२ तिमोथी 1:12 - केवट नया कारार

¹² यी इहे कारण छै, कि हमे जेलमे भी दुःख भोगैछियै, मगर हमे लाज नैमानैछियै। कहिनेकी हमे ख्रीष्टके चिन्हैछियै, जकरापर हमे भरोसा कैलियै छे, आर हमरा निश्चय छै कि ख्रीष्ट फेर वापस नै आबैतक जे हमे ओकरा सौंप्लियै छे उटा बातके रक्षा ऊ करे सकैछै।

२ तिमोथी 1:12 Iomraidhean Croise

मत्ती 12:21

ओकरापर जात-जातके आदमीसब आशा राख्तै।”

मत्ती 24:36

“यी बातसब कोन घडी आर कोन दिन हैतै यी कोय नैजानैछै, नैते स्वर्गमे भेल स्वर्गदूतसब, नैते हमे पुत्र जानैछै। खाली परमेश्वर पिता ही उटा दिन या घडी जानैछै।

मत्ती 7:22

उटा दिन बहुते आदमीसब हमरा एरं कहतै, ‘प्रभु, हे प्रभु, कि हमेसब तोर नामके अधिकारसे परमेश्वरके तरफसे नै बोल्लियै? कि तोर नामके अधिकारसे भूतसब नैभगैलियै? आर कि तोर नामके अधिकारसे अनेक शक्तिशाली काम नैकैलिहौं?’

लूका 10:12

हमे तोरासिके कहैछियौ, न्यायके दिनमे उटा सजाय जे परमेश्वर सदोम सहरके आदमीसिके देल्कै, उटा सजाय बहुते कम हैतै जे सजाय परमेश्वर तोरासिके देतौ।”

लूका 23:46

आर येशू बडका आवाज निकालीके कहैल्कै, “हे पिता परमेश्वर, हमे आपन आत्मा तोर हातमे सौंपैछिहौं।” एतनें कहिके ऊ आपन जान त्यागल्कै।

यूहन्ना 17:15

तुहें ओकरासिके संसारसे ल्याजा कहिके हमे प्रार्थना नैकरैछियै, मगर ओकरासिके शैतानसे सुरक्षित राख।

यूहन्ना 6:44

हमरा भेजेवाला परमेश्वर पिता हमरलगत आबैके मन नैदेतै ते कोय भी हमरलगत नैआबे सक्तै, हमरलगत आबेवालाके हमे संसारके अन्तके दिनमे जिन्दा बनैबै।

चुन्ल आर भेज्ल चेलासब 13:46

तब पावल आर बरनाबास निडर भ्याके कहैल्कै, “परमेश्वरके वचन सभैसे पहेला तोरहैसिके सुनाना जरुरी रहै। मगर तुहेंसब एकरा नकारी देल्ह छे आर अपने आपके कहियो खतम नैहुएवाला जीवनके अयोग्य ठहरैलह छे। सेल्याके आब हमेसब गैर-यहूदी आदमीसिके लगत जैबै।

चुन्ल आर भेज्ल चेलासब 13:50

मगर यहूदी आदमीसिके अगुवासब परमेश्वरके भक्ति करेवाला आर कुलीन जनानीसिके आर सहरके प्रमुख आदमीसिके भडकैल्कै, आर पावल आर बरनाबासके विरुद्ध उपद्रव कर्याके ओकरासिके आपन सिमानासे बाहार निकाली देल्कै।

चुन्ल आर भेज्ल चेलासब 21:13

मगर पावल जबाब देल्कै, “तुहेंसब एरंके कानीके कथिले हमर मन दुःखी बनाबैछैं? हमे ते प्रभु येशूके कारण यरूशलेम सहरमे खाली बान्हल जैके लिए ही नै, मगर मरैके लिए भी तैय्यार छियै।”

चुन्ल आर भेज्ल चेलासब 7:59

जखनी ऊसब स्तिफनसके पत्थल मार्ते रहै, स्तिफनस प्रार्थना कैल्कै, “हे प्रभु येशू, हमर आत्माके ग्रहण कर।”

चुन्ल आर भेज्ल चेलासब 9:16

हमे ओकरा देखैबै कि आदमीसिके हमर बारेमे बताबैके कारण कतनें दुःख उठाबे पड्तै।”

रोमी 1:16

कहिनेकी हमे ख्रीष्टके खुश-खबरीमे गर्व करैछियै। आपन शक्तिसे परमेश्वर ऊ सभे आदमीके उद्धार करैछै जे यी खुश-खबरीपर विश्वास करैछै, सभैसे पहेला यहूदी आदमीसिके आर ऊसब भी जेसब गैर-यहूदी आदमीसब छै।

रोमी 9:33

जेरं धरमशास्त्रमे लिख्ल छै, “देख, हमे यरूशलेम सहरमे एकटा पत्थल राखैछियै, जे आदमीसिके ठोकर द्याके गिराबैके कारण बनैछै, मगर ओकरामे विश्वास करेवाला कोय भी लज्जित नैहैतै।”

१ कोरन्थी 1:8

आपनसिके प्रभु येशू ख्रीष्टके यी संसारमे वापस आबैके दिनमे तोरासिके दोषरहित राखैले परमेश्वर तोरासिके अन्ततक विश्वासमे मजगुत राख्तौ।

१ कोरन्थी 3:13

एक दिन हरेक आदमी आपन कैल काम केरंको छै से देख्तै। कहिनेकी जब येशू ख्रीष्ट फेर वापस ऐतै, ऊ यी सभे बातसब खुल्लम खुल्ला प्रकट कर्तै। ऊ हरेक सेवकके कैल काम देख्तै आर ऊ यी काम बढियाँ छै या खराब छै कहिके कहतै, ठीक ओहिने करिके जेरंके एकटा आदमी धातुसिके जाँच करैके लिए आगिनके प्रयोग करैछै, यी देखैके लिए कि उटा धातुसब लम्बा समयतक रहैछै कि जल्दी जरि जैछै।

फिलिप्पी 1:20

हमर उत्कट इच्छा आर आशा यी छै कि हमे कहियो लज्जित नैहैबै, मगर पहेला कैल जुगुर ख्रीष्टके बारेमे बोलैके हमरा साहास हैतै। चाहे हमे जियै या मरियै हमे हमर सारा जीवनसे ख्रीष्टके लगातार आदर देबै।

फिलिप्पी 3:10

हमे ख्रीष्टके जाने चाहैछियै। ओकर मुर्दासे जिन्दा हुएवाला शक्तिके अनुभव करियै आर ओकर मौतमे ओकरे जुगुर भ्याके ओकर दुःख भोगमे सामिल हुए सकियै।

फिलिप्पी 3:21

ऊ आपन शक्तिके उटा प्रभावके अनुसार जकरद्वारा ऊ सभे चीजके आपन वशमे करे सकैछै, आपनसिके कमजोर मरणशील शरीरके रुपके बदलीके आपन महिमामय शरीरके जुगुर बन्या देतै।

फिलिप्पी 3:8

मगर येशू ख्रीष्टके हमर प्रभुके रुपमे चिन्हैके कारण, जे सभे चीजसिसे मूल्यवान छै, हमे उटा सभे चीजके हानी सोच्लियै, ओकरे कारण हमे सभे चीज त्यागी देलियै, आर ऊ सभे चीजके कचरा सोच्लियै, ताकी हमे ख्रीष्टके हुए सकियै।

१ थेसलोनिकी 2:16

आर ऊसब गैर-यहूदी आदमीसिसे ओकरसिके उद्धारके लिए बात करैसे हमरासिके रोकैछै। जबतक अन्तमे परमेश्वर ओकरासिके सजाय नैदेतै, ऊसब पापपर पाप करैछै। आर एखन अन्तमे परमेश्वर ओकरासिपर गोसैल छै आर ओकरासिके जल्दी ही सजाय दिएवाला छै।

१ थेसलोनिकी 5:4

मगर हे विश्वासी भ्या-बहिनसब, तुहेंसब आत्मिक अनहारमे नैछैं मगर उजेतमे छैं। जेरंके रातके समयमे चोर आबैछै ओहिने करिके प्रभु येशू भी अचानकसे फेर वापस ऐतै ते तोरसिके लिए यी कोनो आश्चर्यके बात नैहैतै।

१ तिमोथी 6:20

तिमोथी परमेश्वरके देल काम करैके लिए सुनिश्चित कर। ईश्वरहीन आर बेकारके बातसब आर परमेश्वरके सच्चा शिक्षाके विरोध करेवाला शिक्षासिसे दूर र, जकरा ऊसब गलत तरिकासे “ज्ञान” कहैछै।

२ तिमोथी 1:14

अपनासिमे रहेवाला पवित्र आत्माके द्वारा तोरा सौंप्ल परमेश्वर तोरा देल सन्देशके रक्षा कर।

२ तिमोथी 1:16

प्रभु ओनिसिफरसके घरानापर दया करै, कहिनेकी ऊ बहुतेबेर हमर भेट कैल्कै आर हौसला भी देल्कै आर एत्ते जेलमे हमर भेट करैले आबैके लिए भी लाज नैमानल्कै।

२ तिमोथी 1:18

न्यायके दिनमे प्रभु ओनिसिफरसके ओकर महान दया देखाबै। तोरा आपनहौं भी बढियाँसे मालुम छौ कि ऊ एफिसस सहरमे हमर बहुते सहायता कैल्कै रहे।

२ तिमोथी 1:8

सेल्याके दोसर आदमीसिके आपनसिके प्रभु येशू ख्रीष्टके विषयमे बताबैमे लज्जित नैहु, आर तोरा यी बातसे भी लाज नै होना चाही कि हमे ख्रीष्टके सेवा करैके कारणसे जेलमे छियै। मगर तोरा उटा सामर्थ्यके प्रयोग करना चाही जे परमेश्वर तोरा दैछौ आर खुश-खबरीके लिए तुहें हमर दुःखमे साथ दे।

२ तिमोथी 2:9

हमे खुश-खबरीके प्रचार करैके कारणसे एकटा अपराधीके जुगुर जेलमे दुःख भोगैछियै। मगर कोनो भी चीज आदमीसिके परमेश्वरके खुश-खबरी फैलाबैसे रोके नैसकैछै।

२ तिमोथी 4:8

आब प्रभु हमर लिए स्वर्गमे धार्मिकताके मकुट राखल्कै छे, कहिनेकी हमे ओकरा पसन्द हुएवाला जीवन जिलियै छे। ऊ प्रभु जे सहीसे फैसला करैछै, हमरा उटा मकुट तब देतै जब ऊ फेर वापस ऐतै। ऊ खाली हमरा नै मगर ओकरा सभैके देतै जेसब ओकर वापस आबैके बहुते इच्छा करैछै।

तीतस 3:8

हमरद्वारा उप्परमे लिख्ल यी बात सही छै आर एकरापर भरोसा कैल ज्या सकैछै, आर हमे चाहैछियै कि जब तुहें विश्वासीसिके यी बातसब सिखाबैछैं यी बातसिके निरन्तर जोड दहैं। ताकी जेसब परमेश्वरपर विश्वास कैल्कै छे, ऊसब बढियाँ कामसब करैके लिए आपन समय दियैके लिए मन लगाबै। यी शिक्षासब सभैके लिए बढियाँ आर फैदाके छै।

हिब्रू 12:2

या अपनासब आदमीसिके विश्वासके शुरु करेवाला आर सिद्ध करेवाला येशूके विषयमे निरन्तर सोच्ते रहियै। ऊ आनन्दके लिए जे ओकर समनामे भविष्यमे राख्ल रहै, ऊ अपमानके कोनो चिन्ता नैकरिके क्रूसके दुःख सहैल्कै आर एरंके ऊ मरि गेलै आर आब ऊ परमेश्वरके दहिना हातके बगलमे सम्मानके जगहमे बैठ्लै।

हिब्रू 2:18

कहिनेकी येशू तकलीफ सहन कैल्कै आर परीक्षित भेलै, इहे ल्याके आब ऊ, ऊसब आदमीसिके सहायता करे सकैछै जेसब परीक्षाके सामना करैछै।

हिब्रू 7:25

इहे ल्याके जे येशूके द्वारा परमेश्वरके नज्दिक आबैछै, ऊ ओकरासिके सभे दिन बचाबे सकैछै। कहिनेकी ऊ ओकरसिके लिए बिन्ती करैके लिए सभे दिन जिन्दा छै।

१ पत्रुस 1:5

आर तोर विश्वासके द्वारा, परमेश्वर आपन शक्तिसे तोरसिके रक्षा करैछौ जबतक कि तुहें शैतानके शक्तिसे पुरा उद्धार पाबि नैलैछहैं जे कि ख्रीष्टके वापस आबैके दिनमे देखैल जैके लिए तैय्यार छै।

१ पत्रुस 4:16

मगर कोय आदमी ख्रीष्टियन हुऐके कारणसे दुःख भोगैछै ते ऊ लाज नैमानक। बल्की, परमेश्वरके प्रशंसा कर कि तुहें इहे ल्याके दुःख सहैछैं कहिनेकी तुहें ख्रीष्टके छैं।

१ पत्रुस 4:19

इहे ल्याके, जे आदमीसब ओरं दुःख सहैछै जेरं परमेश्वर चाहैछै, ओकरासिके निरन्तर परमेश्वरपर भरोसा राखना चाही, जे ओकरसिके सृष्टि कैल्कै छे। परमेश्वर सभे दिन उहे करैछै जकरा करैके ऊ प्रतिज्ञा कैल्कै रहे आर इहे ल्याके जे बढियाँ छै उटा काम कर्ते र।

यहूदा 1:24

एकटा खाली परमेश्वर ही छै जे तोरासिके पाप करैसे बचाबे सकैछौ आर तोरासिके निर्दोष आर आनन्दित बनाबे सकैछौ, जब ऊ तोरासिके आपन महिमामे आपन समनामे खडा करैछौ। ऊ अपनासिके आपनसिके उद्धारकर्ता प्रभु येशू ख्रीष्टद्वारा बचैल्कै छे। महिमा, गौरव, सामर्थ्य आर अधिकार समयके शुरुआतके पहेलासे ही ओकर रहै, आब भी ओकर छै आर सभे दिनके लिए ओकर ही रहतै। आमेन।