२ पत्रुस 3:2 - केवट नया कारार

² हमे एरं इहे ल्याके करैछियौ कहिनेकी हमे चाहैछियै कि तुहेंसब उटा वचनसिके याद राख, जे परमेश्वरके वक्तासब बहुते पहेला कहैल्कै रहे आर आपनसिके उद्धारकर्ता, प्रभु येशू ख्रीष्टके शिक्षासिके याद राख जे तोरासिके चुन्ल आर भेज्ल चेलासब देल्कौ जे तोरसिकेलगत ऐलौ रहे।

२ पत्रुस 3:2 Iomraidhean Croise

लूका 1:70

बहुते पहेला, परमेश्वर आपन पवित्र परमेश्वरके वक्तासिके द्वारा कहैल्कै कि ऊ हमरासिके हमरसिके दुश्मनसिसे आर ऊसब सभैके शक्तिसे बचैतै जे हमरासिसे घृणा करैछै।

लूका 24:27

येशू ओकरासिके पुरा धरमशास्त्रमे, मूसाके विधि-विधानसे शुरु करिके सभे परमेश्वरके वक्तासिके द्वारा आपन विषयमे लिख्ल बात सम्झैल्कै।

लूका 24:44

आर ओकरासिके कहैल्कै, “हमे तोरसिके संगे रहै बेरियाँ हमर बोल्ल बातसब इहे छै ‘हमर विषयमे मूसाके विधि-विधान, परमेश्वरके वक्ता आर भजनके किताबमे लिख्ल सभे बात पुरा हुहै पड्तै’ कहिके हमे तोरासिके कहैलियौ रहे!”

चुन्ल आर भेज्ल चेलासब 10:43

सभे परमेश्वरके वक्तासब ओकर गवाही देल्कै छे, जे कोय ओकरापर विश्वास कर्तै कि जे काम ख्रीष्ट क्रूसपर कैल्कै, ऊ कारणसे पापके माफी मिल्तै।”

चुन्ल आर भेज्ल चेलासब 28:23

तब ऊ यहूदी आदमीसब पावलके बात सुनैके लिए एकटा दिन तोकि देल्कै आर बहुते संख्यामे आदमीसब ओकर डेरामे ऐलै। ऊ ओकरासिके भरौवासे सझौवा तक व्याख्यान देल्कै, आर मूसाके विधि-विधान आर परमेश्वरके वक्तासिके किताबसे परमेश्वरके राज्यके गवाही देल्कै, आर येशूके विषयमे ओकरासिके विश्वास दिलाबैके कोशिश कैल्कै।

चुन्ल आर भेज्ल चेलासब 3:18

मगर परमेश्वर सभे आपन वक्तासिके द्वारा यी बात पहलहै घोषणा करिदेल्कै रहे कि ख्रीष्टके दुःख भोगे पड्तै आर मरे पड्तै। परमेश्वर यी बातके सच साबित कैल्कै।

चुन्ल आर भेज्ल चेलासब 3:21

मगर बहुते समय पहेला परमेश्वर आपन वक्तासिके द्वारा आदमीसिके यी प्रतिज्ञा कैल्कै कि येशूके स्वर्गमे उटा समयतक रहना जरुरी छै जब परमेश्वर ऊ सभे चीजसिके नया बन्या देतै जे ऊ बनैल्कै छे।

गलाती 6:2

तकलीफके सामना करैके समयमे एक दोसरके सहायता कर। एरंके तुहेंसब ख्रीष्टके देल नियमके पालन कर्भैं।

एफिसी 2:20

चुन्ल आर भेज्ल चेलासब आर परमेश्वरके वक्तासिके जगमे तुहेंसब एकटा इमारतके जुगुर छैं आर जकर सबसे महत्वपूर्ण पत्थल येशू ख्रीष्ट छै।

एफिसी 3:5

बित्ल समयमे, परमेश्वर आदमीसिके यी रहस्य प्रकट नैकैल्कै। मगर आब ऊ पवित्र आत्माके माध्यमसे आपन पवित्र चुन्ल आर भेज्ल चेलासिके आर आपन वक्तासिके यी बातके खुलासा कैल्कै छे।

१ तिमोथी 6:14

कि आपनसिके प्रभु येशू ख्रीष्ट स्वर्गसे फेर वापस नै आबैतक तुहेंसब कोनो भी गल्ती बिना तोरा करैले कहेल सभे आज्ञासब पालन कर।

२ पत्रुस 2:21

हमर कहैके मतलब यी छै कि, ख्रीष्टके कहियो स्वीकार नैकैल आदमीसिसे ख्रीष्टके विश्वास करिके त्यागेवाला आदमीसिके परमेश्वर कडा सजाय देतै। ओकरसिके लिए यी बढियाँ हैतियै यदि ऊसब कहियो यी जान्बे नैकर्तियै कि आपन जीवनके धार्मिक पथमे चलाबैके कि मतलब हैछै। आब ऊसब जानैछै कि सही कि छै, मगर ऊसब परमेश्वरके उटा आज्ञासिके अस्वीकार करिदेल्कै छे, जे हमे चुन्ल आर भेज्ल चेलासब ओकरासिके सिखैलियै रहे।

२ पत्रुस 3:15

यी जानी ले कि आपनसिके प्रभु आपनसिके प्रति धीरज धारण करैछै, एकर कारण यी छै कि ऊ आदमीसिके पाप करैले छोडिके परमेश्वरके तरफ मन लगाबैके समय दियैले चाहैछै ताकी ऊ ओकरासिके बचाबे सकै। जब आपनसिके संगी-विश्वासी पावल, जकरासे अपनासब प्रेम करैछियै, तोरासिके उटा ज्ञानके प्रयोग कर्ते हुए लिखल्कै, जे परमेश्वर ओकरा देल्कै ते, ऊ भी तोरासिके इहे बातसब बतैल्कौ, जे हमे तोरासिके बतैलियौ छे।

२ पत्रुस 3:16

आपन सभे चिट्ठीसिमे जे ऊ विश्वासीसिके लिखल्कै छे, ऊ इहे तरिकासे लिखैछै जे ऊ तोरासिके लिखल्कौ छे। मगर कुछु बातसब जे ऊ आपन चिट्ठीसिमे लिखल्कै छे, ओकरा समझना कठिन छै। जे आदमीसब बढियाँ शिक्षा नैपैल्कै छे आर जकरासिके निश्चय नैछै कि ऊसब कि विश्वास करैछै, ऊसब यी कठिन बातके मतलबके गलत तरिकासे व्याख्या करैछै, ओहिने ही जेरंके ऊसब धरमशास्त्रके दोसर भागसिके गलत व्याख्या करैछै। एरं करिके ऊसब खुद ही परमेश्वरके द्वारा आपन नाश हुऐके कारण बनैछै।

१ यूहन्ना 4:6

मगर अपनासब परमेश्वरके छियै। जे परमेश्वरके चिन्हैछै, ऊ हमरसिके बात सुनैछै मगर जे परमेश्वरसे नैऐलै छे ऊसब हमरसिके बात नैमानैछै। एरंके अपनासब जाने सकैछियै कि कोन सचके आत्मा छै आर कोन झुठके आत्मा छै।

यहूदा 1:17

मगर हे प्रिय विश्वासी भ्या-बहिनसब, तुहेंसब उटा बातसिके याद कर जे आपनसिके प्रभु येशू ख्रीष्टके चुन्ल आर भेज्ल चेलासब बहुते पहेला बत्या चुकल्कौ छे।

प्रकाश 19:10

जब हमे यी बात सुन्लियै ते हमे ओकर समनामे झुकी गेलियै जे हमरसंगे बात कर्ते रहै, कहिनेकी हमे ओकर आराधना करैले जैते रहियै। मगर ऊ हमरा कहैल्कै, “तुहें हमरा गोड नैलाग। हमे खाली परमेश्वरके एकटा सेवक छियै जेरं तुहें छैं आर तोर भ्यासिके जुगुर जे येशूके द्वारा प्रकट कैल गेल सच्चा शिक्षापर विश्वास करैछै आर मानैछै। खाली परमेश्वर ही छै जकर तोरा आराधना करना चाही। कहिनेकी यी आत्मा छै जे परमेश्वरके आदमीसिके येशूके द्वारा बतैल गेल सचके घोषणा करैके योग्य बनाबैछै।”