१ थेसलोनिकी 2:13 - केवट नया कारार

¹³ सेल्याके हमेसब भी परमेश्वरके धन्यवाद निरन्तर करैछियै, कि जब तुहेंसब परमेश्वरके खुश-खबरीके सन्देश सुन्लहैं, जे हमेसब तोरासिके प्रचार कैलियौ ते, तुहेंसब ओकरा आदमीसिके नै, मगर परमेश्वरके वचन सम्झलहैं आर यी सन्देश परमेश्वरके तरफसे छै कहिके स्वीकार कैल्हैं। आर यी सन्देश जे परमेश्वरके तरफसे छै आब तोरासिमे काम करैछौ, जेसब ख्रीष्टमे विश्वास करैछैं।

१ थेसलोनिकी 2:13 Iomraidhean Croise

मत्ती 10:20

कहिनेकी तुहें आपन विचार नैबोल्भैं, मगर परमेश्वरके आत्मा तोरसिकेद्वारा बात कर्तौ।”

मत्ती 10:40

“तोरासिके स्वागत करेवाला हमरा स्वागत करैछै, आर हमरा स्वागत करेवाला हमरा पठाबेवालाके स्वागत करैछै।

लूका 11:28

मगर येशू कहैल्कै, “धन्य छै ऊसब, जे परमेश्वरके वचन सुनैछै आर पालन करैछै।”

लूका 5:1

आदमीसब परमेश्वरके वचन सुनैले ओकर चारो बगल ठेलमठेल कर्ते रहै आर ऊ गनेसरेत समुन्दर (अर्थात गालील समुन्दर) के बगलमे खडा रहै।

लूका 8:11

यी खिसाके मतलब छै, बिहन परमेश्वरके वचन छै।

लूका 8:21

येशू ओकरासिके जबाब देल्कै, “जेसब परमेश्वरके वचन सुनैछै आर पालन करैछै, उहे हमर मयाँ आर हमर छोटका भ्यासब छै।”

यूहन्ना 15:3

हमर कहेल शिक्षासे तुहेंसब पहलहै शुद्ध भ्या गेल्हैं छे।

यूहन्ना 17:17

तोर वचन सच छै। ओकरासिके सच्चाईमे आपन लिए अलग कर।

यूहन्ना 17:19

ओकरसिके लाभके खातिर हमे खुदके पवित्र बनाबैछियै, ताकी उहोसब सच्चाई द्वारा पवित्र बने सकै।”

चुन्ल आर भेज्ल चेलासब 10:33

तब हमे तुरन्ते तोरलगत आदमी भेज्लियै आर यी तोर कृपा भेलै कि तुहें हमरलगत ऐलह। आब हमेसब सभेको परमेश्वरके समनामे एत्ते उपस्थित भेल छियै ताकी प्रभु जे कुछु कहैके आदेश तोरा देल्कहौं छे ऊ सभे बात सुनैले हमेसब तैय्यार छियै।”

चुन्ल आर भेज्ल चेलासब 13:48

यी बात सुनिके गैर-यहूदी आदमीसब आनन्दित भेलै, आर परमेश्वरके वचनके प्रशंसा करे लाग्लै आर जतनें आदमी कहियो खतम नैहुएवाला जीवनके लिए परमेश्वरसे चुन्ल रहै ऊसब येशू ख्रीष्टमे विश्वास कैल्कै।

चुन्ल आर भेज्ल चेलासब 16:14

हमरसिके बात सुनेवालासिमेसे लिडिया नामके एकटा जनानी रहै। ऊ थिआटिरा सहरके निवासी रहै आर बैगनी रंगके कपडाके व्यापार कर्ते रहै। ऊ परमेश्वरके भक्ति करेवाला एकटा भक्त जनानी रहै। पावलके कहेल बात ध्यानसे सुनै कहिके प्रभु ओकर मन खोली देल्कै।

चुन्ल आर भेज्ल चेलासब 17:11

यी यहूदी आदमीसब थेसलोनिके सहरके यहूदी आदमीसिसे बेसी भला रहै। कहिनेकी ऊसब बहुते उत्सुकताके साथ वचन स्वीकार कैल्कै आर यी बातसब ठीके एरं छै कि नैछै कहिके सभे दिन धरमशास्त्रमे पढिके खोजै।

चुन्ल आर भेज्ल चेलासब 17:32

मुर्दासे जिन्दा हुऐके बात सुनिके कुछु आदमीसब उटा बातके मजाक उडाबे लाग्लै, आर कुछु आदमीसब पावलके कहैल्कै, “यी बात हमेसब तोरासे फेर कहियो सुन्बौ।”

चुन्ल आर भेज्ल चेलासब 2:41

तब जेसब पत्रुसके कहेल बातके विश्वास कैल्कै ऊसब बप्तिस्मा लेल्कै आर उहे दिन करीब तीन हजार आदमीसब विश्वासीसिके समूहमे जुटी गेलै।

चुन्ल आर भेज्ल चेलासब 8:14

सामरिया प्रदेशके आदमीसब परमेश्वरके वचन स्वीकार कैल्कै कहिके सुन्लके बाद यरूशलेम सहरमे रहेल चुन्ल आर भेज्ल चेलासब पत्रुस आर यूहन्नाके फिलिपसिके लगत भेजल्कै।

रोमी 10:17

सेल्याके विश्वास तब आबैछै जब तुहेंसब सन्देश सुनैछैं, आर उटा सन्देश येशू ख्रीष्टके बारेमे सन्देश छै।

२ कोरन्थी 3:18

मगर अपनासब एकटा ऐनाके जुगुर परमेश्वरके महिमाके एरं चेहरासे देखाबैछियै जकरा कपडा ल्याके झाँप्ल नैछै। परमेश्वर अपनासिके लगातार बढते रहेवाला महिमामे बेसीसे बेसी आपन जुगुर बनाबैछै। यी प्रभुके काम छै, जे पवित्र आत्मा छै।

गलाती 4:14

जब कि हमर बेमारी तोरसिके लिए एकटा परेशानी रहौ, मगर फेर भी तुहेंसब हमरासे घृणा नैकैल्हैं आर हमरा दूर भी नैकैल्हैं। मगर तुहेंसब हमरा उहे तरिकासे स्वीकार कैल्हैं जेरंके तुहेंसब परमेश्वरके एकटा स्वर्गदूतके या खुद येशू ख्रीष्टके स्वीकार कर्तिहैं।

कलस्सी 1:6

इहे खुश-खबरी जे तोरसिकेलगत ऐलौ पुरा संसारभर फैलैछै। आदमीसिके जीवन परिवर्तन करिके हरेक जगहमे फल फराबैछै, जेरंके तुहेंसब पहेला बेर सुन्ल आर परमेश्वरके अदभुद अनुग्रहके बारेमे सचके बुझैके समयसे तोरसिके जीवनमे परिवर्तन ऐल छौ।

हिब्रू 4:12

कहिनेकी परमेश्वरके वचन काम कर्ते रहेवाला आर जिन्दा छै। यी दोनो बगल धारवाला तलवारसे भी बेसी धर्हा छै। यी भितरमे जैके प्राण आर आत्माके अलग करि दैछै। जोडनी आर हड्डीके भितरके गुद्दीके अलग करि दैछै। परमेश्वरके वचन आदमीसिके हृदयके विचार आर इच्छाके जाँच करैछै।

हिब्रू 4:2

जेरंके अपनासब येशू ख्रीष्टके विषयमे खुश-खबरी सुन्लियै, ओहिने करिके इस्राएलीसब भी विश्रामके जगहमे प्रवेश करैके खुश-खबरी सुनल्कै। मगर ऊसब एकरापर विश्वास नैकैल्कै। सेल्याके उटा सन्देश ओकरसिके लिए बेकार रहै।

याकूब 1:18

परमेश्वर आपने इच्छासे सच्चाईके वचनके द्वारा अपनासिके नया जीवन दियैके निर्णय कैल्कै छे, ताकी जेरंके फसलके पहेला अनाज सभैसे महत्वपूर्ण अंश हैछै ओहिने करिके अपनासब भी ओकर बनैल सभे चीजके महत्वपूर्ण भाग हुए सकियै।

१ पत्रुस 1:23

कहिनेकी तुहेंसब परमेश्वरसे नया जीवन पैल्हैं छे। तुहेंसब यी जीवन नाश हुएवाला चीजसे नैपैल्हैं छे मगर सभे दिन रहेवाला चीजसे पैल्हैं छे। अपनासब यी नया जीवन जिन्दा आर कहियो खतम नैहुएवाला परमेश्वरके वचनसे पैल्हैं छे।

१ पत्रुस 1:25

मगर परमेश्वरके वचन सभे दिन रहतै।” यी वचन ख्रीष्टके विषयमे खुश-खबरी छै जे तोरसिके बीचमे प्रचार कैल गेलै रहे।

१ पत्रुस 2:2

जेरंके नवजात शिशु आपन मयाँके शुद्ध दुधके ललसा करैछै, ओहिने करिके तोरा परमेश्वरके वचन सिखैके इच्छा राखना चाही ताकी तुहेंसब आत्मिक रुपसे परिपक्क बने सक्हैं। तब अन्तमे, परमेश्वर तोरा यी संसारके खराब चीजसिसे पूर्ण रुपसे बच्या लेतौ।

२ पत्रुस 3:2

हमे एरं इहे ल्याके करैछियौ कहिनेकी हमे चाहैछियै कि तुहेंसब उटा वचनसिके याद राख, जे परमेश्वरके वक्तासब बहुते पहेला कहैल्कै रहे आर आपनसिके उद्धारकर्ता, प्रभु येशू ख्रीष्टके शिक्षासिके याद राख जे तोरासिके चुन्ल आर भेज्ल चेलासब देल्कौ जे तोरसिकेलगत ऐलौ रहे।

१ यूहन्ना 3:3

हरेक आदमी जे यी आशा करैछै कि ऊ ख्रीष्टके जुगुर हैतै, ऊसब खुदके हरेक पापसे दूर राखे पडैछै।