Hebrǔ 10:12 - Kawyaw New Testament

¹² Bǎbǎkǎlè Khrǐ lṳhtò̌ bǎ pa ta̤sǔ aya tokhlǒnu, a lṳhtò̌ tôplǎnô̤̌pwǎ dě a hto phlǔbò tûjû̌pwa̤ hǒ. Dě a ge hǎnòò̌ô̌ dǒ Cǒmara a cǔtômû tôkhô hǒ.

Kawyaw RC

¹² Pwǎ̤tadě Khrî̌stu lṳhtò̌ bǎ pa ta̤sǔ aya htǒotoǒnu, a lṳhtò̌ taplǎpa dě a htophlǔ tûjûpwa̤ hǒ. Dě a ge hǎnòò̌ Cǒmara acǔdemû tokho hǒ.

Hebrǔ 10:12 Iomraidhean Croise

Htû̌sò̌htò̌ 110:1

Cǒmara tûjû̌pwa̤ hî̌lṳ̌lò̤ he Běcǎdû̌ kû̌, “Bǎ he ma̤pè̤̌ bòmǔtegle pwa̤sǎkhě na nutokhlǒ dě he bè̌bò asî dǒ na khǎlǎ khôtô̤̌nu, hǎnòò̌ dǒ he cǔtûmû nutôkhô.”

Mǎ̤riko 16:19

Běcǎ Yeshǔ hî̌bǎhto kû̌ akhôphijǎ tokhlǒ dě Cǒmara kaǎ gehtò̌kè yǎ dǒ mǒkhû̌ dě a htò̌hǎnòò̌ dǒ Cǒmara cǔtômû tôkhô.

Rṳ̂̌me̤ 8:34

Pô̤̌nudě, mò̌pè glè̌ cî̌htò̌ asî ya? Kòyò cî̌htò̌ jò asî tôpwǎ̤꤮ tô̤̌. Ma̤titèhî̌dě, Yeshǔ Khrǐ mî̌ pwa̤ dǒ a si bǎ pa ta̤sǔ aya tôpwa̤, htokhôtô̤̌ Cǒmara ma̤htûpwa̤ getîkhî lû̌û dǒ ta̤si tôpwa̤. Dě Cǒmara ǐ lû̌û gûlǎ̤ dǒ acǔtômû tôkhô. Pô̤̌khô Cǒmara gǔ ma̤jè̌ panu, Yeshǔ nṳ̌ kwisǎyṳ bǎ pa gûlǎ̤ hǒ.

Ěphěsu 5:2

Sî tô ô̌htûpwa̤ lô̌khô hî̌tè numî̌, mô̤nṳ̌ lô̌khô kòyò pṳ̂̌꤮ tôni̤ sô̌sô̌kû̌ Khrǐ mô̤ǐ pa dě a tṳ̌sikhòsi bǎ payanu nî̌꤮. Htokhôtô̤̌ Khrǐ lṳhtò̌ ata̤htûpwa̤ dǒ Cǒmara a lô̤mô̤̌ sô̌sô̌kû̌ ta̤numû̌ dǒ atô Cǒmara asǎphlǒ nuhǒ.

Kòlòtè̌ 3:1

Pô̤̌ Cǒmara ma̤ ihtǒhtûpwa̤ getîkhî Khrǐ dǒ ta̤sinu, Cǒmara ma̤ ihtǒhtûpwa̤ getîkhî sî dǒ ta̤si hǒ dě a ǐ sî ta̤htûpwa̤ asanu kû̌ Khrǐ hǒ. Pô̤̌nudě lǒ̤bò sî sǎphlǒ a ta̤sǎyṳ tokhlǒnu, bè̌ô̌ lô̌khô dǒ mǒkhû̌ bǎ Khrǐ lǎ̤hǎnòò̌ ǐtûû̌ agûlǎ̤ dǒ Cǒmara acǔtômû nutôkhô nî̌꤮.

Hebrǔ 1:3

Kòyò gǔ kè̌shǐ tutṳ̌ Cǒmara a ta̤bwǐdû̌sîrîhtû dǒ akû pě. A mî̌ a sô̌sô̌ bòmǔtegle kû̌ Cǒmara. Pô̤̌khô hǎkhû̌ kû̌ mǒkhû̌ kû̌mî̌ ta̤bô̌lò̤ lǒ̤꤮ bò tokhlǒ gǔ ô̌ gutṳ̌ hènè pô̤̌ pěnu, a pṳ̂̌mějè̌ kû̌ ta̤bô̌lò̤ lǒ̤bònu kû̌ ayô̤̌ dǒ apô̤phǎ shû̌sho nutokhlǒ. Bǎ a ma̤phlǔma̤hto ta̤plûkè kòyòhǎkhû̌phû̌ ata̤sǔ sîtokhlǒ akhanu, a gehtò̌ dǒ mǒkhû̌ dě a htò̌hǎnòò̌ bǎ Cǒmara dǒ apô̤aphǎ adû̌htû gutṳ̌ nutôpwa̤ acǔde cǔtômû tôkhô pě.

Hebrǔ 10:10

Yeshǔ Khrǐ ma̤ bǎ pô̤̌ Cǒmara a ta̤sǎyṳ ô̌nu, htokhôtô̤̌ dǒ a lṳhtò̌ anǎ̤glǒ tôplǎnô̤̌pwǎ dě a htophlǔ bòhǒ akhû̌akhî, a ma̤ plò̌shǐ pa hǒ.

Hebrǔ 10:14

Dǒ Khrǐ lṳhtò̌ pwǎ anǎ̤ tôplǎ akhû̌akhî, kòyò dǒ a ma̤mṳ̂̌plîhto asî ta̤sǔ tokhlǒnu, a ma̤cǒma̤tè̤ asî tûjû̌pwa̤ hǒ.

Hebrǔ 5:1

Pwa̤shû̌gǎ ikǒdû̌lǒ pṳ̂̌꤮ pwa̤pwa̤nu, kòyò rû̌htò̌ a dǒ kòyòhǎkhû̌phû̌ tokhlǒ akla pwǎ, dě kòyò bè̌htò̌ yǎ dǒ a gǔ ma̤ bǎ Cǒmara ata̤ma̤ dǒ kòyò lǒ̤꤮ bò agûlǎ̤. A gǔ lṳhtò̌tòhtò̌ bǎ kòyò ta̤tokhlǒ, htokhôtô̤̌ pô̤̌khô kòyò tokhlǒ ta̤sǔ gǔ plûkè ayanu, a lṳhtò̌ bǎ kòyò ta̤phû̌ta̤wè̤ tokhlǒ dǒ Cǒmara a ô̌ pě.

Hebrǔ 5:3

Htodě asî sanǎ̤ nî̌ a ma̤sǔma̤plě ta̤ akhû̌akhî, asî bǎ lṳhtò̌ bǎ pwǎtǒ̤ kòyò nutokhlǒ ata̤sǔ tokhlǒnô̤̌ mè̤̌tô̤̌, asî bǎ lṳhtò̌ padô̌ asî ta̤sǔsǔ.

Hebrǔ 7:27

A mî̌ asô̌sô̌kû̌ pwa̤shû̌gǎ ikǒdû̌lǒ dǒ ashǔshawa̤ nutokhlǒ mè̤̌tô̤̌. Pṳ̂̌ni̤ni̤ a lǎ̤lṳ̂ lṳhtò̌ wǐ tûû̌ ata̤sǔ tokhlǒ, htodě a lṳhtò̌ nô̌ bǎ kòyò dǒ ashǔshawa̤ tokhlǒ ata̤sǔ tokhlǒ pô̤̌nu mè̤̌tô̤̌. Bǎ a lṳhtò̌ anǎ̤ dǒ nò̌dò̌htǔlô̤ akhanu, a lṳhtò̌ pwǎ tôplǎ dě a htophlǔkè tûjû̌pwa̤ hǒ.

Hebrǔ 8:1

Khònò̤̌, ta̤ dǒ a lṳ̂dû̌lǒ tôcǒ dǒ he sǎyṳ nosî̌yaphlô sî numî̌ amè̤̌kû̌ pa pwa̤shû̌gǎ ikǒdû̌lǒ nutôpwa̤ hǒ. A mî̌ Yeshǔ hǒ. Khònò̤̌ a hǎnòò̌ô̌ dǒ mǒkhû̌ dě a hǎnòò̌ô̌ dǒ Cǒmara dǒ alîata̤kakha, apô̤aphǎ nutôpwa̤ lǎ̤nòò̌ acǔde cǔtômû nutôkhô hǒ.

Hebrǔ 9:12

Bǎ a cû̌nṳ̌ lṳhtò̌ta̤ dǒ ta̤lǎ̤ plò̌shǐ lǒkhlo kò tôtô̤̌ akhanu, a phî̌nṳ̌ pè̤̌ sî asǐ, pṳ̂̌pha sî asǐ numè̤̌tô̤̌. A gǔ nṳ̌ lṳhtò̌ta̤ ayanu, a phî̌nṳ̌ tûû̌ asǐ akhû̌akhî, a hènṳ̌ pwǎ tôplǎ dě ahtoaphlǔ bòhǒ, dě a ma̤hǎplǎge pa tûjû̌pwa̤ hǒ.

Hebrǔ 9:14

Pô̤̌nudě, gènè̤ kè̌mò̌ lô̌khô Khrǐ asǐnu, a ma̤ mṳ̂̌plî bûsǔlǔkhlo pa kû̌ ta̤nutokhlǒ pě dǒ Yôla Plò̌shǐ Běcǎ ô̌htûpwa̤ tûjû̌pwa̤ akhû̌akhî, Khrǐ lṳhtò̌hto anǎ̤glǒ dǒ ata̤sǔ ô̌ tôcǒ꤮ tô̤̌ dǒ Cǒmara a ô̌ hǒ. Pô̤̌khô pa gǔ ma̤ bǎ Cǒmara dǒ a htûpwa̤ tôpwa̤ ata̤ma̤ ayanu, Khrǐ cǔbò pa sǎphlǒ nutokhlǒ kû̌ pa ta̤ma̤ dǒ abwǐsîrî ô̌kû̌ kòyò tô̤̌ nutokhlǒ kû̌ asǐ pě.