Abhagaraatiya 4:4 - Iimuuma Iinyaaya

⁴ Nawe akabhaga akeene ꞉keejire kaayika, Nyamuwanga ˆnaatuma Omwana waaye mu-kyaro. Omwana uyo ˆneebhurwa na omugasi, woone ˆnaabha mugwati wa ebhiraagiro bhya Musa.

Abhagaraatiya 4:4 Iomraidhean Croise

Mataayo 1:23

“Ringira, omuyarajuma arigega inda, ariibhura omwana mumura. Riisiina ryaye bharimutoga Manweri.” Insonga ya riisiina riyo ni inu ati, “Nyamuwanga ari amwi na eswe.”

Mataayo 3:15

Yeesu ˆnaamusubhya ati, “Awe iikirisha era woori umbatiishe, kwa okubha nikwo kutyo ekyendwa kikore kutyo Nyamuwanga keenda.” Mmbe, Yowana ˆneekirisha, ˆnaamubhatiisha.

Mataayo 5:17

“Mwasiga kutoga ati niijire okusoosha-wo ebhiraagiro bhya Musa, amwi ati ameeyigisho ga abharagi. Wuri, niteejire kugasoosha-wo, tari nikuumishe ganu ebhiraagiro na abharagi ꞉bhaaragiriraga.

Maariko 1:15

꞉Aaraashaga ˆnaaika ati, “Akabhaga kanu ꞉kaaragirwe, kaayikire. Na obhukama bhwa Nyamuwanga bhuri ayeeyi. Mmbe munuge ebhikayo bhyemwe, mwikirishe Amangʼana Amajomu gayo.”

Ruuka 1:31

Iitegeeresha! Woori owuuja okugega inda, wiibhure omwana omumura, riisiina ryaye urimutoga Yeesu.

Ruuka 1:35

Maraayika ˆnaamusubhya ati, “Mwoyo Omutaakatiifu arikwikira, na obhuturo bhwa Nyamuwanga Unu ari iiguru wa bhyone kutyo bhuribha iiguru waawo rwa riirengeesi. Mmbe, omwana uyo uriibhura, aribha mwana omusorwa ku-Nyamuwanga, na aribhirikirwaga ati, Omwana wa Nyamuwanga.

Ruuka 2:7

ˆneebhura omwana mumura owa obhubhere, ˆnaamufundikira mu-ngibho, ˆnaamumaamya mw-iriisisho rya giingʼombe, kwa okubha ꞉bhataanyoorere owa okumaama mu-nyumba gya abhagenyi.

Ruuka 20:44

“Raabhe Dawudi kaabhirikira Kiriisitu ati, ‘Raatabhugenyi.’ Kiriisitu kaatura kutiki kweki okubha muyiiri Dawudi?”

Yowana 1:14

Mmbe, Riingʼana uyo ˆnaabha muunu, ˆneekara kw-iswe. Na eswe kyone nkirora obhugungyo bhwaye, obhugungyo bhwa Omwana omumwemwe, unu kaasooka ku-Raata Nyamuwanga. Eejuuye giinema na ekimari.

Yowana 10:36

Raata niwe ꞉aansorere, ˆnaantuma mu-kyaro anu. Woori kubhaki omwaika ati, enijabhura Nyamuwanga nikaaika ati, ‘Anye niri Mwana wa Nyamuwanga’?

Yowana 3:16

Nyamuwanga ꞉eendere muno abhaanu bhoone kutyo abha mu-kyaro. Obhwendi bhuyo mbukora ˆnaatuma omwana waaye omumwemwe, insonga omuunu woonewoone unu kaamwikirisha asige okubhura, tari abhe na obhurame bhunu bhutakuweera.

Yowana 6:38

Anye niteejire okusooka mu-rwire insonga nikore ganu eneenda anye, tari niijire insonga nikore ganu unu antumire keenda.

Yowana 8:42

Yeesu ˆnaabhasubhya ati, “Raabhe Nyamuwanga akabheeye Esomwana, mukaanyendere, kwa okubha nisookere ku-Nyamuwanga, nniija enu. ꞉Niteereetere anye omwene era, tari Nyamuwanga omwene niwe ꞉aantumire.

Ebhikorwa bhya Abhatumwa 1:7

Yeesu ˆnaabhabhwira ati, “Gitari mirimu gyemwe okumenya amabhaga ga amangʼana gayo, kwa okubha ni Raata omwene era ku-bhuturo bhwaye niwe kaaramura ati garibha-wo rusukuki.

Abharuumi 1:3

Amangʼana Amajomu gayo, agaaikira Omwana waaye. Omwana waaye uyo ku-bhwibhurwa, ni wa mu-ruganda rwa omukama Dawudi,

Abharuumi 15:8

Muyiite ati, Kiriisitu ꞉eejire okusakira Abhayawudi, insonga eereshe ati, Nyamuwanga ni mwitongeeye. Okuturira ku-mwene, Nyamuwanga akuumisiishe goone kutyo ganu ꞉aaragire bhaajaaji.

Abharuumi 5:6

Mmbe, bhunu eswe ꞉kyariga kitari na managa, bhunu akabhaga kanu ꞉kaariga kaatuuywe-wo ꞉kaakuumiiye, Kiriisitu ꞉eejire ˆnaafwa ku-nsonga yeeswe abhakosi bha amabhiibhi.

Abharuumi 8:3

Ebhiraagiro bhya Musa ꞉bhyariga bhitari na amanaga ga okukikora kiiyagaare, kwa okubha obhusimukwa bhweswe obhwa ebhikayo ꞉bhwariga bhuri na amanaga. Nawe kinu ebhiraagiro bhiyo ꞉bhitaaturire okukora, Nyamuwanga ꞉aakorere. ꞉Aatumire Omwana waaye omwene, aaje kw-iswe mu-kyaro ari muunu rwa eswe abha ebhikayo, insonga abhe ekimweso ku-nsonga ya ebhikayo bhyeswe. Ku-riyo, Nyamuwanga ꞉aamarire-wo amanaga ga ebhikayo mu-bhurame bhweswe.

Abharuumi 9:5

Abhaijirayeeri bhayo nibho abheebhurwa bha bhaajaaji Bhurayimu, Isaaka na Yakobho. Na okuturira ku-bhayo, Kiriisitu ꞉eebhuuywe mu-kyaro anu. Kiriisitu, uyo niwe ari iiguru ku-mangʼana goone kutyo, na niwe Nyamuwanga, akumangibhwe kajaanende! Amina.

Abhaefeso 1:10

Imbisike eyeene ni inu ati, akabhaga akeene kariyika-wo, arituura ebhiinu bhya ku-kyaro na ebhya mu-rwire bhyone kutyo amwi, bhibhe ku-bhutungi bhwa Kiriisitu.

Abhakorosaayi 2:14

Okuturira ku-Yeesu okukifwira ku-musarabha, ꞉aariyire riisiiri rya ebhikayo bhyeswe rinu ꞉ryakisitaakyaga, ˆnaarisoosha-wo kimwi ˆnaaribhumiirira ku-musarabha.

1 Timoteeyo 2:6

Uyo niwe ꞉aasoosiishe obhurame bhwaye omwene, okubha ingomboro ku-nsonga ya abhaanu bhoone kutyo. Na abhaanu mbabhwirwa Amangʼana Amajomu ati, Nyamuwanga keenda abhaanu bhoone kutyo bheerusibhwe, mu-kabhaga kanu Nyamuwanga ꞉aaramuuye.

1 Timoteeyo 3:16

Kitariwo kiitimaato kyonekyone ku-bhunene bhwa imbisike ya obhwikirisha bhweswe kwa okubha, Kiriisitu ꞉aatuuywe ku-bhweru ari muunu, Mwoyo Omutaakatiifu ˆnaamwaika ati ni murengeresi, bhaamaraayika mbamurora, abhaanu mbamuraasha mu-bhyaro bhyone kutyo, abhaanu bhoone kutyo abha mu-kyaro mbamwikirisha, ˆnaagegwa ˆnaasirwa iiguru ku-bhugungyo.

Abhaebhuraaniya 2:14

Mmbe, kwa okubha abhaana bhanu bhari na emibhiri na amaanyinga, Yeesu woone ꞉eejire ari na omubhiri na amaanyinga rwa abheene. ꞉Aakorere kutyo, insonga okuturira okufwa kwaye, ayige amanaga ga Sitaani. Sitaani ari na obhuturo bhwa okukora abhaanu bhafwe.

Abhaebhuraaniya 9:10

Amangʼana gayo agaaikira ebhyokurya, ebhinywebhwa, na okwiyesha emibhiri, gayo ni ga ku-mubhiri era. Na gayo goone kutyo gariwa bhunu Nyamuwanga ariyindura ebhiinu okubha bhiyaaya.

1 Yowana 4:14

Eswe kyarorere na ekibhwira abhandi ati Raata Nyamuwanga ꞉aatumire Omwana waaye mu-kyaro, insonga abhe omwerusi wa abhaanu bhoone kutyo.

1 Yowana 4:2

Injira ya okumenyegesha ati omuunu kaatangasibhwa na Mwoyo Omutaakatiifu wa Nyamuwanga ni inu. Omuunu woonewoone unu keekirisha ati Yeesu Kiriisitu ꞉eejire mu-kyaro ˆnaabha na omubhiri rwa omuunu, uyo niwe kaatangasibhwa na Mwoyo Omutaakatiifu wa Nyamuwanga.