Hebrǔ 2:14 - Kawyaw New Testament

¹⁴ Phû̌mǒ̤phû̌khû a kaǎ lû̌û tokhlǒnu, a ô̌ kû̌ anǎ̤glǒ sǐshi dǒ a sijònu akhû̌akhî, Běcǎ Yeshǔ hèlò̤ phî̌nṳ̌ kû̌ kòyò hǎkhû̌phû̌ anǎ̤glǒ dǒ a sô̌sô̌kû̌ kû̌ asînu. A htûhtò̌ sô̌sô̌kû̌ kòyòhǎkhû̌phû̌ akhû̌akhî, a si jò. Pô̤̌khô Yeshǔ gǔ ma̤pî̌kè hǎkhû̌tana dǒ kòyò kaǎ kû̌ Sehtô dǒ a ô̌ kû̌ a ta̤pô̤ta̤phǎ shû̌sho dǒ a pǒǐ ta̤si nutôdo ayanu, a tṳ̌sikhòsikè anǎ̤ hǒ.

Kawyaw RC

¹⁴ Phû̌mǔphû̌khû a kaǎ nû̌û htǒotoǒnu, a ǒ ta ana̤klû sǐshi dě a sijò akhû̌akhî, Běcǎ Ye̤shǔ hèlò̤ phî̌nṳkû̌ kòyòhǎkhû̌phû̌ ana̤klû htě a sǒsǒkû̌ta asînu. A htûhtò̌ sǒsǒta kòyòhǎkhû̌phû̌ akhû̌akhî, a sijò. Ma̤pûhǐ Ye̤shǔ ma̤pî̌kè khînǎmo̤pha hǐkǒdû̌ htě kò kaǎ yǎta Sehto htě a ǒ ta a ta̤po̤ta̤phǎshû̌sho dě a pǒǐ ta̤si htǒotado ayanu, a khòsikè asò̌.

Hebrǔ 2:14 Iomraidhean Croise

Mǒhtûlû̌hǎhtûsa 3:15

He no htûhtò̌ na kû̌ pwa̤mǒ̤ nutôpwa̤ khuwè̤ pě, nakhli tôpwa̤ kû̌ pwa̤mǒ̤ akhli tôpwa̤ gǔ shěpě̤ lû̌û pě, dě pwa̤mǒ̤ akhli tôpwa̤ gǔ yî̤̌mǔ naikǒ pě, dě na gǔ ě pwa̤mǒ̤ akhli pwa̤khû nutôpwa̤ khò̌teněkò pě.”

Matěo 16:17

Dě Běcǎ Yeshǔ hî̌shěshu lû̌û kû̌, “Phayṳ̂nǎ aphû̌khû Khûshǐmû, Cǒmara ǐshowî̤ na hǒ, ma̤titè̌hî̌dě hǒnumî̌ kòyòhǎkhû̌phû̌ dǐsî̌ganǎ̤ htò̌lṳ̌ na mè̤̌tô̤̌, amè̤̌pwǎ kû̌ pha Cǒmara dǒ mǒkhû̌ tôpwa̤ dǐsî̌ganǎ̤ htò̌lṳ̌ na pwǎ.

Matěo 25:41

“Htodě a gǔ hî̌ kòyò ô̌ dǒ a cǔcôcî̌ tokhlǒ kû̌, ‘hǎhtò̌cû̌ tephekè kû̌ he, sî mî̌ kòyò dǒ a nǐ̤bǎ ta̤ǐsho tokhlǒ, cû̌nṳ̌ lô̌khô dǒ kòyò tîwî̌tòwò nǎ bǎ hǎkhû̌tana nutôdo kû̌ a khînǎkhîno nutokhlǒ aya dǒ asî gǔ cû̌ô̌ bǎ mî̌ dǒ a pǐ̤jò tôkhò̌꤮ tô̤̌ nutôphǎ akûnu.

Jowǎ̤ni̤ 1:14

Kòyò dǒ kòyò kaǎ a kû̌ ta̤lě̤ta̤yô̤̌ tôpwa̤nu, a hèhtû ma̤pô̤̌ kòyòhǎkhû̌phû̌nu dě a hè ô̌htûpwa̤ dǒ pakla hǒ. Dě pa kè̌shǐ a ta̤bwǐdû̌sîrîhtû. Cǒmara aphû̌khû ô̌pwǎ tôpwa̤nô̤̌ akhû̌akhî, a nǐ̤bǎ bò ta̤bwǐdû̌sîrîhtû dǒ aphaô̌ a mî̌ kòyò dǒ a lǒbe kû̌ ta̤bwǐta̤sîrî kû̌ ta̤tě̤ta̤mè̤̌ tôpwa̤.

Jowǎ̤ni̤ 12:24

He hî̌cǒcǒ sî, bǔjû̌ tôphlǒnu, kòyò kè̌ shǒǎlò̤ lû̌û dǒ hǎkhû̌ tô̤̌ hî̌nu, a phǎhtò̌ a sǎhtò̌ jòtô̤̌. Bǎbǎkǎlè kòyò kè̌ lǔlò̤ lû̌û hî̌nu, a gǔ phǎhtò̌ sǎhtò̌ dû̌wî̤ pě.

Rṳ̂̌me̤ 14:9

Dǒ ta̤we̤ta̤kè hǒtokhlǒ akhû̌akhî, pô̤̌khô Khrǐ gǔ htûhtò̌ kòyò htûpwa̤ tokhlǒ kû̌ kòyò si tokhlǒ a Běcǎ dě, a si htodě a ihtǒhtûpwa̤ getîkhî sô̌ dǒ ta̤si hǒ.

Rṳ̂̌me̤ 8:3

Dǒ ama̤hî̌tè akhû̌akhî hî̌dě, pô̤̌khô pa gǔ ô̌kǔbǎ dǒ pa ma̤ ta̤sǔ ayanu, pa ganǎ̤de gû̌ma̤ kû̌ ta̤sû̌ta̤tòwò akò dě, a ta̤siwi̤sòwò̤ dǒ a gǔ ma̤jè̌ bǎ panu aô̌tô̤̌, ma̤titèhî̌dě a ta̤shû̌ta̤shǒ ma̤pî̌kè phěyî̌ a ta̤sǎyṳsǎbǎnu akhû̌aǎ ô̌ tô̤̌. Pô̤̌nudě Cǒmara ma̤ kû̌ anǎ̤, a nohèlò̤ a phû̌pwa̤khû dě a hèlò̤ sûlû anǎ̤ pô̤̌ hǎkhû̌phû̌ sô̌sô̌kû̌ pa dǒ a lǎ̤klôma̤ ta̤sǔ tokhlǒ. Bǎbǎkǎlè ta̤sǔ lǎ̤klô pǒjò lû̌û tô̤̌. A hè khòbǎ pa ta̤sǔta̤plě, dě a ma̤pî̌kè ta̤sǔ a ta̤pǒ pa nutokhlǒ hǒ.

Kôritu awǐlǒ tôbǎ 1:28

Pô̤̌khô Cǒmara gǔ ma̤pî̌kè ta̤ dǒ kòyò hǎkhû̌phû̌ gènè̤dû̌ anǎ̤ tokhlǒ ayanudě, a kaǎ pwǎ kòyò dǒ kòyò bè̌dû̌ asî tô̤̌ nutokhlǒ pwǎ, kòyò gènè̤pî̌tî̌ asî nutokhlǒ kû̌ kòyò bè̌ asî kû̌ kòyò ô̌lǒô̌khlo nutokhlǒ pwǎ.

Kôritu awǐlǒ tôbǎ 15:50

Khôbǒsû̌ sî, khònò̤̌ he sǎyṳ hî̌ bǎ sî kû̌ panǎ̤glǒ phěyî̌ dǒ a ô̌ kû̌ sǐ kû̌ shi nî̌ a cû̌nṳ̌ ô̌htûpwa̤jò dǒ Cǒmara ashiagǎkû tô̤̌. Ma̤titèhî̌dě panǎ̤glǒ dǒ asoapî̌lṳ̂̌ jò tûjû̌pwa̤ nî̌, a ô̌htûpwa̤ khòpè̤̌ tûjû̌pwa̤ tô̤̌.

Galatǐ 4:4

Bǎbǎkǎlè bǎ shěkǎtô shěkhǎbǎ hètǒ̤hǒ akhanu, Cǒmara nohèlò̤ aphû̌khû dě a hè ô̌phijǎlò̤ dǒ pwa̤mǒ̤ tôpwa̤ a ô̌, dě a hè ô̌phijǎlò̤ dǒ Yǔda a ta̤sû̌ta̤tòwò alǎ̤.

Kòlòtè̌ 2:15

Bǎ Yeshǔ si dǒ nò̌dò̌htǔlô̤ akhanu, lǒ̤bò khînǎkhîno dǒ a ô̌ kû̌ a ta̤siwi̤sòwò̤ tokhlǒnu, Cǒmara phî̌kèbò asî ata̤siwi̤sòwò̤ nutokhlǒ dě a dǔlè̌lṳ̌htò̌ bǎ kòyò pṳ̂̌꤮ tôpwa̤ kû̌ a ma̤pè̤̌kè hǒ asî hǒ.

Tîmôte awǐlǒ tôbǎ 3:16

Pa ta̤cubucaba adû̌ayô̤̌ pwǐtènu kòyò ma̤bǐjòǐ a tôpwǎ̤꤮ tô̤̌. Khrǐ ô̌lṳ̌htò̌ pô̤̌ kòyòhǎkhû̌phû̌ tôpwa̤, dě Yôla Plò̌shǐ Běcǎ khòlṳ̌ kû̌ Khrǐ nî̌ a ma̤tô Cǒmara asǎphlǒ, dě mǒkhû̌ tanaphû̌ tokhlǒ kè̌shǐbǎ a hǒ. Htodě awe̤akè nî̌, kòyò shôbǐǐlṳ̌ a dǒ kòyò ashǔshawa̤ tokhlǒ aklahǒ. Kòyò ô̌ dǒ hǎkhû̌ tokhlǒkhlǒ nî̌ a yṳ̌nǐ̤nǎ̤nǐ̤ lû̌û hǒ. Cǒmara johtò̌ a dǒ mǒkhû̌ bǎ ta̤bwǐdû̌sîrîhtû akûhǒ.

Tîmôte ginǐ̤bǎ tôbǎ 1:10

Bǎbǎkǎlè khònò̤̌ pa Běcǎ Yeshǔ Khrǐ dǒ a ma̤hǎplǎge pa nutôpwa̤ hè akhû̌akhî, a dǔlè̌lṳ̌ hto pa ta̤bwǐta̤sîrî nuhǒ. A ma̤pî̌kè ta̤si a ta̤siwi̤sòwò̤ dǒ a pè̤̌ǎpè̤̌ô pa tokhlǒ hǒ. Htodě dǒ ta̤sǎlě̤we̤kè akhû̌akhî, a dǔlè̌lṳ̌ hto ta̤htûpwa̤ dǒ a si jòtô̤̌ nuhǒ.

Hebrǔ 10:10

Yeshǔ Khrǐ ma̤ bǎ pô̤̌ Cǒmara a ta̤sǎyṳ ô̌nu, htokhôtô̤̌ dǒ a lṳhtò̌ anǎ̤glǒ tôplǎnô̤̌pwǎ dě a htophlǔ bòhǒ akhû̌akhî, a ma̤ plò̌shǐ pa hǒ.

Hebrǔ 10:5

Pô̤̌nu akhû̌akhî, bǎ Khrǐ hèlò̤ dǒ hǎkhû̌ akhanu, a hî̌ Cǒmara kû̌, “Kòyò lṳhtò̌ bǎ na ta̤phû̌ta̤wè̤ sîtokhlǒ kû̌ ta̤lṳta̤tòhtò̌ sî tokhlǒnu, na sǎyṳ tô̤̌. Bǎbǎkǎlè na tîwî̌tòwò nǎhto he nǎ̤glǒ dǒ he glè̌ bǎ lṳhtò̌ ayahǒ.

Hebrǔ 2:17

Pô̤̌nu akhû̌akhî, pô̤̌khô Běcǎ Yeshǔ htûdû̌ pwa̤ dǒ a ma̤ Cǒmara a ta̤phǐta̤ma̤ pô̤̌ pwa̤shû̌gǎ ikǒdû̌lǒ dǒ acǒ kû̌ ayô̤̌ dě a sǎyṳgwèbǎǐjò kòyò tôpwa̤, htokhôtô̤̌ pô̤̌khô a tṳ̌sikhòsibǎ dǒ kòyò tokhlǒ a ta̤ma̤sǔ tokhlǒ plûkè ayanu, a hèlò̤ phî̌ kòyòhǎkhû̌phû̌ alǎ̤klô sô̌sô̌kû̌ apṳ̌awè̤̌ nutokhlǒ hǒ.

Hebrǔ 2:18

Dě khònò̤̌, anǎ̤ Běcǎ tûû̌ kè̌shǐsanǎ̤ hè bǎ hto ta̤khòjî̌jû̌ tokhlǒ, ta̤tili̤tôlô̌ tokhlǒ akhû̌akhî, kòyò dǒ a kè̌shǐtṳ̌bǎ ta̤jî̌jû̌ kû̌ ta̤tili̤tôlô̌ tokhlǒnu a ma̤jè̌bò̌ kòyò pwǎ.

Hebrǔ 4:15

Pa pwa̤shû̌gǎ ikǒdû̌lǒ nutôpwa̤ nî̌ a sî̌ganǎ̤ pa ta̤khû̌shiǎjǎ tokhlǒ dě a sǎyṳgwèbǎǐ pa. Ma̤titèhî̌dě a kè̌shǐ tṳ̌bǎ kû̌ ta̤tili̤tôlô̌ pṳ̂̌tocǒ pô̤̌ pa kè̌shǐ tṳ̌bǎnu bǎbǎkǎlè a ma̤sǔkû̌ ta̤ tô̤̌.

Hebrǔ 9:15

Dǒ ta̤we̤ta̤kènu akhû̌akhî, ta̤ǐshowî̤ tûjû̌pwa̤ dǒ Cǒmara olò̤kè bǎ hto kòyò dǒ a kaǎ lû̌û tokhlǒ gǔ nǐ̤bǎ ayanu, Khrǐ phî̌hèǐ bǎ Cǒmara a kòyò tokhlǒ ta̤olò̤ asa nutôcǒ dǒ Cǒmara a ô̌ hǒ. Pô̤̌khô Khrǐ gǔ ma̤hǎplǎge dě plûhǎhtò̌ pili̤ cû̌kè kòyò ô̌ dǒ ta̤olò̤ ali̤ alǎ̤ nutokhlǒ ayanu, a bǎ khòlṳ̌kè asǎphlǒ. Dǒ a khòlṳ̌ asǎphlǒ akhû̌akhî, asî nǐ̤bǎ bò̌ û̌tě̤û̌ca, a ta̤ǐshowî̤ tûjû̌pwa̤ dǒ Cǒmara olò̤ hto nutokhlǒnu hǒ.

Petru awǐlǒ tabǎ 1:20

Bǎ Cǒmara bô̌lò̤tèlò̤ hǎkhû̌ khôtô̤̌ akhanu, a rû̌htò̌ nǎhto Khrǐ nuhǒ. Bǎbǎkǎlè lṳmṳ̌ni̤ lṳmṳ̌sa dǒ nô̌kò gutṳ̌ a amè̤̌kû̌ khònò̤̌kha hǒtokhlǒnu, Cǒmara dǔlè̌lṳ̌ hto sî kû̌ Khrǐ hǒ.

Ta̤dǔlè̌nǎ 1:18

He mî̌ kòyò dǒ a htûpwa̤ tôpwa̤. He si htohǒ bǎbǎkǎlè khònò̤̌ he htûpwa̤ tûjû̌pwa̤ talakhǎ hǒ. He ô̌ kû̌ ta̤siwi̤sòwò̤ kû̌ ta̤pô̤ta̤phǎ dě he pǒbò ta̤si kû̌ lṳ̌gǎnǎdo tokhlǒ.

Ta̤dǔlè̌nǎ 12:9

Wṳ̂̌dû̌ dǒ něhǎlau tôbô dǒ kòyò kaǎ lû̌mi̤ kû̌ hǎkhû̌tana tô̤̌mî̌ Setò̤ dǒ a cû̌ tili̤tôlô̌ bò kòyò hǎkhû̌běkhû̌ nutôbô, kòyò wîtě̤kè bò a kû̌ a tanaphû̌ tokhlǒ dǒ hǎkhû̌.

Ta̤dǔlè̌nǎ 2:10

Ta̤dǒ na glè̌ khòbǎ khònò̤̌nu, ǐsha tǎ̤ alǎ̤ tîkî̌꤮ tǎ̤mǎ̤ nî̌. Hǎkhû̌tana tîwî̌tòwò kòyò dǒ kòyò gǔ ma̤kè̌kè̌ sî akhû̌akhî, a gǔ dǒnṳ̌ sî dǒ apô̤kû tokhlǒkhlǒ pě. Kòyò gǔ ma̤jî̌ma̤jû̌ sî ani̤shǐshè̌ pě. Tǒ̤dǒ na kè̌shǐbǎ kû̌ ta̤si bǎbǎ, tûlû̌ cǒ kû̌ he dě he gǔ ǐ na ta̤htûpwa̤ a khû̌glû̌hta pě.

Ta̤dǔlè̌nǎ 20:2

A hè pṳ̂̌měkè wṳ̂̌dû̌ amè̤̌kû̌ hǎkhû̌tana dǒ něhǎlau nutôbô. A mî̌ kòyò kaǎ lû̌û kû̌ Sehtô. Dě a coměyî̤ lû̌û anětôrǐ.