२ तिमोथी 2:14 - केवट नया कारार

¹⁴ जे बात हमे तोरा सिखैलियौ छे ऊ बात विश्वासीसिके घुरी-घुरी सिखा। आर प्रभुके समनामे कडा आज्ञा दहैं कि ऊसब बेकारके शब्दसिके विषयमे बहस नैकरै, जे भलाइ नैकरैछै, मगर यी सुनेवाला आदमीसिके हानी पहुँचाबैछै।

२ तिमोथी 2:14 Iomraidhean Croise

मत्ती 16:26

तुहें संसारमे सभे चीज प्राप्त करि लेल्हैं मगर परमेश्वरके संगे कहियो खतम नैहुएवाला जीवन पाबैके मौका खतम क्या देल्हैं ते, तोरा कोनो फैदा नैहैतौ। कि यी सम्भव छै कि कोय कहियो खतम नैहुएवाला जीवन पाबैके लिए परमेश्वरके कुछु दिए सकैछै? नै, ऊ कुछु नैदिये सकैछै।

चुन्ल आर भेज्ल चेलासब 13:10

“हे शैतानके बच्चा! हरेक बढियाँ कामके विरोध करेवाला! तुहें सभे तरहके छल-कपट आर बैमानीसे भर्ल छैं। कि तुहें प्रभुके सोझ रस्ताके टेढ करैले नैछोड्भैं?

चुन्ल आर भेज्ल चेलासब 15:24

हमेसब सुन्लियै छे कि, हमरसिके बीचमे से कुछु आदमी तोरसिकेलगत जैके तोरासिके आपन बातसे दुःख पहुँचैल्कहौं छे, आर तोरसिके मनके विचलित बन्या देल्कहौं छे मगर हमेसब ओकरासिके एरंको कोनो आज्ञा नैदेलियै रहे।

रोमी 14:1

विश्वासमे कमजोर आदमीके ओकर मान्यताके विषयमे ल्याके कोनो भी शंकाके बिना ही स्वीकार कर मगर ओकरा कि करना चाही आर कि नैकरना चाही यी विषयमे ओकरसंगे बहस नैकर।

गलाती 1:7

वास्तवमे खाली एक्केटा सच्चा खुश-खबरी छै, मगर कुछु आदमीसब ख्रीष्टके विषयके खुश-खबरीके बिगाडैले चाहैछै आर ऊ आदमीसब तोरासिके धोखा देल्कौ छे।

एफिसी 4:17

सेल्याके प्रभु हमरा देल अधिकारके साथ हमे तोरासिके यी बताबैछियौ कि जेरं अविश्वासी आदमीसब ओकरसिके बेकारके विचारके साथ आपन रीतिमे चलैछै, आब तुहेंसब फेर एरं जीवन नैजिते र।

१ थेसलोनिकी 4:1

अन्तमे हे विश्वासी भ्या-बहिनसब, हमेसब तोरासिके प्रभु येशूके नाममे आग्रह करैछियौ कि जेरंके हमेसब तोरासिके सिखैलियौ छे, परमेश्वरके खुश करेवाला जीवन जी। तुहेंसब पहलहैसे एरंके जीवन जियैछैं, आर हमेसब तोरासिके एरंके जियैके लिए आरहौ बेसी उत्साह दैछियौ।

२ थेसलोनिकी 3:6

हे विश्वासी भ्या-बहिनसब, हमरसिके प्रभु येशू ख्रीष्टसे मिल्ल अधिकारसे हमेसब तोरासिके आज्ञा दैछियौ कि कोनो एरंको संगी विश्वासीसे संगत नैकर जे हमरसिके सिखैल शिक्षाके आज्ञापालन नैकरैछै।

१ तिमोथी 1:6

झुट्ठा शिक्षकसब यी सभे बात करैले छोडल्कै छे आर खाली बेकारके बातसब करैछै।

१ तिमोथी 4:8

कहिनेकी शारीरिक कसरत तोरसिके शरीरके फैदा कर्तौ, मगर भक्ति सभे प्रकारसे फैदाके हैछै, कहिनेकी यी बात धर्तीमे जिन्दा रहैके समयमे आर मर्लके बाद भी इनामके प्रतिज्ञा करैछै।

१ तिमोथी 5:21

परमेश्वर आर येशू ख्रीष्टके समनामे आर चुन्ल स्वर्गदूतसिके समनामे हमे तोरा कडा आज्ञा दैछियौ कि कोनो भेदभाव आर पक्षपात नैकरिके यी नियमसब तुहें पालन कर।

१ तिमोथी 6:13

सभैके जीवन दिएवाला परमेश्वरके आर पन्तियस राज्यपाल पिलातसके समनामे मुकदमा चलैके समयमे दृढताके साथ बोलेवाला येशू ख्रीष्टके गवाह बन्याके हमे तोरासिके आज्ञा दैछियौ,

२ तिमोथी 1:6

सेल्याके हमे तोरा याद दिलाबैछियौ कि उटा वरदानसिके फेरसे प्रज्वलित कर जे वरदान परमेश्वरके द्वारा तोरा तब देल गेलौ जब हमे तोर मथामे हात राख्लियौ रहे।

२ तिमोथी 2:16

परमेश्वरके आराधना नैहुएवाला चीजसे आर बेकारके छलफल करैसे बच। कहिनेकी एरंको आदमीसब जे परमेश्वरके आराधना नैहुएवाला चीजमे भाग लैछै ऊसब आरहौ बेसी ईश्वरहीन भ्याजैछै।

२ तिमोथी 2:23

मगर मूर्ख आर बेकारके सवाल जबाबके इन्कार कर। कहिनेकी तुहें जानैछैं कि एकरासे झगडा हैछै।

२ तिमोथी 4:1

जब येशू ख्रीष्ट राजाके रुपमे राज्य करैके लिए ऐतै, ऊ दोनो जिन्दा आदमीसब आर मर्ल आदमीसिके न्याय कर्तै। सेल्याके परमेश्वर आर ख्रीष्टसंगे गवाहीके रुपमे हमे तोरा आग्रह करैछियौ,

तीतस 3:1

विश्वासीसिके याद दिला कि ऊसब शासकसिके आर अधिकारीसिके आदर करै, आर ओकरसिके आज्ञाकारी बनै, आर दोसर आदमीसिके लिए बढियाँ काम करै।

हिब्रू 13:9

सेल्याके तोरासिके यी सभे नया आर अलग-अलग शिक्षासिके अनुसरण नैकरना चाही जे तोरासिके गलत रस्तामे ल्याजैछौ। तोरसिके हृदय परमेश्वरके अनुग्रहसे मजगुत होना चाही मगर खानाके बारेमे नियमसिके पालन करिके नै। कहिनेकी उटा नियमके पालन करेवालासिके कोनो भलाइ नैभेलै छे।

२ पत्रुस 1:13

हमे जानैछियै कि जबतक हमे यी शरीरमे जिन्दा छियै ते यी उचित छै कि यी बातसिके विषयमे तोरासिके अक्सर याद दिलैते रहियौ, ताकी तुहेंसब उटा बातसब भूली नैजहैं।