२ तिमोथी 1:7 - केवट नया कारार

⁷ कहिनेकी परमेश्वर अपनासिके डरपोक नैबनैल्कै छे। मगर ओकर आत्मा आपनसिके ह्रदयके शक्ति दैछै, अपनासिके दोसर आदमीसिसे प्रेम करैले सहायता करैछै, आर अपनासिके आत्म-संयम दैछै।

२ तिमोथी 1:7 Iomraidhean Croise

लूका 10:19

हमे तोरासिके साँप आर बिच्छुसिके कुच्लैके आर दुश्मनके (शैतान) सभे सामर्थ्यके उप्पर अधिकार देलियौ छे आर कोनो चीज तोरासिके हानी नैकर्तौ।

लूका 15:17

जब ओकर चेत खुल्लै तब ऊ कहैल्कै, ‘हमर बाबुके लगत बहुते रोजीवाला नोकरसब पेट भरिके खाना खैके उगारैछै मगर हमे एत्ते भुख्ले मरैछियै।’

लूका 24:49

आर हमे खुद तोरसिके उप्परमे पवित्र आत्माके भेज्बौ जकर वादा हमर पिता कैल्कै छे। मगर तोरासिके तबतक सहरमे इन्तजार करे पड्तौ जबतक तोरासिके स्वर्गसे शक्ति नैदेल जैछौ।”

लूका 8:35

तब ओत्ते जे घटना भेलै रहे से बात देखैले आदमीसब येशूके लगत ऐलै। आर जे आदमीसे येशू भूतसब निकाल्लकै रहे, उटा आदमी ठीक भ्याके कपडा पिन्हीके आपन पुरा होशमे येशूके चरणमे बैठ्ल देखल्कै। यी देखिके ओकरासिके बहुते डर भेलै।

यूहन्ना 14:27

हमे तोरासिके शान्ति दैछियौ यानिकी उटा शान्ति जे हमरलगत छै। यी ऊ शान्ति नैछै जे संसार दिए सकैछै। तुहेंसब आपन मनमे व्याकुल नैहु आर नैडर।”

चुन्ल आर भेज्ल चेलासब 1:8

मगर तोरासिमे पवित्र आत्मा ऐलके बाद तुहेंसब शक्ति पैभैं, आर तुहेंसब यरूशलेम सहरमे, सारा यहूदिया प्रदेशमे, सामरिया प्रदेशमे आर धर्तीके अन्तिम छोरतक आदमीसिके बीचमे हमर गवाह हैभैं।”

चुन्ल आर भेज्ल चेलासब 10:38

परमेश्वर कोन तरहसे नासरत गाँवके निवासी येशूके पवित्र आत्मा आर शक्तिसे अभिषेक कैल्कै। आर कोन तरहसे ऊ सभे जगहमे घुमि-घुमिके भलाइके काम कर्ते रहै आर शैतानसे सतैल आदमीसिके ठीक करि देते रहै, कहिनेकी परमेश्वर ओकर संगमे रहै।

चुन्ल आर भेज्ल चेलासब 20:24

मगर हमे आपन जीवनके कोनो मोलके आर आपन लिए प्रिय नैसोचैछियै। हमे खाली एतनें चाहैछियै, कि परमेश्वरके अनुग्रहके खुश-खबरीके गवाही दियैले हमर दौड आर प्रभु येशूसे हमरा मिल्ल हमर सेवकाई हमे पुरा करे सकियै।

चुन्ल आर भेज्ल चेलासब 21:13

मगर पावल जबाब देल्कै, “तुहेंसब एरंके कानीके कथिले हमर मन दुःखी बनाबैछैं? हमे ते प्रभु येशूके कारण यरूशलेम सहरमे खाली बान्हल जैके लिए ही नै, मगर मरैके लिए भी तैय्यार छियै।”

चुन्ल आर भेज्ल चेलासब 26:11

आर हमे यहूदी आदमीसिके सभाघरसिमे बार-बार जैके ओकरासिके सजाय दिलैलियै, आर ओकरासिसे येशूके अपमान करवाबैके कोशिश कैलियै। आर एत्तेतक कि हमे एतनें सनकी भ्या गेलियै कि हमे ओकरासिके सताबैके लिए दोसर सहरसिमे भी गेलियै।

चुन्ल आर भेज्ल चेलासब 26:25

मगर पावल कहैल्कै, “परम आदरणीय राज्यपाल फेस्तस, हमे पागल नैछियै, मगर सच्चाई आर बुद्धिके बात बोलैछियै।

चुन्ल आर भेज्ल चेलासब 6:8

स्तिफनस अनुग्रह आर शक्तिसे परिपूर्ण भ्याके आदमीसिके बीचमे बडका-बडका चमत्कार आर चिन्हसब देखैल्कै।

चुन्ल आर भेज्ल चेलासब 9:22

मगर शाउल आरहौ बेसी शक्तिशाली रुपसे प्रचार करैले शुरु कैल्कै, आर येशू ही ख्रीष्ट छै कहिके ऊ एरंको पक्का सबूत देल्कै कि दमसकस सहरमे रहेवाला यहूदी आदमीसब कोनो जबाब दिए नैसकल्कै।

रोमी 5:5

आशा अपनासिके कहियो लज्जित हुऐले नैदैछै, कहिनेकी परमेश्वरके देल पवित्र आत्माद्वारा ऊ आपनसिके हृदय आपन प्रेमसे भरि देल्कै छे।

रोमी 8:15

कहिनेकी तोरासिके दासके आत्मा नैमिल्लौ छे, कि फेर परमेश्वरसे डराभैं। मगर परमेश्वरके आत्मा अपनासिके परमेश्वरके सन्तान बनाबैछै, इहे कारणसे अपनासब परमेश्वरके “हे बाबु, हे पिता” कहिके कहैछियै।

१ कोरन्थी 2:4

हमर शिक्षा आर प्रचार मानवीय ज्ञानके बढियाँ शब्दसिके साथ आर लोभाबेवाला शब्दसिके साथ नै, मगर पवित्र आत्मा तोरासिके एकटा शक्तिशाली तरिकासे देखैल्कै कि जे सन्देश हमे तोरासिके बतैलियौ ऊ सच रहै।

गलाती 5:22

पवित्र आत्माद्वारा उत्पन्न हुएवाला चरित्रसब यी छियै: प्रेम, आनन्द, शान्ति, धीरज, दया, भलाइ, विश्वस्तता,

कलस्सी 1:8

पवित्र आत्माद्वारा तोरसिके पैल प्रेमके विषयमे इपाफ्रास हमरासिके बतैल्कै।

हिब्रू 2:15

इहे कारणसे प्रभु येशू ऊ आदमीसिके उद्धार कैल्कै जेसब मरैके डरसे आपन जीवन दाससिके जुगुर जिते रहै।

१ पत्रुस 1:22

कहिनेकी तुहेंसब सचके पालन करिके शुद्ध भेल छैं, आब तोरासिके आपन विश्वासी भ्या-बहिनसिके निष्कपट प्रेम करे पडैछै। तुहेंसब एक दोसरके पुरा हृदयसे बहुते गहरा प्रेम कर।

१ यूहन्ना 4:18

यदि अपनासब परमेश्वरके सच्कोर प्रेम करैछियै ते, अपनासब परमेश्वरसे नैडरैबै। कहिनेकी जे परमेश्वरके पूर्ण रुपसे प्रेम करैछै, ऊ परमेश्वरसे नैडराबे सकैछै। यदि अपनासब डराबैछियै ते, ऊ डर न्यायके लिए छै, आर यी अपनासिके परमेश्वरप्रतिके सच्चा प्रेममे सिद्ध नैभेल देखाबैछै।