भेज्ल चेलासब 4:28

मगर ऊसब उहे काम कैल्कै जे तुहें पहलहैसे आपन शक्ति आर इच्छासे निश्चित कैलह रहे।

रोमी 11:34

कहिनेकी प्रभुके मनके बात कोय नैजाने सकैछै। या कोय भी ओकर सल्लाहकार नैबने सकैछै।

रोमी 8:17

आर यदि अपनासब सन्तान छियै ते, हकवाला भी छियै, परमेश्वरके हकवाला आर ख्रीष्टके संगी हकवाला। यदि अपनासब येशूके जुगुर दुःख सहैछियै ते, अपनासब ओकर महिमामे भी सामिल हैबै।

रोमी 8:28

हमेसब जानैछियै कि परमेश्वरके प्रेम करेवाला आदमीसब आर परमेश्वरसे चुन्ल आदमीसिके लिए परमेश्वर ओकरसिके लिए आपन मकसदके मुताबिक सभे चीजमे भलाइये करैछै।

रोमी 8:29

कहिनेकी जकरा ऊ पहलहैसे चुनल्कै छे, ओकरासिके ऊ पहलहैसे आपन बेटा येशूके स्वरुपमे हुऐके लिए निर्णय कैल्कै, ताकी परमेश्वरके बेटा बहुते भ्यासिमेसे पहेला हैतै।

रोमी 8:30

फेर जकरा ऊ पहलहैसे आपन बेटा येशूके स्वरुपमे हुऐके लिए निर्णय कैल्कै, ओकरासिके ऊ बोलैल्कै छे, आर जकरा ऊ बोलैल्कै छे, ओकरासिके ऊ धर्मी घोषित भी कैल्कै छे, आर जकरा ऊ धर्मी घोषित कैल्कै छे, ऊ ओकरसिके संगे आपन महिमा बाँटल्कै छे।

रोमी 9:11

आर जोडमा बच्चासब जनमैसे पहलहै या कुछु खराब या भला काम करैसे पहेला ही परमेश्वर रिबेकासे कहैल्कै रहे कि ओकर बडका बेटा छोटका बेटाके सेवा कर्तै। परमेश्वर यी देखाबैके लिए कहैल्कै कि ऊ आपन इच्छाके चुनाव आपनहैं करैछै आर यी ओकरसिके कैल कोनो भी कामके कारणसे नैरहै।

गलाती 3:18

मूसाके विधि-विधानके पालन करैके कारणसे परमेश्वर अपनासिके आपन आशिष नैदैछै, मगर ऊ उटा बातके प्रतिज्ञा करैके कारणसे उटा आशिष दैछै। ओहिने करिके, परमेश्वर आपन अनुग्रहसे उटा आशिष अब्राहमके मुफ्तमे देल्कै कहिनेकी ऊ अब्राहमके यी बातके प्रतिज्ञा कैल्कै रहे।

एफिसी 1:14

कहिनेकी परमेश्वर अपनासिके पवित्र आत्मा देल्कै छे, अपनासब यी बातमे निश्चित हुए सकैछियै कि परमेश्वर अपनासिके प्रतिज्ञा कैल दोसर बढियाँ चीजसब भी देतै। यी तब हैतै जब परमेश्वर अपनासब जे ओकर छियै, अपनासिके पुरा रुपसे उद्धार देतै ताकी ओकर अपनासब परमेश्वरके महिमाके प्रशंसा करे सकियै।

एफिसी 1:18

हमे यी भी प्रार्थना करैछियौ कि ऊ तोरासिके सचके आर उटा आशाके जकर लिए ऊ तोरासिके बोलैल्कौ छे, ओकरा समझैमे तोरसिके सहायता करौ। ताकी तुहेंसब जाने सक्हैं कि उटा आशिषसब कतनें महान आर महिमामय छै जकर प्रतिज्ञा परमेश्वर आपन सन्तसिके संगे कैल्कै छे।

एफिसी 1:5

कहिनेकी परमेश्वर अपनासिके प्रेम कैल्कै, ऊ बहुते पहलहैसे येशू ख्रीष्टके कैल कामके द्वारा अपनासिके आपन सन्तान बनाबैके फैसला कैल्कै रहे।

एफिसी 1:8

परमेश्वर यी अनुग्रह बहुते ज्ञान आर समझमे अपनासिके बहुते करिके देल्कै छे।

एफिसी 1:9

परमेश्वर उहे कैल्कै जे ऊ नुक्याके राखल्कै, आर अपनासिके उटा नुकैल योजना प्रकट कैल्कै जे ऊ पहलहैसे ही ख्रीष्टके द्वारा पुरा करैके फैसला कैल्कै रहे।

एफिसी 3:11

परमेश्वर आपन कहियो खतम नैहुएवाला नुकैल योजनाके मुताबिक एरं कैल्कै, जकरा ऊ आपनसिके प्रभु येशू ख्रीष्टके कैल कामके माध्यमसे पुरा कैल्कै।

कलस्सी 1:12

परमेश्वर पिताके धन्यवाद देते र, जे तोरासिके उटा उत्तराधिकारमे सामिल हुऐके योग्य बनैल्कौ छे जे ऊ आपन आदमीसिके लिए स्वर्गमे तैय्यार कैल्कै छे।

कलस्सी 3:24

कहिनेकी तुहेंसब जानैछैं कि प्रभु तोरासिके इनाम देतौ, जे यी छै कि ऊ तोरासिके उटा आशिषसिमेसे तोर हिस्सा देतौ जकरा ऊ आपन आदमीसिके लिए तैय्यार कैल्कै छे। एरं व्यवहार कर कहिनेकी तुहेंसब प्रभु ख्रीष्ट जे सच्चा मालिक छै ओकर सेवा करैछैं।

तीतस 2:14

उहे येशू ख्रीष्ट अपनासिके सभे पापसे छुटकारा दिलाबैके लिए आर नैतिक रुपसे शुद्ध बनाबैके लिए खुदके बलिदान कैल्कै ताकी अपनासब ओकर आपन विशेष आदमीसब बने सकियै जेसब बढियाँ काम करैके बडका इच्छा राखैछै।

तीतस 3:7

परमेश्वर एरंको इहे ल्याके कैल्कै ताकी आपन अनुग्रहसे ऊ अपनासिके आपन नजरमे धर्मी घोषित करे सकै, आर अपनासब ओकर बेटा-बेटीसब बने सकियै आर इहे ल्याके विश्वासके साथ अपनासब ओकरसंगे कहियो खतम नैहुएवाला जीवन पाबैके आशा राखे सकियै।

हिब्रू 6:17

इहे कारणसे परमेश्वर भी एकटा कसम खैल्कै। एकरद्वारा परमेश्वर ऊ आदमीसिके जकरा प्रतिज्ञा कैल गेलै रहे साफसे देखाबैले चहते रहै कि परमेश्वर आपन कैल प्रतिज्ञाके पुरा कर्तै।

याकूब 2:5

हे हमर प्रिय विश्वासी भ्या-बहिनसब, ध्यान दहैं। परमेश्वर ऊ आदमीसिके चुनल्कै छे, जे संसारके नजरमे गरिब छै ताकी ऊसब विश्वासमे मातबर भ्याजै आर उटा राज्यके हकवाला बनै, जकरा परमेश्वरके प्रेम करेवाला आदमीसिके दियैके वादा कैल्कै छे।

१ पत्रुस 1:4

अपनासब उटा महान आशिषसिके प्राप्त करैके लिए आगु महर देखैछियै जे आशिष परमेश्वर आपन आदमीसिके लिए राखैछै। परमेश्वर उटा आशिषसब तोरसिके लिए स्वर्गमे राख्ले छौ, जते ऊ नैसडैछै या खराब नैहैछै या नैहेराबैछै।

१ पत्रुस 3:9

खराबीके बदला खराबी नैकरेवाला आर अपमानके बदला अपमान नैकरेवाला, बरु ओकर बदलामे आशीर्वाद दिएवाला हु, कहिनेकी दोसर आदमीसिके आशीर्वाद दियैके लिए परमेश्वर तोरासिके बोलैल्कौ छे। यदि तुहेंसब एरं कर्भैं ते, परमेश्वर तोरासिके भी आशिष देतौ।