१ यूहन्ना 4:1 - केवट नया कारार

¹ हे प्रिय दोस्तसब, पवित्र आत्माद्वारा बोलैछियै कहिके दाबी करेवाला सभैके विश्वास नैकर, मगर आत्मासब परमेश्वरसे ऐल छै कि नैछै कहिके ओकर जाँच कर। कहिनेकी बहुते झुट्ठा परमेश्वरके वक्तासब यी संसारमे छै।

१ यूहन्ना 4:1 Iomraidhean Croise

मर्कूस 13:21

उटा समयमे कोय तोरासिके, ‘देख, ख्रीष्ट एत्ते छै या ओत्ते छै’ कहिके कहतौ ते विश्वास नैकरिहैं।

लूका 12:57

तोरासिके खुद ही तय करना चाही कि तोरसिके लिए कि करना उचित छै।

लूका 21:8

येशू कहैल्कै, “होशियार र, कोय तोरासिके मूर्ख नैबनाबौ। बहुते आदमीसब हमर अधिकार प्रयोग करैले हमर नाम ल्याके ऐतौ। ऊसब कहतौ, ‘हमे ख्रीष्ट छियै’ आर समय नज्दिक ऐल छै, कहिके कहतौ। ओकरसिके कहेल बातके पाछु तुहेंसब नैलाग।

चुन्ल आर भेज्ल चेलासब 17:11

यी यहूदी आदमीसब थेसलोनिके सहरके यहूदी आदमीसिसे बेसी भला रहै। कहिनेकी ऊसब बहुते उत्सुकताके साथ वचन स्वीकार कैल्कै आर यी बातसब ठीके एरं छै कि नैछै कहिके सभे दिन धरमशास्त्रमे पढिके खोजै।

चुन्ल आर भेज्ल चेलासब 20:29

हमे जानैछियै कि हमर गेलके बाद झुट्ठा शिक्षकसब तोरसिके बीचमे ऐतौ आर विश्वासीसिके बडका हानी कर्तौ। ऊसब डरलग्गा खटिहा जुगुर हैतौ जे भेंडाके जान मार्तौ।

१ कोरन्थी 12:10

पवित्र आत्मा एकटा आदमीके चमत्कार करैके लिए शक्ति दैछै, दोसर आदमीके परमेश्वरके सन्देश बोलैके वरदान, आर कक्रहौ ऊ यी क्षमता दैछै उटा वरदानसिके बीचमे फरक बताबैके लिए जे पवित्र आत्माके तरफसे छै आर जे पवित्र आत्माके तरफसे नैछै। एकटा आदमीके ऊ अलग-अलग किसिमके अनजान भाषामे बात करैके क्षमता दैछै, जकर बारेमे ऊसब कहियो अध्ययन भी नैकैल्कै छे, आर दोसर आदमीसिके ऊ क्षमता दैछै यी अनजान भाषाके मतलब बताबैके लिए जकर बारेमे ऊ आदमीसब कहियो अध्ययन नैकैल्कै छे।

१ कोरन्थी 14:29

परमेश्वरके वक्तामेसे दी या तीन आदमी खाली बोलक, आर यी जरुरी छै कि बाँकी सभे आदमी सुनै, बुझै आर जाँच करै कि ऊ आदमी जे बात बोल्लै छे सही छै कि नैछै।

१ थेसलोनिकी 5:20

आदमीसिके परमेश्वरके द्वारा प्रकट कैल भविष्यवाणीके तिरस्कार नैकरिहैं।

१ थेसलोनिकी 5:21

सभे बातके जाँच कर कि उटा बात परमेश्वरसे ऐलै छे कि नैऐलै छे। बढियाँ बातसिके स्वीकार आर ओकरा पालन कर।

२ थेसलोनिकी 2:2

यदि तुहेंसब प्रभु येशूके वापस आबैके दिन आबी गेलै छे कहिके सुन्भैं ते आपन मनमे आसानीसे निराश नैहइहैं या नैडरइहैं। यी हमे लिख्लियै छे कहिके कोय यी बात आत्मिक दर्शनमे या प्रकाशमे या कोनो चिट्ठीमे तोरासिके कहे सकैछौ।

१ तिमोथी 4:1

पवित्र आत्मा साफसे कहैछै, कि अन्तके समयमे कुछु आदमीसब ख्रीष्टके शिक्षासिके विश्वास करैले छोड्तै। ओकरासिके बहकाबेवाला भूतप्रेतके शिक्षाके ऊसब स्वीकार कर्तै, आर ओकरसिके झुट्ठा शिक्षाके विश्वास कर्तै।

२ तिमोथी 3:13

मगर दुष्ट आर धोखेबाज आदमीसब आरहौ बेसी दुष्ट कामसब कर्तै। ऊसब आदमीसिके धोखा देतै आर ऊसब खुद भी दोसर आदमीसिसे धोखा पैतै।

२ पत्रुस 2:1

जेरंके बहुते पहेला गलत शिक्षासब सिखाबेवाला आदमीसब इस्राएलीसिके बीचमे दिखाई देल्कै रहे, ओहिने करिके ही तोरसिके बीचमे झुट्ठा शिक्षकसब दिखाई देतौ। ऊसब झुट्ठा शिक्षासिके गुप्त रुपसे फैल्या देतौ, जे बात आदमीसिके ख्रीष्टमे विश्वास करैसे रोकी देतै। यी झुट्ठा शिक्षकसब ख्रीष्टके आपन मालिक मानैसे भी इन्कार करि देतै आर जे ओकरासिके पापके शक्तिसे छुटकारा देल्कै छे। एरंके ऊसब अपने आपके अचानक नाश करैतै।

१ यूहन्ना 2:18

तुहेंसब जे हमर प्यारा बच्चासिके जुगुर छैं, यी संसारके अन्तिम दिनसब छै, आर ख्रीष्ट विरोधीसब आबैछै कहिके तुहेंसब सुन्लहैं छे। ओकर मुताबिक आब बहुते ख्रीष्ट विरोधीसब ऐल छै। एकरासे हमेसब जानैछियै कि यी अन्तिम समय छै।

१ यूहन्ना 2:7

हे प्यारा विश्वासी भ्या-बहिनसब, यी एरंको बात नैछै जे तुहेंसब पहेला कहियो नैसुन्लहैं छे, मगर यी एरंको बात छै जे तोरासिके शुरुसे ही मालुम छौ आर अनुसरण भी कैल्हैं छे। यी पुरना आज्ञा उटा वचन छै, जे तुहेंसब ख्रीष्टमे विश्वास करैके समयमे सुन्लहैं रहे।

२ यूहन्ना 1:7

हमे यी कहैछियौ कहिनेकी बहुते आदमीसब जे दोसर आदमीसिके झुट्ठा शिक्षाद्वारा धोखा दैछै ऊसब सभे जगहमे गेलै छे। ऊसब कहैछै कि येशू ख्रीष्ट यी संसारमे आदमीके रुपमे नैऐलै छे। यदि कोनो आदमी एरं कहैछै ते ऊ आदमी ख्रीष्ट विरोधी छै, जे सभे दिन आदमीसिके धोखा दैछै।

३ यूहन्ना 1:11

हे प्रिय दोस्त, खराब काम करेवाला आदमीके देख-सिख्खा नैकर, मगर भलाइके काम करेवाला आदमीके अनुसरण कर। जे कोय बढियाँ काम करैछै, यी बात यी देखाबैछै कि ऊ परमेश्वरके बेटा-बेटी छै। जे कोय खराब काम करैछै, यी बात देखाबैछै कि ऊ परमेश्वरके नैचिन्हैछै।

प्रकाश 2:2

हमे जानैछियै कि तुहें कि करैछैं। तुहें पुरा मेहनतसे हमर काम करैछैं, हमरापर विश्वास करैके कारण जब तोरा सतैल जैछौ तैय्योपर भी तुहें सहैछैं। हमे जानैछियै कि तुहें दुष्ट आदमीसिके स्वीकार नैकरैछैं। तुहें एरंको आदमीसिके जाँच कैल्हैं छे, जे झुट्ठा दावा करैछै कि ऊसब चुन्ल आर भेज्ल चेला छै आर तुहें बुझी गेल्हैं छे कि ऊसब झुट्ठा छै।