२ पत्रुस 2:1 - केवट नया कारार

¹ जेरंके बहुते पहेला गलत शिक्षासब सिखाबेवाला आदमीसब इस्राएलीसिके बीचमे दिखाई देल्कै रहे, ओहिने करिके ही तोरसिके बीचमे झुट्ठा शिक्षकसब दिखाई देतौ। ऊसब झुट्ठा शिक्षासिके गुप्त रुपसे फैल्या देतौ, जे बात आदमीसिके ख्रीष्टमे विश्वास करैसे रोकी देतै। यी झुट्ठा शिक्षकसब ख्रीष्टके आपन मालिक मानैसे भी इन्कार करि देतै आर जे ओकरासिके पापके शक्तिसे छुटकारा देल्कै छे। एरंके ऊसब अपने आपके अचानक नाश करैतै।

२ पत्रुस 2:1 Iomraidhean Croise

मत्ती 10:33

मगर जे भी हमरा आदमीसिके समनामे खुदके हमर चेलाके रुपमे स्वीकार नैकर्तै, हम्हुँ ओकरा स्वर्गमे रहेवाला हमर परमेश्वर पिताके समनामे हमर चेलाके रुपमे स्वीकार नैकर्बै।”

मत्ती 24:11

बहुते झुट्ठा परमेश्वरके वक्तासब ऐतै, आर बहुते आदमीसिके धोखा देतै।

मत्ती 24:24

कहिनेकी झुट्ठा ख्रीष्टसब आर झुट्ठा परमेश्वरके वक्तासब ऐतै, अगर सम्भव हुए ते उटा आदमीसिके धोखा दियैके लिए जकरा परमेश्वर चुन्लकै छे, ऊसब चिन्ह आर झुट्ठा चमत्कार कर्तै।

मत्ती 24:5

बहुते आदमीसब हमर अधिकार प्रयोग करैले हमर नाम ल्याके ऐतौ। ऊसब कहतौ, ‘हमे ख्रीष्ट छियै’ आर ऊसब बहुते आदमीसिके आपन अनुसरण करवाबैके लिए भर्मित कर्तै।

मत्ती 7:15

“झुट्ठा परमेश्वरके वक्तासिसे होशियार र जे तोरसिकेलगत नोक्सानी नैकरेवाला भेंडाके भेष बदलीके आबैछै, मगर वास्तवमे हानीकारक डरलग्गा खटिहासब छै, जे आदमीसिके हमला करैछै।

मर्कूस 13:22

कहिनेकी झुट्ठा ख्रीष्टसब आर झुट्ठा परमेश्वरके वक्तासब ऐतै, अगर सम्भव हुए ते उटा आदमीसिके धोखा दियैके लिए जकरा परमेश्वर चुन्लकै छे, ऊसब चिन्ह आर झुट्ठा चमत्कार कर्तै।

लूका 12:9

मगर जे भी हमरा आदमीसिके समनामे खुदके हमर चेलाके रुपमे स्वीकार नैकर्तै, हम्हुँ ओकरा स्वर्गमे परमेश्वर पिताके स्वर्गदूतसिके समनामे हमर चेलाके रुपमे स्वीकार नैकर्बै।

लूका 21:8

येशू कहैल्कै, “होशियार र, कोय तोरासिके मूर्ख नैबनाबौ। बहुते आदमीसब हमर अधिकार प्रयोग करैले हमर नाम ल्याके ऐतौ। ऊसब कहतौ, ‘हमे ख्रीष्ट छियै’ आर समय नज्दिक ऐल छै, कहिके कहतौ। ओकरसिके कहेल बातके पाछु तुहेंसब नैलाग।

लूका 6:26

तुहेंसब जे आदमीसिसे प्रशंसा पाबैछैं, तोरसिके लिए बहुते भयानक हैतौ! कहिनेकी तोरसिके पुर्खासब भी झुट्ठा परमेश्वरके वक्तासिके तारिफ कर्ते रहौ।”

रोमी 16:18

कहिनेकी एरंको आदमीसब आपनसिके प्रभु ख्रीष्टके नै, मगर आपन पेटके लिए सेवा करैछै, आर ओकरसिके मिठ्ठ-मिठ्ठ बोली आर चापलुसीवाला बातसे सिधा-साधा आदमीसिके धोखा दैछै।

१ कोरन्थी 11:19

मगर तोरसिके बीचमे विभाजन होना भी जरुरी छै, ताकी तोरसिमेसे जकर लगत परमेश्वरके समर्थन छै, ओकरा पहचान्ल चल जैतै।

१ कोरन्थी 6:20

परमेश्वर तोरसिके लिए बडका मोल चुकैल्कौ छे जब ऊ ख्रीष्टके क्रूसपर बलिदान कैल्कै, सेल्याके आपन शरीरके द्वारा परमेश्वरके महिमा कर।

१ कोरन्थी 7:23

परमेश्वर तोर लिए बडका मोल चुकैल्कौ छे, सेल्याके आदमीसिके दास नैबन, मगर प्रभुके दास बन।

गलाती 2:4

तीतसके खतना नैहुऐके विषय एकटा मुद्दा बनी गेलै जब कुछु झुट्ठा विश्वासी भ्यासब आपनसिके समूहमे गुप्त रुपसे आबी गेलै आर आपनसिके उद्धारकर्ता येशूमे भेल आपनसिके आजादीके नाश करैके कोशिश कर्ते रहै ताकी ऊसब अपनासिके फेर यहूदी विधि-विधानके दास बनाबे सकै।

गलाती 3:13

मगर विधि-विधानके देल सरापसे ख्रीष्ट अपनासिके छुटकारा देल्कै छे। जब ख्रीष्ट क्रूसमे मर्लै, ऊ आपनसिके पापके सराप खुदपर लेल्कै। कहिनेकी धरमशास्त्रमे लिख्ल छै, “क्रूसमे मरेवाला सभेको श्रापित है।”

गलाती 4:17

ऊ खुश-खबरीके बिगाडैले चाहेवाला आदमीसब तोरासिके आपन समूहमे सामिल करैके लिए पुरा कोशिश करैछै। मगर ओकरसिके मकसद तोरसिके भलाइ करना नैछै। ओकरसिके मकसद ते तोरासिके हमरासे अलग करना छै ताकी तुहेंसब ओकर चेला बनी जहैं।

गलाती 5:20

मूर्तिपूजा, जादु-टोना, दुश्मनी, झरझगडा, जर्नी, क्रोध, स्वार्थीपन, फुट, गुटबन्दी,

एफिसी 1:7

ख्रीष्टके खून बहैल जैके कारणसे आपनसिके छुटकारा भेलै छे। यानिकी, आपनसिके पाप माफ कैल गेलै छे। परमेश्वरके अनुग्रह बहुते ही महान छै जे ऊ अपनासिके प्रशस्त करिके देल्कै छे।

एफिसी 4:14

सेल्याके, आब अपनासिके बच्चासिके जुगुर नै होना चाही। आब अपनासब उटा नावके जुगुर नैहु जकरा लहर आगु पाछु धक्लैछै आर हावा इन्हर-उन्हर घुमाबैछै। एकर मतलब छै कि चलाक आर ठग आदमीसब आब आपन झुट्ठा शिक्षासे अपनासिके धोखा नै दिए सकैछै।

फिलिप्पी 3:19

विनाश ओकरसिके अन्त छै, ऊसब खाली आपन शारीरिक इच्छा पुरा करैले जियैछै। लाज लागेवाला बातमे ऊसब गर्व करैछै, आर ऊसब सभे दिन खाली संसारके बातके बारेमे सोचैछै।

कलस्सी 2:18

ख्रीष्ट शरीरके शिर छै, ओकरे लिए ही शरीरके सभे अंगके देखभाल कैल जैछै आर संगहै राख्ल जैछै, एरंके यी परमेश्वरके चहेल मुताबिक बढैछै। अपने आपके अपमान करिके आर स्वर्गदूतसिके आराधना करैले लग्याके कक्रहौ तोरासिके अयोग्य बनाबैले नैदहैं। एरंको आदमीसब दर्शन देखैछै जे ओकरासिके मानव सोचके कारणसे मूर्खपनके घमण्डसे भरैछै। ऊसब ख्रीष्टके छोडी देल्कै छे।

कलस्सी 2:8

होशियार र, कहीं एरं नैहौ कि कोय भी तोरासिके छल-कपटसे बेकारके तर्क-वितर्कके द्वारा धोखा दौ। निश्चित कर कि तोरासिके कोय भी आपन बातमे विश्वास करैके लिए आपन जालमे नैफसाबौ। एरंको बात ख्रीष्टके मुताबिक नैछै, मगर आदमीके सिखैल शिक्षासे ऐलै छे।

१ तिमोथी 5:8

अगर कोय आपन रिश्तेदारसिके, खास करिके आपन परिवारके आदमीसिके देखभाल नैकरैछै ते एकरासे साफ जाहीर हैछै कि ऊसब येशू ख्रीष्टमे विश्वास नैकरैछै आर विश्वास नैकरेवाला आदमीसे भी खराब छै।

२ तिमोथी 4:3

कहिनेकी एरं समय आबैछै, जब आदमीसब सच्चा शिक्षाके स्वीकार करैले नैचहतै, मगर अपने आपके पसन्द हुएवाला बात खाली सुने चाहैछै आर ऊसब झुट्ठा शिक्षकसब खोज्तै जेसब ओकरासिके आपन मन-पसन्दके बात सिखैतै।

तीतस 1:11

एरंको आदमीसिके सिखाबैले अनुमति नैदहैं, कहिनेकी ऊसब झुट्ठा शिक्षा सिख्याके पुरा परिवारके विश्वासके बर्बाद करैछै। ऊसब एरंको झुट्ठा शिक्षा पैसा कमाबैके लिए सिखाबैछै।

तीतस 3:10

यदि कोनो आदमी विश्वासीसिके बीचमे फुट कराबैछै ते ओकरसंगे कडा तरिकासे बात कर आर ओकरा ओरं व्यवहार नैकरैके लिए क। यदि ऊ ओरंको व्यवहार आरहौ करैछै ते, ओकरा फेर चेतावनी दहैं। तकरबाद, यदि ऊ आरहौ ओरंको व्यवहार कर्ते रहैछै ते, तुहें एरंको आदमीके छोडी दिहैं।

हिब्रू 10:29

यदि मूसाके विधि-विधानके मुताबिक एरं किसिमके सजाय रहै ते, ऊ आदमीके सजाय बहुते बडका हैतै जे आदमी परमेश्वरके बेटाके तिरस्कार करैछै। ऊ परमेश्वरके बेटाके आपन पैरीके निच्चामे कुचली देल्कै छे कहिनेकी ऊ ओकर सम्मान नैकैल्कै। ऊ ख्रीष्टके उटा खूनके पवित्र नैमानल्कै जकरद्वारा परमेश्वर ओकरा पवित्र बनाबैके लिए नया करार शुरु कैल्कै रहे। ऊ पवित्र आत्माके अपमान कैल्कै जकरद्वारा ऊ आदमी अनुग्रह प्राप्त कैल्कै रहे।

१ पत्रुस 1:8

तुहेंसब येशूके कहियो नैदेख्लहैं छे, तैय्योपर तुहेंसब ओकरासे प्रेम करैछैं। सेल्याके तुहेंसब आनन्द आर प्रशंसाके साथ बहुते खुश छैं जकरा शब्दमे बयान नैकैल ज्या सकैछै।

२ पत्रुस 2:3

यीसब लोभी हैतै आर ऊसब बन्ल बनैल कहानीसब सुन्याके तोरासिके धोखा देतौ ताकी तोरासिसे पैसा कमाबे सकै। परमेश्वर बहुते समय पहेला ही फैसला करि लेल्कै रहे कि ऊ ओकरासिके सजाय देतै आर ऊ एरं करैके लिए तैय्यार छै। परमेश्वर जरुर ओकरासिके नाश करि देतै।

१ यूहन्ना 2:26

हमे तोरासिके ऊ आदमीसब जेसब आपनसिके संगतिके छोडी देल्कै छे ओकरसिके बारेमे चेतावनी दैछियौ जेसब तोरासिके झुट्ठा शिक्षाके द्वारा छल करैके कोशिश करैछौ।

१ यूहन्ना 4:1

हे प्रिय दोस्तसब, पवित्र आत्माद्वारा बोलैछियै कहिके दाबी करेवाला सभैके विश्वास नैकर, मगर आत्मासब परमेश्वरसे ऐल छै कि नैछै कहिके ओकर जाँच कर। कहिनेकी बहुते झुट्ठा परमेश्वरके वक्तासब यी संसारमे छै।

यहूदा 1:18

ऊसब तोरासिके कहैल्कौ रहे, “आपनसिके प्रभु येशू फेर वापस आबैसे पहेला एरंको आदमीसब हैतै जे प्रभु आर ओकर आदमीसिके मजाक उडैतै। इहे ऊ आदमीसब छै जकरसिके जीवनपर ओकरसिके आपन खराब इच्छाके नियन्त्रण छै।”

यहूदा 1:4

हमे तोरासिके लिखैछियौ कहिनेकी कुछु आदमीसब जे येशू ख्रीष्टमे विश्वास करैके दिखावा करैछै, ऊसब तोरसिके मण्डलीमे सामिल भ्या गेलौ छे। ऊसब परमेश्वरके सम्मान नैकरैछै आर ऊसब एरं कहिके गलत शिक्षा दैछै, कहिनेकी परमेश्वर आपन अनुग्रहसे आपनसिके पापसिके माफ करि दैछै, इहे ल्याके अपनासब अनैतिक जीवन जिये सकैछियै। ऊसब येशू ख्रीष्टके अस्वीकार करैछै, जे आपनसिके एक्केटा मालिक आर आपनसिके प्रभु छै। बहुते समय पहेला धरमशास्त्र कहैछै कि परमेश्वर एरं आदमीसिके सजाय देतै।

प्रकाश 13:14

बहुते आदमीसब दोसर जंगली जानवरके झुट्ठा चमत्कारसिसे प्रभावित भ्याके धोखा खैल्कै जे उटा पहेलावाला जंगली जानवरके शक्तिसे कैल्कै रहे। दोसर जंगली जानवरके द्वारा आदमीसिके कहेल गेलै कि ऊसब पहेलावाला जंगली जानवरके पूजा करैके लिए एकटा मूर्ति बनाबै, जे हतियारसे घायल भ्यागेलै रहे, मगर फेरसे ठीक भ्यागेलै रहे।

प्रकाश 2:13

हमे जानैछियै कि तोर सहर शैतानके कब्जामे छौ, मगर एकर बावजुद भी तुहें हमरापर आपन विश्वासके मजगुतसे पक्डीके राख्लहैं छे आर तुहें हमर शिक्षासिके नैछोडलहैं छे, एत्तेतक कि तखनी भी नै जब बहुते समय पहेला एन्टिपासके जान मार्ल गेलै रहे। ऊ हमर वचनके प्रचार करैमे विश्वासयोग्य रहै, इहे ल्याके ओकरा तोर सहरमे जान मार्ल गेलै जे सहर शैतानके कब्जामे छै।

प्रकाश 2:9

हमे जानैछियै कि तोरा सतैल गेलौ छे आर तुहें गरिब छैं। मगर आत्मिक बातमे तुहें बहुते मातबर छैं। हमे ऊ आदमीसिके विषयमे जानैछियै जेसब दावा करैछै कि ऊसब परमेश्वरके चुन्ल आदमीसब यानिकी यहूदी आदमीसब छै, मगर नैछै। ऊसब तोर विषयमे अपमानवाला बात बोलैछै, मगर वास्तवमे ऊसब उटा दलके सदस्य छै जे शैतानके छै।

प्रकाश 3:8

हमे जानैछियै कि तुहें कि करैछैं। हमे जानैछियै कि तुहें बहुते मजगुत नैछैं। मगर जे हमे तोरा कहैलियौ ओकर तुहें पालन कैल्हैं छे। तुहें हमरापर निरन्तर विश्वास करैछैं। सेल्याके, हमे तोर लिए एकटा केबाड खोल्लियौ छे, जकरा कोय भी बन्द नैकरे सकैछै।

प्रकाश 5:9

ऊसब यी नया गीत बलि-भेंडा यानिकी येशू ख्रीष्टके विषयमे गाबैछै, “तोरलगत यी किताबके खोलैके लिए मोहरसिके लियैके आर तोडैके अधिकार छै, कहिनेकी तोर जान मारि देल गेल्हौं रहे आर आपन मौतके खूनसे तुहें हरेक कुलसब, हरेक भाषासब, आदमी आर हरेक जात-जातके आदमीसे, परमेश्वरके लिए आदमीसिके मोल चुक्याके किनि लेलह छे।

प्रकाश 6:10

तब ऊसब जोर-जोरसे परमेश्वरसे कहैल्कै, “हे पवित्र आर सच्चा प्रभु, तुहें धर्तीमे रहेवाला ऊ दुष्ट आदमीसिके सजाय दियैमे एतनें लम्बा इन्तजार कहिने करैछ? हमेसब बिन्ती करैछिहौं कि तुहें ऊ आदमीसिके व्यवहारके बदला ल्या जेसब हमरसिके हत्या कैल्कै छे।”