१ तिमोथी 1:19 - केवट नया कारार

¹⁹ तुहें निरन्तर ख्रीष्टमे विश्वास कर आर साफ विवेक राख। कुछु आदमीसब साफ विवेकके इन्कार कैल्कै छे। नतिजा स्वरुप ऊसब आब ख्रीष्टमे विश्वास नैकरैछै।

१ तिमोथी 1:19 Iomraidhean Croise

मत्ती 6:27

कि तोरसिके सभे चिन्ता-फिकिर तोरसिके जीवनमे एक पल भी जोडे सकैछै?

१ कोरन्थी 11:19

मगर तोरसिके बीचमे विभाजन होना भी जरुरी छै, ताकी तोरसिमेसे जकर लगत परमेश्वरके समर्थन छै, ओकरा पहचान्ल चल जैतै।

गलाती 5:4

तुहें जेसब विधि-विधानके पालन करिके धर्मी घोषित हुऐले चाहैछैं, तुहेंसब अपने आपके ख्रीष्टसे अलग करैछैं आर तुहेंसब अपने आपके उटा अनुग्रहसे अलग करि लेल्हैं छे जकरासे परमेश्वर तोरासिके बचाबे सकैछौ।

१ तिमोथी 1:5

यी आदेश दियैके मकसद यी छै कि तुहेंसब एक दोसरके साफ मन, बढियाँ विवेक आर सच्चा विश्वाससे प्रेम करे सक्हैं।

१ तिमोथी 3:9

ऊसब परमेश्वरमे स्पष्ट विवेकसे प्रकट कैल सच्चा सन्देशमे निरन्तर विश्वास करेवाला होना चाही।

१ तिमोथी 6:12

जेरंके एकटा बढियाँ सिपाही युद्धमे लडाई करैके समयमे कहियो हार नैमानैछै, तुहेंसब भी परमेश्वरमे भरोसा राखैले आर ओकर आज्ञापालन करैले कहियो भी नैछोडना चाही। कहियो खतम नैहुएवाला जीवनके पक्डीके राख्, जकर खातिर तोरा बुलाहट भेल रहौ, आर बहुते आदमीसिके समनामे तुहें ख्रीष्टमे भरोसा राखैछैं कहिके साफ कहलहैं रहे।

१ तिमोथी 6:21

कुछु आदमीसब यी बेकारके बातसिके स्वीकार कैल्कै छे, आर एरंको करिके ऊसब ख्रीष्टके विषयमे सच्चा शिक्षाके विश्वास नैकरैछै। हमे प्रार्थना करैछियै कि परमेश्वरके अनुग्रह तोरसिके सभैके संगे रहते रहौ।

१ तिमोथी 6:9

मगर मातबर हुऐके इच्छा करेवाला आदमीसब सभे किसिमके पाप करैके लिए आसानीसे धोखा खैछै, आर जानवरके जुगुर फाँसमे फसैछै। ऊसब ऊ चीजसब करैले चाहैछै जे ओकरसिके लिए मूर्खतापूर्ण आर खतरनाक छै आर यी इच्छा ओकरासिके बर्बादीके तरफ ल्याजैतै आर नाश करि देतै।

२ तिमोथी 2:18

यी दीटा आदमीसब सच्चाईमे विश्वास करैले बन्द कैल्कै छे। ऊसब कहैछै कि परमेश्वर पहलहैसे ही मर्ल विश्वासीसिके कहियो खतम नैहुएवाला जीवनके लिए उठ्या लेल्कै छे। नतिजा स्वरुप, ऊसब कुछु विश्वासीसिके ख्रीष्टके शिक्षासिमे विश्वास करैके लिए रोकैछै।

२ तिमोथी 4:4

ऊसब सच्चा बातसब नैसुन्तै मगर झुट्ठा आर बनौटी खिसासब सुन्तै।

तीतस 1:9

ओकरा येशू ख्रीष्टके विषयमे विश्वासयोग्य सन्देशपर मजगुतीसे विश्वास करना चाही जे हमेसब ओकरा सिखैलियै छे। ताकी ऊ दोसर आदमीसिके सही शिक्षाके अनुसरण करैके लिए उत्साह दिए सकै आर संगहै संग सही शिक्षाके विरुद्धमे बहस करेवाला आदमीसिके यकीन दिलाबे सकै कि ऊसब गलत छै।

हिब्रू 3:14

कहिनेकी यदि अपनासब अन्ततक दृढताके साथ आपन शुरुआतके विश्वासके थामिके राखैछियै ते, अपनासब ख्रीष्टके संगे सहभागी भ्या जैछियै।

१ यूहन्ना 2:19

ख्रीष्ट विरोधीसब आपनसिके संगे रहै मगर एखन ऊसब आपनसिके संगति छोडिके चल गेलै छे। यदि ऊसब आपनसिके जुगुर सच्चा विश्वासीसब हैतियै ते, ऊसब आपनसिके साथमे ही रहतियै। ऊसब चल गेलै, जकरासे यी स्पष्ट हैछै कि ओकरासिमेसे कोय भी आपनसिके जुगुर सच्चा विश्वासी नैरहै।

प्रकाश 3:10

तुहें हमर सन्देशके पालन कैल्हैं ताकी जब तुहें दुःख उठाभैं ते ओकरा धीरजके साथ सहे सक्हैं। इहे कारण, हमे तोरा बडका परीक्षाके समयमे तोर रक्षा कर्बौ। परीक्षाके यी समय संसारके सभे आदमीसिपर ऐतै।

प्रकाश 3:3

उटा शिक्षाके याद कर जे तुहें बहुते पहेला सुन्लहैं रहे आर विश्वास कैल्हैं रहे। जे तोरा सिखैल गेलौ रहे ओकर अनुसरण कर, पाप करैले छोड आर परमेश्वरके तरफ मन लगा। यदि तुहें गलत काम कर्ते रहैछैं ते हमे अचानक ऐबौ, जेरंके रातके समयमे चोर आबैछै आर तुहें उटा समयके भी नैजाने सक्भैं जब हमे तोरा सजाय दियैके लिए आबी जैबौ।

प्रकाश 3:8

हमे जानैछियै कि तुहें कि करैछैं। हमे जानैछियै कि तुहें बहुते मजगुत नैछैं। मगर जे हमे तोरा कहैलियौ ओकर तुहें पालन कैल्हैं छे। तुहें हमरापर निरन्तर विश्वास करैछैं। सेल्याके, हमे तोर लिए एकटा केबाड खोल्लियौ छे, जकरा कोय भी बन्द नैकरे सकैछै।