Hebrǔ 12:15 - Kawyaw New Testament

¹⁵ Pô̤̌khô sî pṳ̂̌꤮ tôpwa̤ gǔ nǐ̤bǎ lô̌khô Cǒmara abwǐsîrî nudě, sè̌rè̌ lô̌khô sînǎ̤ nî̌꤮. Nohtûhtò̌ tǎ̤ lô̌khô sînǎ̤ pô̤̌ sǒmṳ̌ dǒ awè̤̌htòô̌ dě kòyò ǎ a dě a sijò kòyò nutokhlǒ tôpwǎ̤ tǎ̤mǎ̤ nî̌꤮. Kòyò dǒ asô̌sô̌kû̌ sǒmṳ̌ dǒ a ma̤ sijò kòyò tokhlǒnu a gǔ dô̌htò̌ dǒ sîkla dě a ma̤pò̤̌ma̤sha dû̌wî̤ kòyò kû̌ a ta̤wè̤̌ta̤htò si nupě.

Kawyaw RC

¹⁵ Ma̤pûhǐ sî pṳ̂̌꤮ tapwa̤ nî̤bǎdǒ lǒkho Cǒmara abwǐasîrî htǒonudě, sè̌rè̌ǐ lǒkho sîna̤ nî̌꤮. Nohtûhtò̌ pûma̤ lǒkho sîna̤ pwǐ sǒmṳwè̤ htě kò ǎyǎ dě a sijò kònu toǒ dǐpwǎ̤꤮ ma̤ nî̌. Kòyò htě alò̤ta sǒmṳwè̤ htě kò ǎyǎ dě kò sijò htǒotoǒnu, a glè dǒhtò̌ sîkla dě a ma̤pò̤ma̤sha kòyò saprṳ̂ ta a wè̤htò̌si htǒonu pě.

Hebrǔ 12:15 Iomraidhean Croise

Lǔka 22:32

Bǎbǎkǎlè, Khshǐmṳ̂, pô̤̌khô na ta̤yṳ̌ta̤nǎ̤ glè̌ hǎpò̌kè tǎ̤mǎ̤nu, he kwicaba pa dǒ naya. Htodě bǎ na sî̌ya getîkhî gesô̌ hǒ nanǎ̤ pěnu, na tôbǎ ikhû̌ǐǎ na pṳ̌wè̤̌ tokhlǒ pě nî̌꤮.”

Kôritu awǐlǒ tôbǎ 10:12

Pô̤̌nudě na kè̌ gènè̤ tûû̌ nanǎ̤ kû̌ he ta̤yṳ̌ta̤nǎ̤ shû̌sho hǒ kè̌hî̌dě, ô̌sè̌rè̌ tûû̌ nanǎ̤ nî̌, hî̌pě na ma̤ta̤sǔ hè̌.

Kôritu awǐlǒ tôbǎ 13:8

Ta̤mô̤nṳ̌ agutṳ̌ jòtô̤̌, a ô̌měô̌gle tûjû̌pwa̤. Piwi̤pèshè tokhlǒ a ta̤hî̌bǎ tokhlǒ bǎbǎ, ta̤hî̌bǎ tèplè̌htò̌jò yô̤̌sǎkhěkhô̌ tokhlǒ bǎbǎ, ta̤sî̌yaphlôphǎ tokhlǒ bǎbǎ, a ô̌ měgle tûjû̌pwa̤ tô̤̌, a gǔ hǎmǎkèbò pě.

Kôritu awǐlǒ tôbǎ 15:33

Yṳ̌ǎ tǎ̤ kòyò dǒ a hî̌ pô̤̌nu tokhlǒ tǎ̤mǎ̤. Pô̤̌ kòyò hî̌ kû̌, “Sî kè̌ bǒsû̌ sî khô dǒ a ma̤ ta̤phû̌mò̤̌shǐhtô tokhlǒ dě a gènè̤ ta̤phû̌mò̤̌shǐhtô tokhlǒnu, a gǔ wǎ̤nṳ̌ sî pě dě sî gǔ htûhtò̌ sô̌sô̌kû̌ kòyò phû̌mò̤̌ pô̤̌ asînu pě.”

Kôritu awǐlǒ tôbǎ 5:6

Sî cû̌ hî̌bǎ htò̌yô̤̌ tǒ̤ sîyô̤̌ pô̤̌numî̌ amè̤̌ tô̤̌. Gènè̤htò̌ lô̌khô yô̤̌ tômû dǒ a hî̌ kû̌, “Ta̤bû tîkî̌phû̌ pwǎ dě a ma̤kôphô̌htò̌bò mû̌ toglǒ,” kòyò hî̌ numî̌ sî sî̌ganǎ̤ bǎtô̤̌ya. Pô̤̌nudě kòyò nutôpwa̤ a ta̤sǔnu, a dǐhtûhtò̌bò sî saprṳ̂bò ata̤sǔ hǒ.

Kôritu ginǐ̤bǎ tôbǎ 13:5

Pô̤̌khô sî gǔ sî̌ganǎ̤ ǐ lô̌khô sînǎ̤ kû̌ sî cǒ kû̌ sî ta̤yṳ̌ ya, tô̤̌ya nu, gwè̌lò̤ ǐtûû̌ lô̌khô sînǎ̤ nu. Khrǐ ô̌htûpwa̤ dǒ sîkû numî̌ sî sî̌ganǎ̤ tô̤̌ ya? Bǎbǎkǎlè sî kè̌ kè̌shǐ kû̌ sî cǒ kû̌ sî ta̤yṳ̌ tô̤̌ hî̌dě, Yeshǔ Khrǐ ô̌htûpwa̤ dǒ sîkû tô̤̌.

Kôritu ginǐ̤bǎ tôbǎ 6:1

Pa mî̌ pwa̤ma̤wô̤̌wô̤̌ta̤ kû̌ Cǒmara tokhlǒ akhû̌akhî, pa shò̌gû̌ sî kû̌ sî gǔ ô̌htûpwa̤ pô̤̌ Cǒmara sǎyṳ no ô̌htûpwa̤ sînu. Sî mî̌ kòyò dǒ a nǐ̤bǎ hto Cǒmara abwǐsîrî tokhlǒ hǒ akhû̌akhî, sî bǎ ô̌htûpwa̤ lô̌khô pô̤̌nu.

Galatǐ 2:13

Yǔdaphû̌ dǒ a yṳ̌ǎ Khrǐ dǒ ashǔshawa̤ tokhlǒnu, a sî̌ganǎ̤ kû̌ Khûpetarǔ ma̤ numî̌ a tôtô̤̌, bǎbǎkǎlè a gû̌ma̤ pô̤̌ Khûpetarǔ ma̤nu. Khûbanabǎ gû̌ma̤ pô̤̌ asî jî̌khô̌jî̌yò ma̤nu hǒ.

Galatǐ 5:4

Dǒ sîkla tokhlǒkhlǒnu, a gènè̤sǔ lô̌khô kû̌ asî kè̌ gû̌ma̤ ta̤sû̌ta̤tòwò numî̌ Cǒmara bè̌cǒbè̌tè̤ lû̌û pě, pô̤̌nu. Sî kè̌ gènè̤ lô̌khô pô̤̌nu hî̌dě sî bǒsû̌khǎkhô pe sînǎ̤ kû̌ Khrǐ tô̤̌. Sî bè̌tephekè sînǎ̤ kû̌ Cǒmara abwǐsîrî nuhǒ.

Ěphěsu 5:3

Sî htûhto Cǒmara a kòyò aplò̌shǐ tokhlǒ akhû̌akhî, ta̤cû̌sǔ pwa̤mǒ̤pwa̤khû, ta̤ma̤ sòwò̤̌ ǐ tûû̌ anǎ̤ kû̌ sǐshiphěyî̌ a ta̤sǎyṳ phû̌mò̤̌ pṳ̂̌tocǒ, tô̤̌mî̌ ǎtṳ̌ǎbǐ kò khû̌ tokhlǒnu, a tôbǎ ô̌ dǒ sîkla tîkî̌꤮ tô̤̌.

Kòlòtè̌ 3:5

Pô̤̌nu akhû̌akhî, wîkè sî ta̤ô̌htûpwa̤ li̤ a ta̤sǎyṳsǎbǎ dǒ amè̤̌, ta̤cû̌sǔ pwa̤mǒ̤pwa̤khû, ta̤ô̌htûpwa̤ dǒ a mṳ̂̌plî tô̤̌ tokhlǒ, sǎphlǒ putupatǎ, ta̤sǎyṳsǎbǎ phû̌mò̤̌, kû̌ sǎyṳ nǐ̤bǎ dû̌htò̌ pô̤̌ ta̤dû̌yò̤̌htò̌sa tokhlǒ. Ta̤sǎyṳ̌nǐ̤bǎ dû̌wî̤pô̤̌ ta̤dû̌yò̤̌htò̌sa mî̌ asô̌sô̌kû̌ caba ta̤yô̤ta̤gî̌ hǒ.

Tǐtǔ 1:15

Kòyò tôpwa̤pwa̤ dǒ a mṳ̂̌plî dǒ Cǒmara a lô̤mô̤̌nu, ta̤lǒ̤꤮ bò mṳ̂̌plî bò dǒ aya hǒ. Bǎbǎkǎlè kòyò dǒ a mṳ̂̌plî gû̌ kòyò tô̤̌ dě a yṳ̌nǐ̤nǎ̤nǐ̤ gû̌ kòyò tô̤̌ tokhlǒnu, dǒ ayanu a mṳ̂̌plî tôcǒ꤮ tô̤̌. Asî ta̤sǔ tokhlǒnu a ma̤ phû̌mò̤̌bò nṳ̌sô̌ asî ata̤gènè̤ kû̌ asǎphlǒ dǒ a sî̌ganǎ̤ ta̤wî̤ kû̌ ta̤phû̌mò̤̌ nuhǒ.

Hebrǔ 3:12

He pṳ̌wè̤̌ sî꤮, sè̌rè̌ tûû̌ lô̌khô sînǎ̤ nî̌꤮. Bè̌ phû̌mò̤̌ lô̌khô tǎ̤ sî sǎphlǒ tǎ̤mǎ̤, sî bè̌ sî sǎphlǒ kû̌ sî yṳ̌ǎ kû̌ kòyò Cǒmara dǒ a htûpwa̤ nutôpwa̤ tô̤̌, sî cû̌ tephekè tûû̌ sîya pô̤̌nu tokhlǒnu ma̤tǎ̤ lô̌khô tôpwǎ̤꤮ tǎ̤mǎ̤ nî̌꤮.

Hebrǔ 4:1

Cǒmara olò̤ pe pa tǒ̤lò̤khònò̤̌ kû̌ pa nṳ̌bǎ dǒ lǎ̤ô̌kǔ agûlǎ̤nu pě. Pô̤̌khô sî pṳ̂̌꤮ tôpwa̤ gǔ nṳ̌bǎ dǒ lǎ̤ô̌kǔ dǒ Cǒmara olò̤ ayanu, pa bè̌sè̌rè̌ lô̌khô panǎ̤.

Hebrǔ 4:11

Pa phiphu dǒ꤮ awǐnu tokhlǒnu, a ganǎ̤dekû̌ Cǒmara ayô̤̌ tô̤̌ akhû̌akhî, a nṳ̌bǎ kû̌ kòyò dǒ Cǒmara lǎ̤ô̌kǔ agûlǎ̤nu tô̤̌. Pô̤̌khô pa gǔ gû̌kè̌lû̌mò̌mṳ kû̌ paphipaphu tôpwǎ̤ tǎ̤mǎ̤, htokhôtô̤̌ pô̤̌khô pa nṳ̌bǎ gû̌ kòyò dǒ lǎ̤ô̌kǔ agûlǎ̤ ayanu, pa tôpwa̤ kû̌ tôpwa̤ gǔ jî̌pwǐ̤wô̌ gutṳ̌ wô̤̌wô̤̌ lû̌û tǎ꤮.

Hebrǔ 6:11

Pa ta̤sǎyṳ mî̌ pô̤̌o: pô̤̌khô ta̤wô̌ dǒ sî sǎphlǒhtû ô̌pǒ̤kè̌shěshu tokhlǒ gǔ lǒhtò̌behtò̌ bǎ sî ayanu, pa sǎyṳ dǒ sî pṳ̂̌꤮ tôpwa̤ gǔ sǎphlǒshû̌ ma̤ lô̌khô tǒ̤dǒ agutṳ̌ pô̤̌ sî ma̤htonu.

Petru ginǐ̤bǎ tabǎ 1:10

Pô̤̌nudě pṳ̌wè̤̌ sî꤮, pô̤̌khô Cǒmara ata̤kaǎ sînu kû̌ a ta̤rû̌htò̌ sînu gǔ htûhtò̌ hènè mè̤̌mî̌ca ayanu, jî̌pwǐ̤jî̌li̤ dû̌wî̤pô̤̌ lô̌khô dǒ alô̤mô̤̌ tôkhô nî̌꤮. Sî kè̌ ma̤pô̤̌nu hî̌dě sî htò̌tukhu lò̤khǔpo̤ pe tôkhò̌꤮ tô̤̌ hǒ.

Petru ginǐ̤bǎ tabǎ 2:18

Asî hî̌bǎ hî̌bǐhî̌ô̌ lô̌khô ayô̤̌ dǒ abwǐsîrî ô̌tô̤̌ tokhlǒ. Asî cû̌ sû̌ǐ kòyò kû̌ kòyò gǔ ma̤ta̤sòwò̤̌ dǒ sǐshi ta̤sǎyṳ patǎ tokhlǒ. Asî tili̤tôlô̌cû̌ tephekè kòyò kû̌ klè̌tôklè̌bǎ tokhlǒ. Kòyò dǒ asî lô̌ǐ tokhlǒnu, a ô̌kǔsa mô̤̌pepwǎ kû̌ ta̤sǔnu pô̤̌ asî nutokhlǒ ma̤nu pwǎ.

Petru ginǐ̤bǎ tabǎ 3:11

Cǒmara gǔ ma̤pî̌kè lǒ̤꤮ bò pô̤̌onu pě akhû̌akhî, sî dě, sî tôbǎ ô̌htûpwa̤ hî̌tè numî̌, bǎ sî ô̌pǒ̤ kè̌shuǐ Cǒmara hè pě akhanu, sî tô ô̌htûpwa̤ plò̌shǐ dě, sî tô ô̌htûpwa̤ tô kû̌ Cǒmara asǎphlǒ.

Petru ginǐ̤bǎ tabǎ 3:14

Pô̤̌nudě sû̌khô sî, dǒ sî ô̌pǒ̤kè̌shuǐ ta̤nu akhû̌akhî, pô̤̌khô Cǒmara gǔ kè̌shǐ sî kû̌ kòyò dǒ awǐ kû̌ ta̤sǔ tǎ̤mǎ̤, htodě pô̤̌khô alǎ̤bè̌ ta̤sǔ dǒ sîlô̤ gǔ ô̌ tǎ̤mǎ̤, htokhôtô̤̌ pô̤̌khô sî gǔ ô̌pè̤̌dû tǒ̤ kû̌ a pěnu, jî̌pwǐ̤jî̌li̤ gutṳ̌ lô̌khô nî̌꤮.

Yṳ̂ha ginǐ̤bǎ tôbǎ 1:8

Pô̤̌nu akhû̌akhî, pô̤̌khô sî nǐ̤bǎ hto ta̤nutokhlǒ gǔ hǎmǎkè bǎ sî tô̤̌nu, htokhôtô̤̌ pô̤̌khô sî gǔ nǐ̤bǎ lǒbe bò sî ta̤ma̤nǐ̤khû̌kǎ ayanu, sè̌rè̌ lô̌khô sînǎ̤ nî̌꤮.