Hebrǔ 7:19 - Kawyaw New Testament19 Khûmṳ̂shě a ta̤sû̌ta̤tòwònu a ma̤cǒma̤tè̤ jò kòyò tôpwǎ̤꤮ tô̤̌. Bǎbǎkǎlè khònò̤̌ pa ta̤kè̌shuǐ klè̌ asa tôbô dǒ awô̌khlo pe kû̌ ta̤sû̌ta̤tòwònu a ô̌ hǒ. Dě pa hènṳ̌phǔ dǒ Cǒmara a ô̌ kû̌ klè̌ asa nutôbô mî̌ anǐ̤ hǒ. Faic an caibideilKawyaw RC19 Mǒ̤jè a ta̤sû̌ta̤tòwònu a ma̤cǒma̤tè̤jò kò dǐpwǎ̤꤮ tò̤. Pwǎ̤ta khònò̤htǒo pa ta̤kè̌shuǐ klè̌ asa tabo htě awǒkhlope ta ta̤sû̌ta̤tòwò htǒonu a ǒ hǒ. Dě pa hènṳphǔ Cǒmara a ǒ ta klè̌ asa htǒotabo mî̌ anî̤ hǒ. Faic an caibideil |
Ma̤pô̤̌nudě pa gǔ hî̌ hî̌tè? Ta̤sû̌ta̤tòwò mî̌ asǔ pwǎ pa gǔ hî̌ pô̤̌nu ya? Pa hî̌ pô̤̌numî̌ a tôtô̤̌. Na ma̤ pô̤̌numî̌ asǔ ta̤sû̌ta̤tòwò kè̌ nè̌lṳ̌ tô̤̌ hî̌nu, ta̤ dǒ he ma̤sǔ hto kwè̌꤮ titènu he sî̌ganǎ̤ getîkhî tûû̌ nô̌tô̤̌. Hî̌kûmṳ̂̌, “Sǎyṳsǎbǎ tǎ̤ kòyò ta tǎ̤mǎ̤ nî̌,” kè̌ ta̤sû̌ta̤tòwò wě̤lṳ̌ pô̤̌o tô̤̌ hî̌dě, sǎyṳsǎbǎ kòyòta numî̌ a htû ta̤sǔnu, he sî̌ganǎ̤ tô̤̌.
Dǒ ama̤hî̌tè akhû̌akhî hî̌dě, pô̤̌khô pa gǔ ô̌kǔbǎ dǒ pa ma̤ ta̤sǔ ayanu, pa ganǎ̤de gû̌ma̤ kû̌ ta̤sû̌ta̤tòwò akò dě, a ta̤siwi̤sòwò̤ dǒ a gǔ ma̤jè̌ bǎ panu aô̌tô̤̌, ma̤titèhî̌dě a ta̤shû̌ta̤shǒ ma̤pî̌kè phěyî̌ a ta̤sǎyṳsǎbǎnu akhû̌aǎ ô̌ tô̤̌. Pô̤̌nudě Cǒmara ma̤ kû̌ anǎ̤, a nohèlò̤ a phû̌pwa̤khû dě a hèlò̤ sûlû anǎ̤ pô̤̌ hǎkhû̌phû̌ sô̌sô̌kû̌ pa dǒ a lǎ̤klôma̤ ta̤sǔ tokhlǒ. Bǎbǎkǎlè ta̤sǔ lǎ̤klô pǒjò lû̌û tô̤̌. A hè khòbǎ pa ta̤sǔta̤plě, dě a ma̤pî̌kè ta̤sǔ a ta̤pǒ pa nutokhlǒ hǒ.
Bǎbǎkǎlè pa Yǔdaphû̌ dǒ a yṳ̌ǎ Khrǐ nutokhlǒ numî̌, pa sî̌ganǎ̤ kû̌ Cǒmara bè̌cǒbè̌tè̤ kòyò tôpwa̤numî̌ a bè̌cǒbè̌tè̤ lû̌û kû̌ a gû̌ma̤ ta̤sû̌ta̤tòwò akhanu mè̤̌tô̤̌. Mè̤̌pwǎ tǒ̤ a yṳ̌nǐ̤nǎ̤nǐ̤ Yeshǔ Khrǐnu pwǎ. Pa tokhlǒnu bǎbǎ, pô̤̌khô Cǒmara gǔ bè̌cǒbè̌tè̤ pa kû̌ pa ta̤yṳ̌ta̤nǎ̤ Khrǐ akhû̌khî nudě, pa yṳ̌nǐ̤nǎ̤nǐ̤ Yeshǔ Khrǐ hǒ. Mè̤̌pwǎ dǒ pa gû̌ma̤ ta̤sû̌ta̤tòwò akhanu mè̤̌tô̤̌, ma̤titèhî̌dě dǒ kòyò gû̌ ma̤bò̌ ta̤sû̌ta̤tòwò akò dě kòyò htûhtò̌bò̌ kòyòcǒ kòyòtè̤nu a ô̌ tôpwǎ̤ tô̤̌.
Cǒmara sǎphlǒô̌ dǒ a gǔ bè̌lṳ̌htò̌ bǎ a kòyò tokhlǒ kû̌ a ta̤dǒû̌dǒshò̌ nutôcǒ. A ta̤dǒû̌dǒshò̌ numî̌ Yǔdaphû̌ mè̤̌tô̤̌ tokhlǒ aya numî̌ amè̤̌. Ta̤dǒû̌dǒshò̌ numî̌ a lě̤dû̌pwî̤htû, ata̤bwǐdû̌sîrîhtû mî̌ca. Ta̤dǒû̌dǒshò̌ numî̌ amè̤̌kû̌ Khrǐ dǒ a ô̌ bǎ sîkû nuhǒ, dě yô̤̌mûyô̤̌sǎ mî̌ amè̤̌kû̌ sî gǔ nǐ̤bǎ Cǒmara a ta̤bwǐdû̌sîrîhtû pě, nuhǒ.
Khònò̤̌ pa sî̌yaphlô kû̌ ta̤sû̌ta̤tòwò dǒ Khûmṳ̂shě bè̌kè numî̌ amè̤̌pwǎ ta̤yǎ̤yô̤ ta̤ma̤mǎnǎ tôcǒpwǎ. Ta̤ amè̤̌mî̌cǎ dǒ ta̤sû̌ta̤tòwò sǎyṳ nè̌lṳ̌ numî̌ amè̤̌kû̌ lǒ̤bò ta̤wî̤ta̤twè̤̌ dǒ a hè tutṳ̌ dǒ Khrǐ a ô̌ tokhlǒnu hǒ. Ta̤sû̌ta̤tòwònu a hî̌ kû̌, pṳ̂̌něně꤮ tôbǎ lṳhtò̌ ta̤phû̌ta̤wè̤nu akhû̌akhî, ma̤lǒhtò̌behtò̌ jò bǎ kòyòhǎkhû̌phû̌ tô̤̌.
Bǎbǎkǎlè, Khrǐ nî̌ asô̌sô̌kû̌ Khûmṳ̂shě dǒ a htû pwa̤ma̤ta̤phû̌ dǒ Cǒmara ahǐkû nutôpwa̤ mè̤̌tô̤̌. A mî̌ Cǒmara aphû̌khû tôpwa̤. A mî̌ acǒ kû̌ ata̤ma̤ dě a kè̌khwè̌ǐ apha Cǒmara a hǐphû̌phòphû̌ tokhlǒ. Pa kè̌ gû̌ khukhuhehe hè sělě kû̌ Khrǐ tǒ̤dǒ agutṳ̌ htokhôtô̤̌ ta̤ dǒ Cǒmara gǔ ǐ panu, pa kè̌ kè̌shuǐ hènè tǒ̤dǒ agutṳ̌ numî̌, pa mî̌ Cǒmara ahǐphû̌phòphû̌ hǒ.
Pô̤̌nudě Cǒmara ǐ bòkè pa a ta̤olò̤ kû̌ a ta̤wṳ̂̌dòlò̤ ayô̤̌ ginǐ̤cǒbò hǒ. Cǒmara lòhôjòtô̤̌ akhû̌akhî, ginǐ̤cǒnu a htû̌lè̌ tèplè̌ khô̌jò tô̤̌tô̤̌. Pa dǒ a khlè̌ tûdûbǐ dǒ Cǒmara a ô̌ tokhlǒnu, dǒ Cǒmara htû̌lè̌ tèplè̌ khô̌jò pe a ta̤olò̤ tô̤̌ akhû̌akhî, pa sǎphlǒmô̤ sǎphlǒshû̌htò̌ mî̌ca. Dǒ pa sǎphlǒmô̤ sǎphlǒshû̌ akhû̌akhî, ta̤kè̌shuǐ dǒ Cǒmara ǐ panu, pa pṳ̂̌mě hènè sělě dǒ agutṳ̌ hǒ.
Bǎ Cǒmara ǐ Yǔdaphû̌ tokhlǒ ta̤sû̌ta̤tòwò akhanu, a bè̌htò̌ pwa̤shû̌gǎta̤ dǒ akhlialè gelò̤ dǒ Le̤wǐphû̌ nutokhlǒ a ô̌. Asî bǎ lṳhtò̌ bǎ kòyò pô̤̌ ta̤sû̌ta̤tòwò tokhlǒ ô̌nu. Le̤wǐphû̌ pwa̤lṳta̤phû̌ tokhlǒ ma̤ ata̤ma̤ tokhlǒ bǎbǎkǎlè pô̤̌khô kòyò gǔ htûhtò̌ kòyòcǒkòyòtè̤ ayanu, asî ma̤jòtô̤̌. Pô̤̌nudě Cǒmara bǎ no hèkhò tèplè̌ pwa̤shû̌gǎ dǒ ashǔshawa̤ tôpwa̤. Pwa̤shû̌gǎ tôpwa̤nu akhlialè gelò̤ dǒ Le̤wǐphû̌ dǒ akhlialè gelò̤ tutṳ̌ dǒ PhaArû a ô̌nu mè̤̌tô̤̌. Pwa̤shû̌gǎ tôpwa̤nu, asô̌sô̌kû̌ Malakhǐsedè̌ nuhǒ.