१ तिमोथी 1:9 - केवट नया कारार

⁹ हमरासिके यी भी मालुम छै कि मूसाके विधि-विधान परमेश्वरके नजरमे सही भेल आदमीसिके लिए नैछै मगर परमेश्वरके विधि-विधानके बेवास्ता करिके जानी-जानीके आज्ञा नैमानेवाला आदमीसिके लिए, आर परमेश्वरके आराधना नैकरेवाला आर निरन्तर पाप करेवाला आदमीसिके लिए, आर परमेश्वरके सम्मान नैकरेवाला दुष्ट आदमीसिके लिए, आर आपन मयाँ-बाबुके आर दोसर आदमीसिके जान मारेवाला आदमीसिके लिए छै।

१ तिमोथी 1:9 Iomraidhean Croise

मत्ती 10:21

“जे आदमीसब हमरापर विश्वास नैकरैछै, ऊसब आपन भ्याके गिरफ्तार करि लेतै, जे हमरापर विश्वास करैछै ऊसब मार्ल जैतै, बाबु आपन बालबच्चाके संगमे भी अहिने कर्तै आर बालबच्चासब आपन मयाँ-बाबुके खिलाफ विद्रोह कर्तै आर ओकरसिके जान मारैले लगैतै।

रोमी 1:30

दोसरके बदनाम करैछै। ऊसब परमेश्वरके भी घृणा करैछै, कक्रहौ भी इज्जत नैकरैछै मगर आपनहैं घमण्डसे फुलैछै, डींग मारैछै। आर खराब बातसब खोजी-खोजीके निकालैछै। ऊसब मयाँ-बाबुके बात नैमानैछै।

रोमी 4:13

परमेश्वर अब्राहम आर ओकर सन्तानसे प्रतिज्ञा कैल्कै कि ऊ ओकरासिके यी संसार देतै। यी प्रतिज्ञा सेल्याके कैल नैगेलै रहे कहिनेकी अब्राहम विधि-विधानके पालन कैल्कै, मगर परमेश्वरमे ओकर विश्वासके कारण ओकरा धर्मी घोषित कैल्कै।

रोमी 5:20

मूसाके विधि-विधान इहे ल्याके देल गेलै ताकी सभे आदमीसब देखे सकै कि ऊसब कतनें पापी रहै। मगर जब आदमीसब आरहौ बेसी पाप कैल्कै, परमेश्वरके अनुग्रह आरहौ बेसी बढ्लै

रोमी 6:14

तब तोरासिपर पापके कोनो अधिकार नैहैतौ, कहिनेकी तुहेंसब विधि-विधानके अधिनमे नै, मगर परमेश्वरके अनुग्रहके अधिनमे जियैछैं।

गलाती 3:19

तब फेर विधि-विधान कहिने देल गेलै ते? विधि-विधान आदमीसब कतनें पापी छै कहिके देखाबैके लिए देल गेलै। मूसाके विधि-विधानके तबतक रहना रहै जबतक अब्राहमके उटा सन्तान नैऐलै, जकर विषयमे परमेश्वर प्रतिज्ञा कैल्कै रहे। विधि-विधान मूसाके स्वर्गदूतसिके सहायतासे देल गेलै रहे आर मूसा परमेश्वर आर आदमीसिके बीचमे मध्यस्थकर्ता भेलै।

गलाती 5:18

यदि पवित्र आत्मा तोरसिके जीवनके अगुवाई करैछौ ते तुहेंसब मूसाके विधि-विधानके अधिनमे नैहैछैं।

गलाती 5:21

डाहा, पियक्कडपन, मौजमजा आर ऊसब एरंको दोसर सभे खराब कामसब करैछै। यी सभैके विषयमे हमे तोरासिके चेतावनी दैछियौ आर पहेला भी देलियौ छे। जे एरंको कामसब करैछै, ऊसब परमेश्वरके राज्यके हकदार नैबन्तै।

गलाती 5:23

नम्रता आर संयम। एरंको किसिमके चरित्रपर रोक लगाबैके लिए कोनो नियम नैछै।

२ थेसलोनिकी 2:8

सेल्याके, जब ख्रीष्ट विरोधीके रोकेवाला चीजके हटैल जैतै तब येशू ख्रीष्ट दिखाई पड्तै। तब उटा ख्रीष्ट विरोधीके प्रभु येशू नाश करैके आदेश द्याके आर ओकर फेर वापस आबैके महिमा देख्याके शक्तिहीन बनैतै।

१ तिमोथी 4:7

परमेश्वरके अनादर करेवाला बनौटी आर मूर्ख खिसासिसे पुरा रुपसे अलग र, आर ईश्वरीय जीवन बिताबैके लिए अपने आपके निरन्तर तालिम दहैं।

१ तिमोथी 6:20

तिमोथी परमेश्वरके देल काम करैके लिए सुनिश्चित कर। ईश्वरहीन आर बेकारके बातसब आर परमेश्वरके सच्चा शिक्षाके विरोध करेवाला शिक्षासिसे दूर र, जकरा ऊसब गलत तरिकासे “ज्ञान” कहैछै।

२ तिमोथी 2:16

परमेश्वरके आराधना नैहुएवाला चीजसे आर बेकारके छलफल करैसे बच। कहिनेकी एरंको आदमीसब जे परमेश्वरके आराधना नैहुएवाला चीजमे भाग लैछै ऊसब आरहौ बेसी ईश्वरहीन भ्याजैछै।

२ तिमोथी 3:2

कहिनेकी आदमीसब खाली अपने आपके प्रेम कर्तै, रुपिया पैसाके मोह कर्तै, घमण्डी हैतै, ऊसब दोसर आदमीसिके निन्दा कर्तै, मयाँ-बाबुके आज्ञापालन नैकर्तै, धन्यवादी नैहैतै आर परमेश्वरके सम्मान नैकरिके दुष्ट बन्तै।

तीतस 1:10

हमे एरं इहे ल्याके कहैछियौ कहिनेकी बहुते आदमीसब सही शिक्षाके विरुद्धमे विद्रोह कर्तै, यानिकी ऊसब जे बकवास बातसब सिखाबैछै आर जेसब दोसर आदमीसिके धोखा दैछै। यी बात खास करिके कुछु यहूदी आदमीसिके विषयमे सच छै, जेसब विश्वासी बनी गेलै छे। खास करिके ऊ आदमीसब एरंको समूहके छै जेसब खतनाके नियमके मुताबिक सभे विश्वासीसिके खतना हुए पडैछै कहिके कहैछै।

तीतस 1:16

यी झुट्ठा शिक्षकसब परमेश्वरके चिन्हैछियै कहिके कहैछै, मगर ऊसब व्यवहारमे साफसे देखाबैछै कि ऊसब परमेश्वरके नैचिन्हैछै। कहिनेकी परमेश्वर ओरंको आदमीसिके घृणा करैछै आर ऊसब कोनो भी बढियाँ काम करैमे असमर्थ हैछै।

तीतस 1:6

मण्डलीके अगुवाके एक्केटा पतनी होना चाही। ऊ दोषरहित आर एरंको आदमी होना चाही जकर बेटा-बेटीसब विश्वासी छै, आर ऊ बेटा-बेटीसब बढियाँ व्यवहार करक ताकी ओकरसिके खराब व्यवहारके लिए कोय भी आदमी ओकरासिके दोषी नैठहराबै।

तीतस 3:3

कहिनेकी अपनासब भी विश्वासी हुऐसे पहेला मूर्ख रहियै, परमेश्वरके आज्ञापालन नैकर्ते रहियै आर आदमीसब अपनासिके धोखा देल्कै रहे। अपनासब दासके जुगुर रहियै जे सभे प्रकारके खराब कामसब करैके इच्छासे नियन्त्रित रहै जकरासे अपनासिके आनन्द मिल्ते रहै। अपनासब आपन समयके खराब तरिकासे व्यवहार करैमे आर दोसर आदमीसिसे ईर्ष्या करैमे बितैते रहियै। अपनासब घृणित आदमीसब रहियै; सभेको अपनासिके घृणा कैल्कै आर अपनासब भी ओकरासिके घृणा कैलियै।

हिब्रू 11:31

विश्वासेद्वारा राहाब वेश्या परमेश्वरके आज्ञा उलंघन करेवालासिके संगे नाश नैभेलै, कहिनेकी ऊ इस्राएली सुराकीसिके स्वागत कैल्कै जेसब गुप्त रुपसे यरिहो सहरके भेद लियैके लिए ऐलै रहे।

हिब्रू 12:16

तोरसिमेसे कोय भी व्यबिचारी या अब्राहमके पोता एसावके जुगुर अधर्मी नैहु। कहिनेकी ऊ बडका बेटा रहै, इहे ल्याके ओकरलगत खास उत्तराधिकारी हुऐके अधिकार रहै। मगर ऊ आपन जनमके अधिकारके सम्मान नैकैल्कै आर इहे ल्याके ऊ आपन छोटका भ्या याकूबके यी अधिकारके एक छाँकके भोजनके लिए बेचि देल्कै।

१ पत्रुस 2:7

यी पत्थल तोरसिके लिए बहुते किमती छौ जे येशू ख्रीष्टमे विश्वास करैछैं। मगर जे आदमीसब ओकरापर विश्वास नैकरैछै ओकरसिके विषयमे धरमशास्त्र कहैछै कि, “राज मिसतिरीसब जेटा पत्थलके प्रयोग करैसे इन्कार करिदेल्कै, उटा पत्थल इमारतके जगके सभैसे महत्वपूर्ण पत्थल बनी गेलै छे।”

१ पत्रुस 3:20

यी ऊ आदमीसिके आत्मासब रहै, जेसब बहुते समय पहेला परमेश्वरके आज्ञाके उलंघन कैल्कै रहे। जब नूह आपन नाव बनैते रहै ते, परमेश्वर धीरजके साथ इन्तजार कर्ते रहै कि देखियै ऊ आदमीसब पाप करैले छोडिके परमेश्वरके तरफ मन लगाबैछै। मगर जब पानी संसारके विनाश करिदेल्कै ते नावमे प्रवेश करेवाला खाली आठ आदमीसब बचैल गेलै रहे।

१ पत्रुस 4:18

जेरं कि धरमशास्त्रमे लिख्ल छै, “यदि एकटा बढियाँ आदमीके बचैल जाना एतनें कठिन छै ते, दुष्ट आदमी आर पापी आदमीसब जरुर ही हेर्या जैतै।”

यहूदा 1:15

ऊ सभे आदमीसिके न्याय कर्तै आर सभे अधर्मी आदमीसिके द्वारा कैल गेल अनैतिक आर खराब कामसिके लिए आर पापी आदमीसिके परमेश्वरके विरुद्धमे कैल उटा सभे अपमानजनक कामसिके लिए सजाय देतै।”

प्रकाश 21:8

मगर जे हमरापर विश्वास नैराखैछै, ओकरासिके जबरजस्ती गन्धकसे जरेवाला उटा तालाबमे फेक्ल जैतै, जे कि दोसर मौत छै। आर यी नतिजा ओकरसिके भी हैतै, जेसब आदमीसिके समनामे हमरा स्वीकार करैसे डराबैछै, खराब कामसब करैछै, जेसब हत्यारासब छै, जेसब व्यबिचार करैछै, जादु-टोना करैछै आर मूर्तिसिके पूजा करैछै या झुठ बोलैछै।”

प्रकाश 22:15

मगर ऊ आदमीसब जे दुष्ट काम करैछै, जादु-टोना करैछै, जेसब व्यबिचार करैछै, आर मूर्तिसिके पूजा करैछै या ऊसब जे झुठ बोलैछै, ऊसब कहियो भी सहरमे प्रवेश नैकरे सक्तै।