२ पत्रुस 3:10 - केवट नया कारार

¹⁰ मगर ख्रीष्ट जरुर फेर वापस ऐतै। ऊ अचानक फेर वापस आबी जैतै, जेरंके रातके समयमे कोनो चोर अचानक ही आबी जैछै। उटा समय आकाशमे गर्जनके आवाज हैतै आर आकाश अलप भ्याजैतै। आकाशमे सभे कुछु यानिकी सुरुज, चान आर तारा पुरा तरहसे जरि जैतै। उटा दिन परमेश्वर उटा सभे कामसिके प्रकट करि देतै जे काम आदमीसब कैल्कै छे ताकी ऊ ओकरसिके न्याय करे सकै।

२ पत्रुस 3:10 Iomraidhean Croise

मत्ती 24:35

आकाश आर धर्ती खतम हैतै, सभे दिनके लिए नैरहतै, मगर हमे जे कहैलियै छे उटा सभे दिनके लिए रहतै।”

मर्कूस 13:31

आकाश आर धर्ती खतम हैतै, सभे दिनके लिए नैरहतै, मगर हमे जे कहैलियै छे उटा सभे दिनके लिए रहतै।

लूका 12:39

मगर यी जान, अगर चोर आबैके ठीक समय मालुम हैतियै ते घरके मालिक आपन घरमे चोरी हुऐले नैदेतियै।

रोमी 8:20

कहिनेकी जे कुछु भी परमेश्वर बनैल्कै ऊ आपन मोल खतम क्यादेल्कै, यी ल्याके नै कि ऊसब खुद एरं चहते रहै, मगर इहे ल्याके कि परमेश्वर एरंको कैल्कै। तैय्योपर भी आशा छै।

१ कोरन्थी 1:8

आपनसिके प्रभु येशू ख्रीष्टके यी संसारमे वापस आबैके दिनमे तोरासिके दोषरहित राखैले परमेश्वर तोरासिके अन्ततक विश्वासमे मजगुत राख्तौ।

१ कोरन्थी 5:5

ऊ आदमी जे पापमय व्यवहार करैछै, ओकरा आपन मण्डलीसे निकाल आर उटा आदमीके शैतानके शक्तिमे वापस दहैं, ताकी यी आशा कैल ज्या सकैछै कि ऊ आदमी पाप करैले छोडिके परमेश्वरके तरफ मन लगैतै। कहिनेकी यदि ऊ यी करैछै ते, ऊ वास्तवमे उटा दिन बचैल जैतै जे दिन प्रभु न्याय कर्तै।

१ थेसलोनिकी 5:2

कहिनेकी तुहेंसब आपनहैं बढियाँसे जानैछैं कि जेरंके रातके समयमे चोर आबैछै ओहिने करिके प्रभु येशू भी अचानकसे फेर वापस ऐतै।

१ थेसलोनिकी 5:4

मगर हे विश्वासी भ्या-बहिनसब, तुहेंसब आत्मिक अनहारमे नैछैं मगर उजेतमे छैं। जेरंके रातके समयमे चोर आबैछै ओहिने करिके प्रभु येशू भी अचानकसे फेर वापस ऐतै ते तोरसिके लिए यी कोनो आश्चर्यके बात नैहैतै।

२ पत्रुस 3:11

जब कि परमेश्वर जरुर यी सभे चीजसिके नाश करि देतै, जेरं कि हमे एखन कहैलियौ छे, सेल्याके तोरासिके निश्चित रुपसे पवित्र आर ईश्वरीय तरिकासे व्यवहार करना चाही।

२ पत्रुस 3:12

जब कि तुहेंसब उटा दिनके इन्तजार करैछैं जब परमेश्वर संसारके न्याय करैके लिए ऐतै ते, उटा दिनके जल्दी आबैके लिए आपन तरफसे पुरा कोशिश कर। उटा दिन आगिन धधकीके उठ्तै आर आकाशके नाश करि देतै आर ओकर गर्मी आकाशमे सभे कुछु पघल्या देतै।

२ पत्रुस 3:7

जेरंके परमेश्वर धर्तीके सृष्टिके आज्ञा देल्कै रहे, ओहिने करिके ऊ आज्ञा देल्कै छे कि वर्तमान ब्रम्हाण्ड तबतक रहै जबतक परमेश्वर एकरा आगिनसे नै जर्या दै। परमेश्वर एकरासिके उटा दिनतक राखल्कै छे जब ऊ सभे आदमीसिके न्याय कर्तै आर ऊ आदमीसिके नाश करि देतै जेसब ओकर सम्मान नैकरैछै। तब परमेश्वर आकाश आर धर्तीके जर्या देतै।

यहूदा 1:6

तोरासिके ऊ दूतसिके विषयमे भी सोचना चाही, जे उटा अधिकारसे सन्तुष्ट नैरहै, जे परमेश्वर ओकरासिके देल्कै रहे, मगर स्वर्गमे आपन घरके त्यागी देल्कै, परमेश्वर ओकरासिके निच्चा अनहारमे अनन्त सिक्कडसब ल्याके बान्ही देल्कै, जते परमेश्वर ओकरासिके उटा महान दिनके लिए राखी रहलै छे जब परमेश्वर ओकरासिके कहियो खतम नैहुएवाला सजाय देतै।

प्रकाश 16:15

भूतसब शासकसिके आर ओकरसिके सेनासिके उटा जगहमे जमा कैल्कै, जकरा हिब्रू भाषामे आर-मागेड्डोन कहेल जैछै। सेल्याके प्रभु येशू कहैल्कै, “यी बात सुन! हमर फेर वापस आना चोरके जुगुर अचानक हैतै। ऊ आदमी धन्य छै जे हमे फेर वापस आबैके समयमे जग्गा रहैछै आर आपन कपडा तैय्यार राखैछै। तब ऊसब नंगा नैहैतै आर ऊसब बहुते आदमीसिके बीचमे बाहार जैबौ कर्तै ते भी ओकरासिके शर्मिन्दा बनाबेवाला कोनो चीज नैहैतै।”

प्रकाश 20:11

फेर हमे एकटा उजरा सिंहासन देख्लियै जकरापर परमेश्वर विराजमान रहै। मगर ओत्ते जते परमेश्वर विराजमान रहै, ओत्तेसे धर्ती आर आकाश सभे गायब भ्यागेलै आर कोय भी ओकरासिके फेर नैदेखल्कै।

प्रकाश 21:1

एकरबाद हमे नया आकाश आर नया धर्ती देख्लियै। कहिनेकी पुरना आकाश आर धर्ती समुन्दर समेत गायब भ्यागेलै।

प्रकाश 3:3

उटा शिक्षाके याद कर जे तुहें बहुते पहेला सुन्लहैं रहे आर विश्वास कैल्हैं रहे। जे तोरा सिखैल गेलौ रहे ओकर अनुसरण कर, पाप करैले छोड आर परमेश्वरके तरफ मन लगा। यदि तुहें गलत काम कर्ते रहैछैं ते हमे अचानक ऐबौ, जेरंके रातके समयमे चोर आबैछै आर तुहें उटा समयके भी नैजाने सक्भैं जब हमे तोरा सजाय दियैके लिए आबी जैबौ।

प्रकाश 6:14

आकाश उटा किताबके जुगुर गायब भ्यागेलै जकरा लपेटी लेल जैछै आर सभे पहाड आर समुन्दरके सभे टापूसब आपन जगहसे हटी गेलै।