२ पत्रुस 1:10 - केवट नया कारार

¹⁰ सेल्याके हे विश्वासी भ्या-बहिनसब, अपने आपके आर दोसर आदमीसिके यी देखाबैके लिए आरहौ भी बढियाँ व्यवहार करैके कडा मेहनत कर कि परमेश्वर तोरासिके वास्तवमे चुनल्कौ छे आर तोरासिके आपन आदमी हुऐके लिए बोलैल्कौ छे। यदि तुहेंसब एरं कर्भैं ते तुहेंसब निश्चित रुपसे परमेश्वरसे अलग नैहैभैं।

२ पत्रुस 1:10 Iomraidhean Croise

मत्ती 22:14

यी खिसाके निचोड एरं छै कि बोलैल बहुते छै, मगर चुन्ल बहुते कम छै।”

रोमी 11:29

कहिनेकी परमेश्वर आपन वरदान आर बुलाहटसे कहियो भी आपन मन नैबदलैछै।

२ तिमोथी 2:19

मगर परमेश्वरके आदमीसब एकटा जगके जुगुर छै, यानिकी ऊसब सभे दिन आपन विश्वासमे स्थिर रहैछै। यी जगमे यी शब्दसब लिख्ल छै: “प्रभु आपन आदमीसिके चिन्हैछै” आर यी भी लिख्ल छै, “जे आदमीसब कहैछै कि ऊसब परमेश्वरके छै ऊ आदमीसिके दुष्ट कामसब करैके लिए बन्द करे पडैछै।”

हिब्रू 6:11

हमरसिके बडका इच्छा छै कि जबतक तुहेंसब जिन्दा रहभैं, तबतक तुहेंसब प्रेमपूर्ण सेवाके काम कर्ते रहभैं, यी सुनिश्चित करैके लिए कि जे तुहेंसब आशा करैछैं उटा सच भ्याजैतै। तब तुहेंसब लापरवाह नै बन्भैं। बरु तुहेंसब ऊ आदमीसिके उदाहरणके अनुसरण कर्भैं जेसब आपन विश्वास आर धीरजके कारण परमेश्वरके प्रतिज्ञाके प्राप्त करेवाला छै।

हिब्रू 6:19

जेरंके एकटा बडका किल्लासे बान्हल रस्सी नावके स्थिर आर मजगुत राखैछै, ओहिने करिके यी आशा आपनसिके जीवनके स्थिर आर मजगुत बनैले राखैछै। जकरामे अपनासब आशा करैछियै ऊ येशू छै आर ऊ स्वर्गमे परमेश्वरके मन्दिरके पर्दाके पाछु महा-पवित्रस्थानमे परमेश्वरके नज्दिक गेलै।

याकूब 2:10

कहिनेकी जे कोनो आदमी सभे विधि-विधानके पालन करैछै मगर ऊ आदमी विधि-विधानमे लिख्ल एकटा भी बातके उलंघन करैछै ते, ऊ आदमी विधि-विधानके सभे बात उलंघन करैके दोषी ठहरैछै।

१ पत्रुस 1:2

परमेश्वर पिता बहुते पहेला ही तोरासिके आपन आदमी बनाबैके लिए आर पवित्र आत्माके कामके द्वारा तोरासिके पवित्र बनाबैले चुनैके फैसला कैल्कै रहे। ऊ एरं इहे ल्याके कैल्कै ताकी तुहेंसब येशू ख्रीष्टके आज्ञापालन करहैं आर ओकर खूनके द्वारा शुद्ध हुए सक्हैं। हमे प्रार्थना करैछियौ कि परमेश्वर तोरासिके बहुते अनुग्रह आर शान्ति दौ।

१ पत्रुस 1:5

आर तोर विश्वासके द्वारा, परमेश्वर आपन शक्तिसे तोरसिके रक्षा करैछौ जबतक कि तुहें शैतानके शक्तिसे पुरा उद्धार पाबि नैलैछहैं जे कि ख्रीष्टके वापस आबैके दिनमे देखैल जैके लिए तैय्यार छै।

२ पत्रुस 1:3

परमेश्वर आपन शक्तिके द्वारा अपनासिके उटा सभे कुछु देल्कै छे, जे अपनासिके एकटा ईश्वरीय जीवन जियैके लिए चाही। यी सम्भव छै कहिनेकी अपनासब परमेश्वरके चिन्हैछियै आर ऊ उहे छै जे अपनासिके आपन महिमा आर नैतिक भलाइके द्वारा आपन आदमी हुऐके लिए बोलैल्कै छे।

२ पत्रुस 1:5

कहिनेकी तुहेंसब ईश्वरीय स्वभावमे सामिल हुऐके लिए बन्ल छैं, तुहेंसब ख्रीष्टमे विश्वास करेवाला खाली नै मगर तुहेंसब दोसर आदमीसिके लिए सभे दिन बढियाँ काम करैके कोशिश भी करे पडैछै। तुहेंसब बढियाँ काम करेवाला खाली नै, मगर तुहेंसब समझदारी तरिकासे व्यवहार करेवाला आदमी भी बने पडैछै।

२ पत्रुस 3:14

हे प्रिय विश्वासी भ्या-बहिनसब, परमेश्वर संसारके न्याय करैके दिनके तुहेंसब इन्तजार करैबेरियाँ तोरासिके पवित्र आर निष्खोट हुऐके लिए आर ओकरसंगे शान्तिमे रहैके लिए आपन तरफसे पुरा कोशिश करे पडैछै।

२ पत्रुस 3:17

सेल्याके हे प्रिय विश्वासी भ्या-बहिनसब, तुहेंसब पहलहैसे जानैछैं कि यी बातसब हैतै। सेल्याके होशियार र, ताकी जे आदमीसब नियमसिके नैमानैछै ओकरसिके झुठसे धोखा नैखो। यदि तुहेंसब ओकरसिके अनुसरण करैछैं ते तुहेंसब उटा बात पर शंका करैले शुरु करि देभैं जकरापर तुहेंसब एक समय मजगुतीसे विश्वास कैल्हैं रहे।

यहूदा 1:24

एकटा खाली परमेश्वर ही छै जे तोरासिके पाप करैसे बचाबे सकैछौ आर तोरासिके निर्दोष आर आनन्दित बनाबे सकैछौ, जब ऊ तोरासिके आपन महिमामे आपन समनामे खडा करैछौ। ऊ अपनासिके आपनसिके उद्धारकर्ता प्रभु येशू ख्रीष्टद्वारा बचैल्कै छे। महिमा, गौरव, सामर्थ्य आर अधिकार समयके शुरुआतके पहेलासे ही ओकर रहै, आब भी ओकर छै आर सभे दिनके लिए ओकर ही रहतै। आमेन।

प्रकाश 22:14

आपन कपडा धोयके साफ राखेवालासब धन्यके छै, कहिनेकी ओकरासिके सहरके केबाडसे प्रवेश करैके अधिकार देल जैतै। आर ओकरासिके उटा गाछके फल खैके भी अधिकार देल जैतै जे जीवन दैछै।