Hebrǔ 7:26 - Kawyaw New Testament

²⁶ Pô̤̌nudě, Yeshǔ mî̌ pwa̤shû̌gǎ ikǒdû̌lǒ tôpwa̤ dǒ a ma̤lǒbe bǎbò lǒ̤꤮ bò pa ta̤lṳ̂bǎ tokhlǒ. A mî̌ aplò̌shǐ, ata̤sǔ ô̌tô̤̌, asǎphlǒ mṳ̂̌plî. Cǒmara bè̌yò tephekè khô̌ lû̌û kû̌ pwa̤ma̤sǔphû̌ tokhlǒ, dě a dǐô̌ lû̌û dǒ gûlǎ̤ htò̌yô̤̌lǒkhlo tôkû hǒ.

Kawyaw RC

²⁶ Hǐnudě, Ye̤shǔ mî̌ pwa̤lṳhtò̌ta̤ hǐkǒdû̌gutṳ̌ tapwa̤ htě a ma̤lǒbebò bǎ pa ta̤lo̤bǎ toǒ. A mî̌ acahtǐ, ata̤sǔ ǒtò̤, asò̌phlǒ mṳ̂plî. Cǒmara bè̌ǒkhǒtephe nû̌ûta ta̤ma̤sǔphû̌ toǒ, dě a ǐǒ nû̌û gûla̤ htò̌yî̤gutṳ̌ tò̤glò hǒ.

Hebrǔ 7:26 Iomraidhean Croise

Htû̌sò̌htò̌ 68:18

Bǎ na gehtò̌ dǒ gûlǎ̤htò̌yô̤̌ akhanu, na pṳ̂̌cû̌nṳ̌ pwa̤sǎkhě na dǒ alò̤jû̌kè nalǎ̤ nutokhlǒ. Kòyò dǒ a shěshǔ na nutokhlǒ bǎbǎ, na nǐ̤bǎ khû̌kǎ dǒ asîô̌. Běcǎ Cǒmara tûjû̌pwa̤ gǔ ô̌ bǎ gûlǎ̤ nutôkû pěpě.

Matěo 27:18

Ma̤titèhî̌dě a sî̌ganǎ̤ hto kû̌ ta̤caba ikǒlǒkòdû̌ tokhlǒ sû̌khěsò̌khě Yeshǔ dě asî hèǐlò̤kè Yeshǔ dǒ a ô̌ pwǎ.

Mǎ̤riko 16:19

Běcǎ Yeshǔ hî̌bǎhto kû̌ akhôphijǎ tokhlǒ dě Cǒmara kaǎ gehtò̌kè yǎ dǒ mǒkhû̌ dě a htò̌hǎnòò̌ dǒ Cǒmara cǔtômû tôkhô.

Lǔka 1:35

Dě mǒkhû̌ tanaphû̌ hî̌shěshu a kû̌, “Yôla Plò̌shǐ Běcǎ gǔ hèlò̤ tûû̌ dǒ nalô̤ pě dě dǒ ta̤dû̌ta̤htû Cǒmara a ta̤pô̤ta̤phǎ akhû̌akhî, dě phijǎphû̌ tôpwa̤ gǔ hè ô̌lò̤ pě. Dǒ ta̤we̤ta̤kè hǒo akhû̌akhîdě phijǎ plò̌shǐ nutôpwa̤ nî̌ kòyò gǔ kaǎ yǎ kû̌ Cǒmara aphû̌khû pě.

Lǔka 23:22

Dě Khwǐ Pǐlǎ hî̌pô̤̌ asî suplǎtaplǎ kû̌, “Ma̤titè̤̌dě bǎ ma̤sihtò̌kè yǎ? A ma̤sǔ mî̌titè̤? A ma̤sǔta̤ dǒ a tôbǎ si nu, he kè̌shǐ tocǒ꤮ tô̤̌. He glè̌ noma̤ kòyò kû̌ a dě he glè̌ plûgekè a pě.”

Lǔka 23:41

Pa hǒsò̌ginǐ̤ khòbǎ ta̤cî̌htò̌ pô̤̌ ma̤sǔhto nutokhlǒ akhû̌akhî, atôabǎ pwǎ. Bǎbǎkǎlè a nu, a ma̤sǔ ta̤ tocǒ꤮ tô̤̌.”

Lǔka 23:47

Rûme klitôya̤ ikǒdû̌ tôpwa̤ kè̌shǐ ta̤ma̤ anǎ̤ dě a htû̌sò̌htò̌ Cǒmara dě a hî̌ kû̌, “Kòyò hǒtôpwa̤ mî̌ kòyòcǒkòyòtè̤ mè̤̌mî̌ca hǒ.”

Lǔka 24:26

Khrǐ tôbǎ khò ta̤jî̌ta̤jû̌ htodě a glè̌ cû̌nṳ̌ dǒ a ta̤bwǐdû̌sîrîhtû akû pě mè̤̌tô̤̌ ya?”

Lǔka 24:46

Dě a hî̌ asî kû̌, “Lî̤plò̌shǐ hî̌nǎ, Khrǐ glè̌ khòbǎ ta̤jî̌ta̤jû̌ pě htodě suni̤tôni̤ pěnu, a glè̌ ihtǒhtûpwa̤ gesô̌ dǒ ta̤si pě.

Jowǎ̤ni̤ 14:30

He gǔ hî̌bǎ yî̤ kû̌ sî numî̌ ashěakhǎ ô̌ dû̌ petô̤̌. Hǎkhû̌tana Setò̤ dǒ a pǒ hǎkhû̌ tôdonu, a glè̌ hèhǒ. A siwi̤sòwò̤nu, a ma̤pè̤̌ nô̌ he tô̤̌.

Jowǎ̤ni̤ 8:29

Htodě kòyò dǒ a nohè he tôpwa̤nu, a ô̌cu kû̌ he. He ma̤tô asǎphlǒ pṳ̂̌꤮ taplǎ akhû̌akhî, a wîkè he tô̤̌.”

Pwa̤nophû̌ 3:14

A mî̌ kòyòplò̌shǐ, kòyòcǒkòyòtè̤ tôpwa̤ bǎbǎkǎlè sî wîkè yǎ. Sî kwi Khwǐpǐlǎ kû̌, ‘khòsǎdô dě plûhǎhtò̌ bǎ pa pwa̤ ma̤si kòyò nutôpwa̤.’

Pwa̤nophû̌ 4:27

Khònò̤̌dě dǒ wî̤̌kûnu a htûhtò̌kè anǎ̤ pô̤̌nu hǒ! Ma̤titèhî̌dě Khwǐherû kû̌ Khwǐpò̌tiyapǐlǎ ô̌plǒhî̌bǎcu kû̌ Yǔdaphû̌ mè̤̌tô̤̌ tokhlǒ kû̌ Yǔdaphû̌ tokhlǒ bǎ wî̤̌kûnu. Dě a gènè̤ ma̤si wô̤̌wô̤̌ lû̌û, Yeshǔ mî̌ na pwa̤ma̤ta̤phû̌ plò̌shǐ dǒ na dǐhtû a kû̌ Khrǐ nu tôpwa̤.

Kôritu ginǐ̤bǎ tôbǎ 5:21

Khrǐnu ata̤sǔ ô̌ tôcǒ꤮ tô̤̌. Bǎbǎkǎlè, pô̤̌khô a gǔ plî̌lîkè bǎ pa ta̤sǔ ashû̌ tokhlǒ ayanu, Cǒmara notṳ̌sikhòsi lû̌û dǒ pa ta̤sǔ aya hǒ. Dǒ Khrǐ ma̤ bǎ pa pô̤̌nu akhû̌akhî, pa gǔ htûhtò̌ kû̌ Khrǐ tôcǒ꤮ nô̤̌ hǒ dě, Cǒmara gǔ bè̌cǒbè̌tè̤ pa dǒ alô̤mô̤̌ pě.

Hebrǔ 1:3

Kòyò gǔ kè̌shǐ tutṳ̌ Cǒmara a ta̤bwǐdû̌sîrîhtû dǒ akû pě. A mî̌ a sô̌sô̌ bòmǔtegle kû̌ Cǒmara. Pô̤̌khô hǎkhû̌ kû̌ mǒkhû̌ kû̌mî̌ ta̤bô̌lò̤ lǒ̤꤮ bò tokhlǒ gǔ ô̌ gutṳ̌ hènè pô̤̌ pěnu, a pṳ̂̌mějè̌ kû̌ ta̤bô̌lò̤ lǒ̤bònu kû̌ ayô̤̌ dǒ apô̤phǎ shû̌sho nutokhlǒ. Bǎ a ma̤phlǔma̤hto ta̤plûkè kòyòhǎkhû̌phû̌ ata̤sǔ sîtokhlǒ akhanu, a gehtò̌ dǒ mǒkhû̌ dě a htò̌hǎnòò̌ bǎ Cǒmara dǒ apô̤aphǎ adû̌htû gutṳ̌ nutôpwa̤ acǔde cǔtômû tôkhô pě.

Hebrǔ 12:2

Asô̌sô̌kû̌ kòyò khlè̌ tokhlǒ kè̌tôtǐ hètô pwǎ ta̤ma̤pè̤̌ bò̌htò̌htǔ nuhǒ, pô̤̌nudě pa kè̌hè tôtǐ pwǎtǒ̤ Yeshǔ nô̤̌ tǎ꤮. Ma̤titèhî̌dě a mî̌ pa ta̤yṳ̌ta̤nǎ̤ a kòshî̌gutṳ̌ tôpwa̤. Htokhôtô̤̌, a mî̌ pwa̤ dǒ a ma̤lǒma̤be bǎ pa ta̤yṳ̌ta̤nǎ̤ tôpwa̤. A khòsi htopědě, a sî̌ganǎ̤ nǎ hto kû̌ a gǔ nǐ̤bǎ ta̤sǎlě̤sǎlò̤ pě akhû̌akhî, a tôbǎ khòsi dǒ nò̌dò̌htǔlô̤ bǎbǎkǎlè a sòwò̤̌ tôcǒ꤮ tô̤̌. Khònò̤̌dě a hǎnòò̌ dǒ Cǒmara a lǎ̤hǎnòò̌ htò̌yô̤̌ dǒ cǔtômû nutôkhô hǒ.

Hebrǔ 2:10

Lǒ̤꤮ bò ta̤nutokhlǒ mî̌ Cǒmara aya lǒ̤꤮ bò pwǎ dě a bô̌lò̤ ǐ bò ta̤ pṳ̂̌꤮ tôcǒ hǒ. Pô̤̌khô Cǒmara gǔ ǐ padô̌ kòyò saprṳ̂ kû̌ a ta̤bwǐdû̌sîrîhtû tokhlǒ ayanudě, a ma̤lǒhtò̌behtò̌ Běcǎ Yeshǔ kû̌ a no khòjî̌khòjû̌ lû̌û nuhǒ. Cǒmara ma̤ ta̤ pô̤̌o numî̌ atô pwǎ. Dě Běcǎ Yeshǔ htû bǎ pa pwa̤sû klè̌ dǒ a ma̤hǎplǎge pa tôpwa̤ pě.

Hebrǔ 2:17

Pô̤̌nu akhû̌akhî, pô̤̌khô Běcǎ Yeshǔ htûdû̌ pwa̤ dǒ a ma̤ Cǒmara a ta̤phǐta̤ma̤ pô̤̌ pwa̤shû̌gǎ ikǒdû̌lǒ dǒ acǒ kû̌ ayô̤̌ dě a sǎyṳgwèbǎǐjò kòyò tôpwa̤, htokhôtô̤̌ pô̤̌khô a tṳ̌sikhòsibǎ dǒ kòyò tokhlǒ a ta̤ma̤sǔ tokhlǒ plûkè ayanu, a hèlò̤ phî̌ kòyòhǎkhû̌phû̌ alǎ̤klô sô̌sô̌kû̌ apṳ̌awè̤̌ nutokhlǒ hǒ.

Hebrǔ 3:1

Pô̤̌nu akhû̌akhî, pṳ̌wè̤̌ khrǐphû̌ dǒ Cǒmara kaǎ sî nutokhlǒ gènè̤ kè̌mò̌ lô̌khô Yeshǔ dǒ Cǒmara nohè htû yǎ kû̌ pwa̤shôbǐǐ Cǒmara alě̤ayô̤̌ kû̌ pwa̤shû̌gǎ ikǒdû̌lǒ tôpwa̤nu.

Hebrǔ 7:11

Bǎ Cǒmara ǐ Yǔdaphû̌ tokhlǒ ta̤sû̌ta̤tòwò akhanu, a bè̌htò̌ pwa̤shû̌gǎta̤ dǒ akhlialè gelò̤ dǒ Le̤wǐphû̌ nutokhlǒ a ô̌. Asî bǎ lṳhtò̌ bǎ kòyò pô̤̌ ta̤sû̌ta̤tòwò tokhlǒ ô̌nu. Le̤wǐphû̌ pwa̤lṳta̤phû̌ tokhlǒ ma̤ ata̤ma̤ tokhlǒ bǎbǎkǎlè pô̤̌khô kòyò gǔ htûhtò̌ kòyòcǒkòyòtè̤ ayanu, asî ma̤jòtô̤̌. Pô̤̌nudě Cǒmara bǎ no hèkhò tèplè̌ pwa̤shû̌gǎ dǒ ashǔshawa̤ tôpwa̤. Pwa̤shû̌gǎ tôpwa̤nu akhlialè gelò̤ dǒ Le̤wǐphû̌ dǒ akhlialè gelò̤ tutṳ̌ dǒ PhaArû a ô̌nu mè̤̌tô̤̌. Pwa̤shû̌gǎ tôpwa̤nu, asô̌sô̌kû̌ Malakhǐsedè̌ nuhǒ.

Hebrǔ 8:1

Khònò̤̌, ta̤ dǒ a lṳ̂dû̌lǒ tôcǒ dǒ he sǎyṳ nosî̌yaphlô sî numî̌ amè̤̌kû̌ pa pwa̤shû̌gǎ ikǒdû̌lǒ nutôpwa̤ hǒ. A mî̌ Yeshǔ hǒ. Khònò̤̌ a hǎnòò̌ô̌ dǒ mǒkhû̌ dě a hǎnòò̌ô̌ dǒ Cǒmara dǒ alîata̤kakha, apô̤aphǎ nutôpwa̤ lǎ̤nòò̌ acǔde cǔtômû nutôkhô hǒ.

Hebrǔ 9:14

Pô̤̌nudě, gènè̤ kè̌mò̌ lô̌khô Khrǐ asǐnu, a ma̤ mṳ̂̌plî bûsǔlǔkhlo pa kû̌ ta̤nutokhlǒ pě dǒ Yôla Plò̌shǐ Běcǎ ô̌htûpwa̤ tûjû̌pwa̤ akhû̌akhî, Khrǐ lṳhtò̌hto anǎ̤glǒ dǒ ata̤sǔ ô̌ tôcǒ꤮ tô̤̌ dǒ Cǒmara a ô̌ hǒ. Pô̤̌khô pa gǔ ma̤ bǎ Cǒmara dǒ a htûpwa̤ tôpwa̤ ata̤ma̤ ayanu, Khrǐ cǔbò pa sǎphlǒ nutokhlǒ kû̌ pa ta̤ma̤ dǒ abwǐsîrî ô̌kû̌ kòyò tô̤̌ nutokhlǒ kû̌ asǐ pě.

Petru awǐlǒ tabǎ 1:19

Dǒ Khrǐ pwî̤ge sî kû̌ asǐ dǒ alě̤dû̌pwî̤htûnu akhû̌akhî, sî nǐ̤bǎ ta̤pili̤ hǒ. Khrǐ mî̌ asô̌sô̌kû̌ sû̌phû̌ dǒ kòyò kè̌shǐ a ta̤phû̌mò̤̌ ô̌ tôcǒ꤮ tô̤̌ tôdo tôpwa̤ hǒ.

Petru awǐlǒ tabǎ 2:22

“A ma̤ ta̤sǔ tôcǒ꤮ tô̤̌. Kòyò ganǎ̤de kû̌ a hî̌bǎ lòhô tôpwǎ̤꤮ tô̤̌.”

Petru awǐlǒ tabǎ 3:22

Yeshǔ Khrǐ ge ihtǒ dǒ mǒkhû̌ dě a ge hǎnòò̌ô̌ dǒ Cǒmara acǔde cǔtômû tôkhô hǒ. Dě a pǒǐ lǒ̤bò tanaphû̌ tokhlǒ kû̌ ta̤shû̌ta̤sho tokhlǒ, kû̌ ta̤pô̤ta̤phǎ tokhlǒ hǒ.

Yṳ̂ha awǐlǒ tôbǎ 2:2

Pô̤̌khô Cǒmara gǔ plûkè pa ta̤sǔta̤phû̌mò̤̌ nudě Khrǐ tṳ̌sikhòsihto asǎphlǒ hǒ. Bǎbǎkǎlè tǒ̤pwǎ pa ta̤sǔta̤phû̌mò̤̌ tûû̌ ayanu mè̤̌tô̤̌, a plûkè sada bò hǎkhû̌phû̌ tokhlǒ a ta̤sǔta̤phû̌mò̤̌.

Yṳ̂ha awǐlǒ tôbǎ 3:5

Bǎbǎkǎlè pô̤̌khô Khrǐ gǔ phî̌cû̌kè pa ta̤sǔta̤phû̌mò̤̌ tokhlǒ ayanu, a hèlò̤ htohǒ dǒ hǎkhû̌ numî̌ sî sî̌ganǎ̤ htotû̌ hǒ. Htokhôtô̤̌ sî sî̌yahto kû̌ Yeshǔ Khrǐ numî̌ a ta̤sǔta̤phû̌mò̤̌ ô̌kû̌ kòyò tôcǒ tô̤̌.

Ta̤dǔlè̌nǎ 3:7

“Wě̤cû̌ lî̤nu dǒ Philadǐlaphǐ ta̤dòkû a tanaphû̌ a ô̌nu,” a hî̌ he pô̤̌o. Dě a hî̌ kû̌, “Ta̤we̤ta̤kè numî̌ a ô̌ dǒ pwa̤plò̌shǐ pwa̤cǒtè̤ nutôpwa̤ a ô̌ hè. A pṳ̂̌měǐ Khwǐdawi̤ asò̌shî̌. Bǎ a bǔmô takha akhanu, kòyò ma̤bǐjò tôpwǎ̤꤮ tô̤̌. Dě bǎ a ma̤bǐ akhanu, kòyò bǔmôjò tôpwǎ̤꤮ tô̤̌.