२ थेसलोनिकी 1:4 - केवट नया कारार

⁴ सेल्याके हमेसब परमेश्वरके मण्डलीके विश्वासीसिमे तोरसिके विषयमे गर्व करैछियै। तुहेंसब परीक्षा आर दुःख कष्टमे पडल पर भी आरहौ भी धीरजके साथ सहैछैं आर आरहौ भी येशू ख्रीष्टमे विश्वास करैछैं।

२ थेसलोनिकी 1:4 Iomraidhean Croise

रोमी 12:12

आपनसिके संगे भेल आशामे आनन्दित र। संकटमे धीरज धारण कर, प्रार्थनामे सभे दिन लाग्ल र।

रोमी 2:7

धीरजके साथ बढियाँ काम करिके महिमा, इज्जत आर अमरता खोजेवाला आदमीके परमेश्वर कहियो खतम नैहुएवाला जीवन देतै।

रोमी 8:25

मगर अपनासिके कुछु एरं मिलैके आशा छै जे आपनसिके लगत एखनतक नैछै, सेल्याके अपनासब धीरजके साथ तबतक इन्तजार करैछियै जबतक कि अपनासब ओकरा हासिल नैकरैछियै।

१ कोरन्थी 7:17

एखनतक जे हमे बतैले ऐलियौ छे ओकर सार बात यी छै: कि हरेक आदमीके आपन दैनिक जीवन उहे स्थितिमे जिना चाही जे स्थितिमे ऊ जिते रहै जब परमेश्वर ओकरा आपन आदमी हुऐके लिए बोलैल्कै रहे। आर इहे नियम हमे सभे मण्डलीसिमे सिखाबैछियै।

२ कोरन्थी 12:10

इहे ल्याके ख्रीष्टके लिए हमे आपन कमजोरीसिमे, अपमानसिमे, कष्टसिमे, सतावटसिमे आर विपत्तिसिमे खुश रहैछियै। कहिनेकी जब हमे कमजोर हैछियै तखनिहैं हमे ख्रीष्टके शक्तिसे बलवान हैछियै।

२ कोरन्थी 7:14

हमे तीतसके समनामे तोरसिके बारेमे गर्व कैलियै रहे, तकर खातिर हमरा लज्जित नैहुए पड्लै। जेरंके हमेसब सभे दिन तोरासिके सच कहैलियौ, ओहिने करिके तीतसके समनामे तोरसिके विषयमे हमरसिके गर्व करना सेहो सच साबित भेलै।

२ कोरन्थी 7:4

तोरासिपर हमरा पुरा भरोसा छै आर हमे तोरासिपर बहुते गर्व करैछियै। हमे खुब उत्साहित छियै आर हमर सभे कष्टसिमे हमे आनन्दसे भरपुर रहैछियै।

२ कोरन्थी 9:2

कहिनेकी हमे जानैछियै कि तुहेंसब सहायता करैके लिए उत्सुक छैं। जकर कारण हमे तोरसिके विषयमे माकेडोनिया प्रदेशके विश्वासीसिके समनामे गर्व करैछियै कि अखैया प्रदेशके तुहेंसब पौरे सालसे तैय्यारी करैछैं आर तोरसिके उत्सुकतासे ओकरसिमेसे बहुते झनके जोश मिल्लै छे।

२ कोरन्थी 9:4

एरं नैहै कि जब माकेडोनिया प्रदेशसे कुछु विश्वासीसब हमरसिके संगे आबै आर तोरसिके धन तैय्यार नैहौ ते कि पता हमेसब तोरसिके उप्पर आपन भरोसाके कारण शर्मिन्दा हैबै, मगर तुहेंसब आरहौ भी बेसी शर्मिन्दा हैभैं कहिनेकी हमेसब तोरासिपर बडका भरोसा राख्लियौ रहे।

१ थेसलोनिकी 1:3

आर जब हमेसब आपनसिके परमेश्वर पितासे प्रार्थना करैछियै, विश्वासके खातिर तोरसिके कैल कामसब, विश्वासीसिके प्रेम देखाबैके लिए कैल तोरसिके कडा मेहनत आर प्रभु येशू ख्रीष्टके दोसर आगमनके आशामे तोरसिके भोग्ल सतावटके हमेसब निरन्तर याद करैछियौ।

१ थेसलोनिकी 2:14

सेल्याके, हे विश्वासी भ्या-बहिनसब, तुहेंसब यहूदिया प्रदेशमे भेल परमेश्वरके मण्डलीसिके सहेल जुगुर सतावट सहलहैं जेसब येशू ख्रीष्टमे विश्वास करैछै। कहिनेकी तोरासिके आपने क्षेत्रके आदमीसब दुर्व्यवहार कैल्कौ आर ओकरासिके ओकरेसिके आपने यहूदी आदमीसब दुर्व्यवहार कैल्कै।

१ थेसलोनिकी 2:19

जब हमरसिके प्रभु येशू ख्रीष्ट फेर वापस ऐतै, तब हमरसिके आशा या आनन्द या गर्वके मकुट तुहेंसब ही हैभैं।

२ थेसलोनिकी 3:5

हमेसब प्रार्थना करैछियै कि प्रभु येशू ख्रीष्ट तोरासिके यी बुझैके योग्य बनाबौ कि परमेश्वर आपन आदमीसिके कतनें प्रेम करैछै आर जब आदमीसब ओकरा सतैल्कै रहे जेरंके ऊ खुद धीरज धारण कैल्कै ओहिने करिके तुहेंसब भी धीरज धारण कर।

हिब्रू 10:36

तोरासिके विश्वासके साथ धीरजसे निरन्तर इन्तजार करना चाही। तब तुहेंसब परमेश्वरके इच्छाके पुरा कर्भैं आर तोरासिके उटा सभे चीज प्राप्त हैतौ जकर प्रतिज्ञा परमेश्वर कैल्कै छे।

हिब्रू 6:15

आर अब्राहम बहुते समयतक धीरज राख्लके बाद प्रतिज्ञाके फल प्राप्त कैल्कै।

याकूब 5:11

तोरासिके मालुम छौ, हमेसब अन्ततक धीरज धारण करेवालासिके धन्यके कहैछियै। तुहेंसब अय्युब नामके आदमीके विषयमे सुन्ले ही छैं, ऊ दुःखके समयमे भी स्थिर रहै आर प्रभुके तरफसे जे ओकर प्रतिफल भेलै से भी तुहेंसब जानी लेल्हैं छे, जकरासे प्रभुके बहुते करुणा आर दया प्रकट हैछै।

२ पत्रुस 1:6

तोरासिके खाली यी नै जानना चाही कि समझदारीसे केरंके व्यवहार करना छै, बल्की तोरा अपने आपके नियन्त्रित भी करना चाही, तोरासिके नैते खाली अपने आपके नियन्त्रित करना चाही बल्की तोरासिके मुसीबतमे धीरज भी राखना चाही। तोरासिके खाली धीरज ही नैराखना चाही मगर परमेश्वरके खुश करेवाला जीवन भी जिना चाही।

प्रकाश 14:12

यी बातसब हुए ज्यावाला छै, सेल्याके परमेश्वरके आदमीसिके दुःख सहैमे धीरज राखना चाही। यीसब ऊ आदमीसब छै जेसब परमेश्वरके आज्ञासिके पालन करैछै आर विश्वासयोग्यताके साथ येशूके अनुसरण करैछै।